Read Vaiphei MATTHAI 13 Bible Online

MATTHAI 13 - Vaiphei bible

MATTHAI 13

¹Zia ni ma ma chun, Jesu chu In ah kipat chun a pawt a, Dil pâm in a kichu ta’n;

²a kiang in mipi tam tak a hung khawm un; kuang chung in a kaldok ah, a kichu; mipi zosia chu tiaupho ah chun a ding un.

³Tekhinthu’n thu tam tak a kiang un a gen a, “Ngai tiam un, buchithe’pa buchi the’ dingin a chia in.

⁴A the’ lai in khenkhat chu lampi pâm in a kia’, vachate a hung ua, a hung luak zo tau hi.

⁵A khenkhat chu suangsi lei ah a kia’; leipha tam lona mun leh, leipha a sâ lo ziakin, a hung kekdok pai ziang a.

⁶Himaleh, nisa a hung sat phatin a lei a keu ah, a zung a sau lo ziak in a vuai tai.

⁷Chuleh, khenkhat chu hampa lingnei lak in a kia’, hampa lingnei chu a hung khang ah, a hun depmang tai.

⁸Chun, khenkhatte chu leiphatna mun in a kia’, a hung ga ah; a khen khat chu ale’ za khat in, a khenkhat chu ale’ sawmguk in, a khen khat chu ale’ sawmthum in ga a hun sua tai.

⁹Kuale hetna ding ah nakhang nei chun he tau hen,” a tia.

¹⁰A nungzuite chu a kiang in a hung ua, Bangatia, ziate kiang ah hin tekhinthu ah la gen a hem? a hung tiu a.

¹¹Ama’n a kiang un, van-gam thugûk hettheina chu nang uh kiang ah piak ahi’n, amau kiang ah vang piak a hinai puai.

¹²Kuale, a nei tam chu piak belap hi’ntin, tam tak nei in a; himaleh, a neilo chu a neisunle lâkpiak hi’n a.

¹³A kiang ua tekhinthu ka genna ziak chu; munapi’nle a mu chian puau ah, bil ah henapi’nle a hechian ngai puau in, hetle a hethiam puau hi.

¹⁴Isai in a chung thuu a gen kha a guitunna ahi: La nakhang un he ngei in la tiu in, himaleh, hethiam pua’n lau; la mit un mu’n la tiu in, himaleh, mu chian diak pua’n lau.

¹⁵Zia mite lungchang hi a ngong zo ta’n, a bengteule a ngong zo tai, a mit uh a sîng un, achutiloleh, a mit un en in mu kha’n tiu in, a bil un he kha’n au; a lungthim un hethiam intiu in; hung kihei kik kha’n tiu in; amau a la hi’dam kha’ng ka, a ti kha.

¹⁶Nanghaw mit vang a hampha ahi; la nakhang uh le a hampha ahi, a hiat thei ziakin.

¹⁷Titakzet in ka hil la hiu, jawlnei tam takte leh midik tam takte’n, la thil muteu hi mu nuam in a la thîl ua, himaleh, a la mu ta puau hi; la thil hiatteu hile het a nuam un, himaleh, a la he man ta puau hi.

¹⁸Ziaziakchun, zia buchi the’ tekhinthu hi he tau in.

¹⁹Kuale, gam thu chu bil ah he’, hethiam lo chu buchi lampi pâm ah ketha tawhbang ahi. Migilopa chu a hung ah, amau ah chi kitu chu a hung lâkmang piak sek hi.

²⁰Chuleh, buchi suangsi lei ah kekte chu, thu kigen chu a het phat ah kipak tak ah pom ngal;

²¹himaleh, a lunggil tak ah zung thâksak lo ah, sawt umsak zolote, thu ziak ah sukgentheina bang, haksatna bang a hung um tak leh pûk ziang sekte hi a hiu.

²²Chuleh, hampa lingnei lak ah kekte chu: Thu chu he tangal ah, khawvel lungkhamna leh hausaknate etlâna ziak ah, a hetnau suktâk ah um ah ga theilo te chu a hiu.

²³Chuleh, lei phatna kekte chu a hiu leh, thu chu he ah, hethiam ah, mang ngalte hi a hiu; ziate chu ale’ zakhatte, ale’ sawmgukte, ale’ sawmthumte’n a hung ga sek ui, a tia.

²⁴Tekhinthu dang khat a gen kit ah: Van-gam chu mi pakhat, a lou ah chipha the’ gual chu ahi.

²⁵Himaleh, mite i-mut kâl in a mêlma a hung ah, a bu lak ah chun bulêm a la the’ piak ah, a chia mang tai.

²⁶A bu chu a hung khanlet phatin, a hung ga ta’n; a bulêm chule a hung kilang tai.

²⁷Louneipa suakte chu a hung un: He pu, la lou ah khan chi pha ngawn la the’ hilo a hem? Zia bulêmte hi khoi ah pat hung kipan a hiu em? a hung tiu a.

²⁸Ama chun a kiang un, Zia chu mêlma’n a la the’ a hita chu, a tia. Aleh, a suakte chun a kiang in, Aleh vachia’ng ka tiu in, vabotdok ziang ing kau aw, a tiu a.

²⁹Himaleh, ama chun, Hilo e, bulêmte la bawdawna lam un, butakte le botdok kha’n lau.

