Read Vaiphei ZEKARIAH 5 Bible Online

ZEKARIAH 5 - Vaiphei bible

ZEKARIAH 5

¹Chuleh, ka vak et to leh, lekhabu zial lêng tawl tawl khat ka mu ta’n.

²Ama chun, “Bang la mu em?” ei hun tia. Ke’nle, “Lekhabu zial lêng tawl tawl pakhat ka mu’n; a dunglam chu tong sawmni ahi’n, a vailam chu tong sawm ahi,” ti’n ka dawnhu a.

³Tichun, ama’n, “Zia hi gam pumpi chung ah hânsia lêngdok chu ahi; kuale gucha taphot chu a lekhabu langkhat ah kizik gual in paithâk in um intin; chuleh, diklo tak ah kihaksial taphot chule a langkhat ah kiziksa gual ma’n sâtthâk in um in au.

⁴Keima sepai honte LALPA ngei in ka gen ah, ka sawldaw ahi tai; tichun, migucha In ah lut intin, diklo tak ah ka min ah kihaksialte In ah le lut in a; zia In ah chun chêng den intin, zia In ah um, a thing leh suangte chule kâng tum ta’n a,” a tia.

⁵Ziaphatchun, ei kihopi vansawlchâk chun ei hun nai ah, “Dâk to inla, bang a hem hung pawt ding chu vak en tiam in,” ei hun ti’n.

⁶Ke’nle, “Bang a hita a hem?” ti’ ah ka dot leh, ama’nle, “Zia hi a hung pawtdok ding bawm chu ahi,” ei hun ti kit a. Chuleh, ka kiang in, “Gam pumpi huap ah a gitlonau chu ahi,” a ti’n.

⁷Chuleh, hâkngêk ah kibawl, a sitna a hon ua leh, bawm sung ah numei khat kichû a la um ta mai a!

⁸Zia pa ma chun, “Zia hi thanhuaina kiti chu ahi,” a hun tia. Ziaphatchun, numei chu bawm sung in a sawn lut kit ah, a hâkngêk sitna chu a sit khum kit tai.

⁹Ziaphatchun, ka et to kit leh, numei pani ei hun zuan ka mu’n. A tha’teu ah chun hui a um a; tuivakang tha gual a nei un, chuleh, lei leh van kikâl in bawm chu a dom to tau a.

¹⁰Ei kihopi vansawlchâk kiang ah chun, “Bawm chu khoilam ah puakmang a guat uh a hem?” ti’n ka dong ta’n.

¹¹Ama’nle, “Shinar gam ah, a In ding sak piak ding a hiu; a In ding a sak zaw phat uh leh, a umna ding mun tak ah chun zia bawm hi koi ta’n au, ti’n ei dawnhu tai,” a tia.