Read Vaiphei MALAKI 1 Bible Online

MALAKI 1 - Vaiphei bible

MALAKI 1

¹Malaki kiang ah thu hung kigen Israelte â ding ah LALPA thu hung pawt chu:

²Ka hun hepi la hiu LALPA chun, a ti’n. Himaleh, nang un, “Bang ah khan a hem lei hepi?” lei tiu a. LALPA chun, “Esau kha Jakob suapipa hilo a hem? Ahi’n, Jakob ka hepi in,

³Esau vang ka hua ahi; tichun, a chênna tângte chu thawmhau tak in ka siam ta’n, a gochan chu si-alte chênna ding gamkeu in ka siam tai,” a ti’n.

⁴Edom mite chun, “Sukchakvai in um ta maleu hin, kile’kit hitiu in, mun sesate chu siampha kit hitiu,” ti ziang maleule, sepai honte LALPA chun, “Siampha kit ngei in au; himaleh, susia kit tho tho ing ka tin; amau chu gam phalo a hiu, ti ahi masia, kumkhua’n a chung un LALPA chu lungna zing ahi ngal a,” a la ti’n au.

⁵La mit ngei un zia chu mu’n la tiu in; tichun, “Israel gamgi pawlam tiang inle LALPA chu a nasa na e! ti ta’n lau,” a tia.

⁶Aw Thiampu, ka min simmawte haw, cha’n a pa a chawihoi in, suak in a pu a chawihoi hi; kei pa ka hileh chawihoi ah ka umna bang ahi em? Hotu ka hileh ja ah ka umna bang ahi em? ti’n sepaite LALPA‘n a hun dong la hiu. Nanghaw chun, “Bangti’n la min ka simmawu ah a hem?” la tiu a.

⁷Ka mâichâm ah khan an thianglo la hun lân uh kha lam. Nang un la, “Bangti’n em ka hun sukbuak uh?” la tiu a. LALPA mâichâm hi musit thei dingin la ngaituau a.

⁸Kithoina ding ah gancha mitthûm la hun lat uh hi la bawl dik nau em? A kengbai a hem, a hisêl lo a hem la hun lat sek uh hi bawlkhial kisa lo la hiu em? Zia gual te chu la gam vaihawmteu vapia ma tiam un; ziate chu kipakpi ma ma in, doisakna a hun pena ding awm? sepai honte LALPA chun a ti ahi.

⁹Tu’hin, Pathian doisakna chu I chan ua, a ja’ngaina I don theina ding un don hitiu. A bawlkhial chu nanghaw thiampute ngei hi la hi ngal un. Nanghaw lak ah kua la hiu em a doisakna chang ding chu, sepai honte LALPA chun a ti ahi.

¹⁰Nanghaw lak ah mi pakhat bêk ka mâichâm ah a thawn mai ah mei sêm ahilo’na ding ah, ka tempul kotkhak vakhâk ding um maileu chin aw! La chung ua kipakna him ka nei pua’n, la khut ua kipat thillat chu pom him him pua’ng ka, sepai honte LALPA chun a ti ahi.

¹¹Ni suakna lam ah pat a tumna tiang in ka min namtin lak in a thang ta ngal a; muntin ah ka min in gimtui leh thillat thiangtho chu lat ahi ngal a; namtin lak in ka min chu a lopi ngal a, sepai honte LALPA chun a ti ahi.

¹²Himaleh, nang un LALPA dawkan hi sukbuak a hita’n, zia tak ah thâiga thillatte chule bangmalo mai mai ahi tai, la tiu hin mâichâm chu la subuak uh ahi.

¹³“Ningtelsak ahi,” la tiu a, la nâk uh la nîlsak ui, sepai honte LALPA chun a ti ahi. Thagum ah la lâkpiakteu, a kengbai a hem, a hisêl lo a hem haw chu la hun lân ta mai un! La khut ua kipat in zia gual thilte chu a la pom ding ka hia hem? Sepai honte LALPA chun a ti ahi.

¹⁴A gan hon lakah a chal tuai mâmpha piak ding ah kitiam zosa hi ta’ngal ah, LALPA kiang ah demkâi hun lân, mi zuauthei chu hânsia law in um ta hen; keima hi Lal lopi tak ka hi’n ka min le namtin lak ah ja ah um ahi ngal ah, sepai honte LALPA chun a ti ahi.