Read Vaiphei ZEKARIAH 8 Bible Online

ZEKARIAH 8 - Vaiphei bible

ZEKARIAH 8

¹Chun, sepai honte LALPA‘n ka kiang in zia gual hin thu a hun gen a:

²Sepai honte LALPA chun: Zion chu vei tak zet in ka vei in, a chung ah nasa tak ah lungna khop in ka vei hi, ti’n a gen hi.

³Chuleh, sepai honte LALPA‘n zia gual hin a gen hi: Zion ah hung kit ing ka tin, Jerusalem lailung ah chêng ding ka hi; tichun, Jerusalem chu khawpi ginum leh sepai honte LALPA umna tâng thiangtho hung hita’n a.

⁴Sepai honte LALPA chun zia gual hin a gen hi: Jerusalem khawpi sung ah kotzing ah te chun, pitêk leh putêk tiangkhut khut ah vâkvêlte chu chukhawm kit ta’n au.

⁵Chuleh, khawpi kotzingte chu chapang hon kitualhel in hung dim kit ta’n au.

⁶Sepai honte LALPA‘n zia gual hin a gen hi: Tu’lai tak ah nutsia ah umte â dingin zia gual chu thilhithei in kilang lo maleh, kei â dingin ahi’theilo’na bang a um em? Sepai honte LALPA chun a ti ahi.

⁷Sepai honte LALPA‘n zia gual hin a gen hi: Ka mite chu sualam gam ah kipat leh, tumlam gam ah kipat in hun hukdok ing ka tin;

⁸Jerusalem ah chêng dingin hun pui khawm ing ka. Ginumna leh dikna ziakin amau chu ka mite hita’n tin uh, keima le a Pathian uh hi ta’ng ka.

⁹Sepai honte LALPA‘n zia gual hin a gen hi: Sepai honte LALPA In, tempul ngei chu sakdaw kit a hitheina ding ah, In suangphûm lopi, a jawlneite thugen ma ma nanghaw tu’ni ngaithate hin, la khut uh hi’hat tau in.

¹⁰Tu’ma khan mihing â ding leh gancha â dingin nasep thaman a um puai; chuleh, a lut leh a pawtte â dinginle mêlma lak ah kipat bitna ding bangma a um diak pua’n, mitin a Invêngteu chiat tawh ka kidosak tâk ziakin.

¹¹Tu’hin vang a um nalai sunte chu tu’ma lam ah gual khan bawl kit ta pua’ng ka, ti hi sepai honte LALPA kamsuak ahi.

¹²Chamna thâichi chu tu’ hi’n tin; grep gui in ga sua ta’n tin, lei inle ga hun sua ta’n ah, van dâichîm inle hun chap no kit ta’n tin; tichun, a um nalai sunte chun zia zosia chu lua ta’n au.

¹³Aw Judah Inkuan leh Israel Inkuante haw, nam tin lak ah hânsia dong ah la umnau ah kipat khan hun hukdok ing ka tin, maljawlna bulpi’n hun siam ding ka hi tai. Lau him him kiu inla, la khutteu chu hi’hat tau in.

¹⁴Sepai honte LALPA‘n zia gual hin a gen ta’ngal a: La pu la pateu in ei suklungnat lai ua, a chung ua thil phalo bawl ding ka ngaitua taphot ka thul ngai lo gual ah khan,

¹⁵Jerusalem leh Judah Inkuante chung ah thilpha bawl piak kit ding ka ti ahi; lau him him kiu in; sepai honte LALPA chun a ti ahi.

¹⁶Ziate hi ahi la bawl ding uh chu: Mitin thudik kigen tua chiat in, la kotbul ua thudik ah vaihawm in, kichamna ding ngen bawl unla;

¹⁷midangte siatna dingle la lungthim un ngaitua kiu inla, zuau thu ah kitiamna ngaina kiu in; zia zosia hi ka thil huatte chu ahi, ti hi LALPA kamsuak chu ahi.

¹⁸Sepai honte LALPA‘n ka kiang ah thu a hun gen ah, zia gual hin a gen hi:

¹⁹Sepai honte LALPA‘n zia gual hin a gen hi: “Judah Inkuan ah mite â dingin, tha li’na anngawlna, tha nga’na anngawlna leh tha sagi’na anngawlna leh tha sawmna anngawlna nikhuate hi, kipakna leh limna, Judah Inkuante’n kipak tâng gual chiat ah a mat dingteu chu ahi; ziaziakchun, dikna leh kichamna chu thangai tau in”.

²⁰Zia gual ah hin sepai honte LALPA chun a tii: Khawpi tam tak ah chêng, mipite chu hung nalai intiu in;

²¹khawpi khat ah chêngte chu khawpi dang khat ah chia in, a kiang un, “Hung tiam un, ei hawle LALPA doisakna I chan theina ding uh leh, sepai honte LALPA chu hawl dingin chia ma tiam hitiu; keima chu a chia ka hi’ngal hi,” hun ti ta’n au.

²²Sepai honte LALPA hawl ding leh LALPA doisakna hawl dingin, mi tam tak leh nam hat takte Jerusalem ah chun hung in au.

²³Sepai honte LALPA chun zia gual hin a gen hi: Ziaphat chuleh, chitin leh pautin ah kipat pawsal sawmkhat jel in Judah mi pakhat a puanchual ah man in, “Hun zui ing kau, Pathian in a hun umpi hi ti ka he ngal un hun ti ta’n au,” ti hi.