Read Vaiphei MATTHAI 11 Bible Online

MATTHAI 11 - Vaiphei bible

MATTHAI 11

¹Jesu chun, a nungzui sawm leh nite kiang ah zia thute a hil zaw phat ah chun, zia mun chu nusia in, a kiang nai tuam khuate chun thugen leh thuhil in a vâk vêl vêl a.

²Chuleh, Johan in suangkul ah kipat in, Khrista nasepna chanchin thuthang chu a la hia’n, tichun, ama zilsakte pani a hun sawl a;

³amau chun a kiang in, “A hung dingpa chu la hi em? Midang a la ngak nalai ding ka hiu em leh?” ti a vagensak a.

⁴Jesu’n a dawnhu a, “Chiau inla, thil la muteu leh la hiatteu hi Johan kiang in vagen tau in.

⁵Mitthûmte mit a vâk ta hen, kengbaite keng in a chia tau in; phâkte a thiangtho tau in, bengngongte’nle khua a he tau hi; mithite kaithaw in a um tau in, gentheite’nle chanchinpha kigen a he tau hi.

⁶Kuale keima chung ah ginlelna neilo chu a vangphai, ti’n hil un,” a tia.

⁷Amau chu a chia kit phat un, Jesu’n mipite kiang in Johan chung châng thu a hun gen a, aleh, gamthip ah khan bang en nuam ah chia la hiu em? Luangdua hui in a mûtlîng kha maw?

⁸Aleh, bang mu nuam pen ah chia la hiu em? Puannem sil maw? Puannemsilte chu leng In in ah um sek ei veu!

⁹Aleh, bang en nuam mawng mawng ah chia la hiu em? Jawlnei kha maw? Ahi, ka hil la hiu, jawlnei sâng ah lopi zaw zia hin a um hi.

¹⁰Ama chungchâng thu ah chun zia gual ah hin a la kizik hi: “En tiam in ka sawlchâk chu la ma-âng in ka sawl a, ama chun la ma-âng in la lampi a la siamtup ding ahi, ti in”.

¹¹Titakzet in ka hil la hiu, numei hin lak in Baptispa Johan sâng ah lopi zaw ding a um puai; himaleh, van-gam ah mineu penle ama sâng in a lopi zawu hi.

¹²Baptispa Johan in thu a gen ah kipat khan tu’tiang hin van-gam chun pawngbawlna a tuak in, a pawngbawlte ma ma chun a pawng lâk sek ui.

¹³Jawlneite zosia leh Dan thu chun Johan hun tiang khan thu a gen a.

¹⁴Tichun, zia hi la taksan thei uh chun, zia hi Elijah, a hung dingpa chu ahi tai.

¹⁵Kuale hetna ding ah nakhang nei chun he tau hen.

¹⁶Aleh, tu’lai khangthakte hi bang tawh ka tekhin ta diam? Naupang hon kaithial mun khat ah kichukhawm ah, lawi khat leh lawi khat kiko khum tua ah:

¹⁷“Lilu ka hun mût piak ua leh le lâm na châng helo, sûnna La ka sak piak ua leh le kâna châng he diak lo, ti’te gual kha a hiu”.

¹⁸Johan a hung ah, a ne pua’n dawnle a dawn diak puai; ahi’n, ama chu “Thithajawl ahi,” la tiu a.

¹⁹Mihing Chapa a hung ah, a nêk leh a dawn a muu in, “Mi gawlhatpa, uain haipa, sedawlte leh migilote gualpa, a tiu a. Himaleh, pilna chu a nasep in a kilang hi,” ti in.

²⁰Chun, Jesu’n thilmak tam tak a bawlna munte chun, a gitlonau a haisan lo ziak un zia khuate chu a vau ta’n:

²¹Korazin, la chung a gik hi! Bethsaida, la chung a gik hi! Nangmau mit mu ah thilmak kibawlte kha, Tura leh Sidon khua’ kibawl hita ma leh, ma tak ah khan saidip puan sil in, vut lak ah kichu’n a gitlo uh haisan ta’n au.

²²Himaleh, ka hil la hiu, vaihawm ni chun nang uh thok ding sâng in Tura leh Sidon khawte thok ding chu nêp zaw’n a.

²³Aleh, nang Kapernaum, van chan ah choisa’n ding ah kingai la hem? Mithi khua tiang ah nawthâk ah um zaw ding la hi. La sung ah thilmak kibawlte kha Sodom khua a la kibawl hita leh, tuni tiang hinle ala um nalai kha ding uh hiven!

²⁴Himaleh, ka hil la hiu, vaihawm ni chun nangmau thok ding sâng in, Sodom khawte thok ding chu nêp zaw’n a, ti’n a gen a.

²⁵Ziazaw chun, Jesu’n a pa kiang in, “Aw he Pa, lei leh van LALPA, mi pilte leh mi thiamte kiang in la thu hi la îm ah, mi mawlte kiang ah la gen zawk ziakin ka kipak hi.

²⁶Ahi, he Pa, zia chu nang in la thu leh la dawi gual ah la bawl chu ahi,” a tia.

²⁷Tu’hin, ka Pa chun thil bangkim ei kolsak hi. Pa longal in kuama’n Chapa hi a hepuau in: Chapa tilo ngal kuama’n Pa chu a he diak puau hi. Ziaziakchun, chapa’n a taklatnate bep in Pa chu a hiau hi.

²⁸Nanghaw sêmgim leh puakgik paw zosiate haw, ka kiang ah hung un, keima’n a la chawldam sak ing ka.

²⁹Ka ngawngkol hung puau in la, ka kiang in zil un: Lungthim ah nunnem leh kingaitawm ka hi; tichun, la thagau â ding un chawldamna mu’n lau.

³⁰Ka ngawngkol a nuam in, ka puak le a jang hi, a tia.