Read Vaiphei MATTHAI 1 Bible Online

MATTHAI 1 - Vaiphei bible

MATTHAI 1

¹Abraham suan, David suan ah Messiah kiti, Jesu hung pian dan chu zia gual hi ahi:

²Abraham chu Isak pa ahi’n; Isak chu Jakob pa ahi’n; Jakob in Judah leh a suapite a hing a;

³Judah in Tamar ah kipat in Perez tawh Zerah a hing hi; Perez chu Hezron pa ahi’n, Hezron chu Aram pa ahi’n;

⁴Aram chu Amminadab pa ahi’n; Amminadab chu Nahshon pa ahi’n; Nahshon chu Salmon pa ahi’n;

⁵Salmon in Rahab ah kipat in Boaz a hing in; Boaz in Ruth ah kipat in Obed a hing in; Obed chu Jesse pa ahi’n;

⁶Jesse chu lengpa David pa ahi’n; chun, David chu Uria ji tawh a chau Solomon pa ahi.

⁷Solomon chu Rehoboam pa ahi’n; Rehoboam chu Abijah pa ahi’n, Abijah chu Asaph pa ahi.

⁸Asaph chu Jehoshaphat pa ahi’n; Jehoshaphat chu Joram pa ahi’n; Joram chu Uzzia pa ahi’n;

⁹Uzzia chu Jotham pa ahi’n; Jotham chu Ahaz pa ahi’n; Ahaz chu Hezekiah pa ahi’n;

¹⁰Hezekiah chu Manasseh pa ahi’n; Manasseh chu Amos pa ahi’n; Amos chu Josia pa ahi.

¹¹Babulon lam ah sal ah a pui lai ua khan Josia in Jekoniah leh a unaute a hing hi.

¹²Babulon lam ah sal ah a pui nung un Jekoniah in Salathiel a hing a; Salathiel chu Zerubbabel pa ahi’n;

¹³Zerubbabel chu Abiud pa ahi’n; Abiud chu Eliakim pa ahi’n; Eliakim chu Azor pa ahi’n;

¹⁴Azor chu Zadok pa ahi’n; Zadok chu Akhim pa ahi’n; Akhim chu Eliud pa ahi’n;

¹⁵Eliud chu Eleazar pa ahi’n; Eleazar chu Matthan pa ahi’n; Matthan chu Jakob pa ahi’n;

¹⁶Jakob chu Joseph pa ahi’n, zia Joseph chu Mari pawsal chu ahi. Zia Mari chu Messiah kiti, Jesu hung pianna chu ahi.

¹⁷Chutichun, Abraham ah kipat David tiang ah suan zosia chu suan sawm leh li ahi’n; David ah kipat Babulon lam ah sal ah pui mang ah a um tiang ua khan, suan sawm leh li ma ahi kit a; Babulon lam ah sal ah a pui mang ua kipat Messiah tiang chu suan sawm leh li ma ahi.

¹⁸Messiah Jesu hung pian dan chu zia gual hi ahi. A nu Mari chu Joseph tawh kicheng ding ah kikhâm lai; a um khawm mau in, Thagau Thiangtho in nau a vopsak hi ti a hung he tau a;

¹⁹A pawsal Joseph chu midik tak ahi’n, sukmualpho a nuam pua’n, a gûk ah haisan a gaw tai.

²⁰Himaleh, zia thu chu a ngaitua lai in, a mang ah LALPA vansawlchâk a kiangin a hung kilâk a: “Joseph, David Chapa, Mari chu kichenpi lau kin; a nauvop chu Thagau Thiangtho vopsak ahi.

²¹Chapa hing intin, a min in Jesu la sak ding ahi; ama chun a mite a gitlonau ah kipat hukdok ding ahi ngal in,” a ti’n.

²²Zia hi LALPA‘n a jawlneite mang ah a thugente kha a guitunna ding ahi:

²³“Nungak thiangtho chu gâi intin, Chapa hing intin, a min in Immanuel sa’n au” zia chu, “I kiang un Pathian a um hi,” ti’na ahi.

²⁴Joseph ipmu chu a thaw phatin, LALPA vansawlchâk in a kiang ah thu a piak gual in, ama chu a kichenpi ta’n;

²⁵ahi’n la, chapa a nei masia chu a luppi puai. Chuleh, a min in Jesu a sak tai.