Read Vaiphei MATTHAI 16 Bible Online

MATTHAI 16 - Vaiphei bible

MATTHAI 16

¹Pharisaite leh Sadukaite a hung un, Jesu ze-etna’n van ah kipat tepte’na hun etsak dingin a don un.

²Himaleh, ama’n a kiang un, nitâk lam ah kawl a hung san tak leh, van san a suak hi, khua pha ding ei tai, la tiu a.

³Chuleh, jingkal lam ah kawl a hung san ah, a hung thim leh, van san a suak in a hung thim hi, khua sia ding ahi, la ti kit sek ui. Aw nanghaw, mi phalêmte haw, van ah kipat in khua umdan ding la helawk thei ngal un; ahiziakin zia hun teptênate hi la hethei puau hi.

⁴Tu’lai khangthak gilo leh thanghuaite hin, teptena la hawl uh ahi maw; himaleh, Jonah teptêna longal teptena dang him him piak hipua’n a, a tia. Amau chu nusia in, a chia mang san tai.

⁵Dil gâl langkhat lam ah a nungzuite a hung tun phat un, vaithum puak ding a hemil un.

⁶Jesu’n a kiang un, Pharisaite leh Sadukaite thawi lak in kivêng un, a tia.

⁷Amau chun, vaithum I puak lo ziak uh hiding ahi, ti’n a kingaituau a.

⁸Jesu’n a kihonau chu a he, a kiang un, Aw ginna tawmte haw, vaithum neilo thu ah bang gen la hiu em?

⁹Tuchan hinle hethiam nailo la hiu maw? Mipi sang nga leh vaithum panga chanchin kha hepha talo maw? La bawm luak dim jat uh kha la hepha ta puau em?

¹⁰Mi sang li leh vaithum sagi leh la bawm luak dim jat uh kha le?

¹¹Vaithum thu him him ka gen puai, Pharisaite leh Sadukaite thawi lak in kivêng un, ka ti zawk ahi ti bangatia he theilo la hiu em? a tia.

¹²Ziaphatchun, vaithum thawi hilo in, Pharisaite leh Sadukaite thuhilna lak ah kivêng dingin a ti’na ahi zawi ti chu, a hun he tau a.

¹³Jesu chu Kaisaria Philippi gam a hung tun phatin, a nungzuite kiang in, “Mihing Chapa hi mite’n kua ahi ei tiu em?” ti’n a dong a.

¹⁴Amau chun, khenkhat in Baptispa Johan ahi, a hun tiu a, khenkhat in, Elijah ahi a tiu hi; mi dangte chun, Jeremiah a hem, jawlnei kua a hem khat hi’n a, a hun tiu, a tiu a.

¹⁵Ama’n a kiang un, aleh, nang un kua ahi lei tiu em? a tia.

¹⁶Simon Peter in a dawnhu a, Messiah, Pathian Hing Chapa chu la hi, a tia.

¹⁷Jesu’n a kiang in, Simon, Jonah Chapa, la hamphai! Taksa leh thisan in a hun hiatsak a hipua’n, van ah ka Pa’n a hun hiatsak ahi zawi.

¹⁸Nang Peter la hi, ti ka hun hil belap hi; ahi’n, zia suangpi chung ah hin ka kochuam chu lem ing ka tin; mithi kul kotkhak chun lang zo pua’n a.

¹⁹Van-gam chabi chu la khut in pia’ng ka tin, lei ah la kân chu van ah le kân hi’ntin; lei ah la thap chu van ah le thap hi’n a, a tia.

²⁰Chuleh, a nungzuite kiang ah chun, ama chu Messiah (Khrista) ahi ti kuama hil lo dingin a khâm chak kei tai.

²¹Zia hun ah kipat chun, Jesu’n a nungzuite kiang in Jerusalem ah a chia ding dan, upate, thiampu liante leh, lekhazikte khut ah haksatna tam tak a thok ding dante, tha ah a um ding dante, a ni thum ni’ kaithaw ah a um kit ding dante chu a hilpan tai.

²²Ziaphatchun, Peter in ama chu pui chuam in a vau a, LALPA, zia gual chu la chung in tung ki’hen, ti’n a gen a.

²³Jesu chu a kihei ah, Peter kiang in, Setan, ka nung ah chia in! Kei â dingin pûkna la hi; Pathian thilte ngaitua lo in mihing thilte la ngaitua ahi, a tia.

²⁴Jesu’n a nungzuite kiang in, Kua’n le ei zui a nop leh ama kihemil in, ama kros kiput in ei zui hen.

²⁵Kuale a hinna humbit gua chun chân intin; kuale keima ziak ah a hinna chân chun humbit in a.

²⁶Min khawvel hi a pum in nei hen la, a hinna chân leh, ama â dingin bang a phachuam diam? Ahiloleh, min a hinna sik in bang a pia diam? a tia.

²⁷Mihing Chapa hi a vansawlchâkte tawh, Pa lopina kithuam ah a hung tak leh, mitin in a nasep dungzui chiat un hun dit kit ding ahi.

²⁸Titakzet in ka hil la hiu, zia tak ah dingte lak ah hin, Mihing Chapa a Lal gam ah hung a mu masiau thina teplo ding a um ui, a tia.