³⁰Bulâk hun masia khati khan um khawmsak tadi mai un: Bulâk hun tak leh bulate kiang in, “Bulêmte kha lakhawm masau inla, hâl dingin a lom lom in kân un: Ziazaw tak chuleh butakte chu bupang ah sunglut un, ti na’ng ka, a tia,” ti’n a gen a.

³¹Tekhinthu dang a kiang un a gen kit a: Van-gam chu mi pakhat in ankam mu, a loulai ah a the’ gual chu ahi;

³²zia chu thâichi lak lak ah neupen himaleh, a hung khandaw phatin, hampa lak lak ah a lianpen a hung hita’n, thing a hung suak tai; tichun, vachate a hung ua, a bâkte chun a hung chêng tau hi, a tia.

³³Tekhinthu dang pakhat a gen kit a: Van-gam chu thawi gual a hi: Zia chu numei khat in a la, changbuang te’na a dim thum lak in a hel ah, a lêng ah a zen suak masia a koi gual hi ahi, a tia.

³⁴Zia thute zosia hi Jesu’n mipite kiang in tekhinthu’n a gen a; tekhinthu lo in a kiang un bangma a gen puai.

³⁵Jawlnei in zia thu a la gen hi a guitunna ahi: Tekhinthu gen na’n ka kam ka’ng ka tin, khawvel kisiam lim ah kipat, thil a la kisêlgute chu gendok ing ka, a ti kha.

³⁶Ziaphatchun, Jesu’n mipite a nusia ah, In sung ah a lut ah, a nungzuite a kiang in a hung un, “Lou ah bulêm tekhinthu kha ei hilchian in,” a hung tiu a.

³⁷Ama chun, Chipha the’pa kha Mihing Chapa ahi’n;

³⁸lou chu khawvel ahi; chiphate chu gam chate a hiu in; bulêmte chu migilo chate a hiu hi.

³⁹Mêlma a la the’pa chu diabol ahi’n, bulâk hun chu khawvel tawpna chu ahi; a âtte chu vansawlchâkte a hiu.

⁴⁰Tichun, bulêmte a lakhawm ua mei in a hâl ui; zia gual chun khawvel tawp hun leh um ding ahi.

⁴¹Mihing Chapa chun a vansawlchâkte sawldok intin, a gam ah kipat in migilote leh mi gitlosakte chu hun lakhawm intiu in;

⁴²hâltuina mei ah pai in au; zia tak ah chun kâ leh hagial um ta’n a.

⁴³Ziaphat chuleh, midikte chu a Pau gam ah nisa gual in vâk ta’n au. Kuale hetna ding ah nakhang nei chun he tau hen, a tia.

⁴⁴Van gam chu lou ah go phumguk gual ahi kit hi: Zia chu, min a mu’n, a sêlgu, kipak tak in a chia ah, a nei zosia zuak in zia lou chu a chaw tai.

⁴⁵Van gam chu sumkawlvei mi, suang mantam hawlpa gual chu ahi kit hi;

⁴⁶ama’n suang mantam man pha tak khat a vamu’n, a chia ah, a nei zosia zuak in a chaw tai.

⁴⁷Chuleh, van-gam chu tuisuagiat ah lên kisep, sanga chitin khu’khum gual chu ahi kit hi.

⁴⁸Zia chu a dim tak leh lui pâm ah a kaidok un, a kichuu ah, sanga takte chu a bawm ah a khum un, a taklote chu a paimang ui.

⁴⁹Khawvel tawp hun tak leh le zia gual chu hi’n a; vansawlchâkte hung intiu in, mi phate lak ah kipat chun mi phalote hun zendok ding a hiu.

⁵⁰Haltuina mei ah chun pai intiu in, zia tak ah chun kâ leh hagial chu um ta’n a, a tia.

⁵¹Jesu’n a kiang un, Zia thute chu la hethiam nau em? a tia. Amau in, ka hethiam tau hi, ti’n a dawnhuu a.

⁵²Ama chun a kiang un, Chuti ahileh, lekhazik ah pang hingal ah van-gam thu ah nungzui a hung um tapo chu, Inneipa a gobawm ah thil lui leh thil thak suadok sekpa gual chu ahi, a tia.

⁵³Jesu’n, zia tekhinthute chu a gen zaw phatin, zia mun chu a nusia tai.

⁵⁴Ama umna gam lam a hung tun phat ah chun, a kikhopna In un thu a vahil ah; a thu ngaitha zosia chun mak a sa ma mau a: Zia pa hin zia pilna leh zia gual thil lopi takte a hi’theina hi khoi ah kipat a mu a hem?

⁵⁵Zia hi thingbawl thiampa chapa kha hilo a hem? A nu le Mari kiti kha hilo a hem? Chuleh, a suapite le Jakob, Joseph Simon leh Juda kitite kha hilo a hiu em?

⁵⁶A suapinute le I kiang un a um sik sek uh hilo a hem? Khoi ah kipat zia thilte zosia hi a mu ahi diam? a tiu a;

⁵⁷tichun, a chung ah a lung himaw tau a; himaleh, Jesu’n a kiang un, Jawlnei chu ama gam leh a In lam ti bep lo ah chun chawihoi lo in a um ngai puau hi, a tia.

⁵⁸A ginlo ziak un zia tak ah chun thil thupi dang bangma a bawl ta puai.