Read Vaiphei ZEKARIAH 3 Bible Online

ZEKARIAH 3 - Vaiphei bible

ZEKARIAH 3

¹Chuleh, thiampu lianpen Joshua, LALPA vansawlchâk âng ah ding leh, ama dodâl ding Setan chule a changlam ah ding chu ei etsak a.

²LALPA chun Setan kiang in, “Aw Setan, LALPA chun nangma a hun vau hi! Jerusalem têlchuam ta LALPA chun nangma a hun vau hi! Zia mi hi thukkhûk ah thingkhua kiladok gual chu hilo a hem?” a hun ti’n.

³Tu’hin, Joshua chu puan nîn tak ah kithuam in vansawlchâk âng ah chun a ding zing a.

⁴Vansawlchak chun a âng ah dingte kiang in, “A kithuamna puan nîn tak chu lîpthâk piak un,” a ti’n. Chuleh, a kiang in, “Ngaitia, la mawnate ka lâk mang piak ta hen, kithuamna ding puan thak hun pia ding ka hi,” a ti tai.

⁵Ziaphatchun, keima’n: “Lukhuk thak leh thiangtho tak hun khuksak un,” ka la ti’n. Tichun, lukhuk thak leh thiangtho in a hun thuam tau a; LALPA vansawlchâk chu a kiang in a ding zing a.

⁶Ziaphatchun, LALPA vansawlchâk chun Joshua chu a hun thamuan ah, a kiang in:

⁷“Sepai honte LALPA chun zia gual hin a gen hi: Ka lampite la haw zing ah, ka thupiak dungzui ah la um zing chun, ka In sung vaihawm in pang in la ti’n, ka In huang sung ah thuneina chang inla; tichun, zia tak ah la ma-âng ah dingte lak ah hin, chiatua lumlet theina le hun pia’ng ka.

⁸Tu’hin, thiampu lianpen Joshua tawh la kithuapi la âng ah chu zingte chun, pha tak in ngai tau in! Amau chu thil hung tung ziang dingte hetlawkna ahi ngal a. Ka suak a Bâk chu hun puidawk ngal ding ka hi tai.

⁹Joshua ma-âng ah suang pakhat ka koi chun, mai sagi a nei in; zia chung ah chun lekha zik ing ka tin; tichun, zia gam pumpi khawlo’na hi ni khat sung in la mang ding ka hi’ngal a, ti’n sepai honte LALPA chun a gen ta’ngal a.

¹⁰Ziaphat chuleh, mitin in a grep gui leh a theichang kung lim nuai chiat un, amau Invêngte hun kichial khawm thei chiat ta’n au, LALPA‘n a ti ahi,” a tia.