Read Vaiphei MATTHAI 19 Bible Online

MATTHAI 19 - Vaiphei bible

MATTHAI 19

¹Jesu’n zia thute chu a gen zaw in, Galili gam ah kipat in a pawt ah, Jordan luigâl lam Judea gam chu a hung tung a.

²Zia tak ah chun mipi tam tak in a hun zui un, amau chule a la hi’dam tai.

³Pharisaite lak ah mi khenkhat a hung ua, ama ze-etna’n, Bang ziak pen in min a ji a nol uh thiang em? a hung tiu a.

⁴Ama chun a kiang un, a lim a kipat amau siampa chun numei leh pawsal in a siam a;

⁵Ziaziakchun, pawsal in a nu leh pa nusia in, a ji chu jawm ta’n tin, panite chu pumkhat hung hita’n au, ti hi la sim kha puau em?

⁶Pani a hita puau ah, taksa pumkhat ahi zaw tau hi. Ziaziakchun, Pathian in a zopkhawm tâk chu mihing in khen ki’hen, a tia.

⁷Amau chun, a kiang in, ahileh, bangtidan ah Mosi khan kinolna lekha piak ah nol ding ahi, ti thu pia a hem? a tiu a.

⁸Ama chun a kiang un, Mosi’n la lung uh a tâk ziakin ahi la jiteu nol a phal; himaleh, a lim in zia gual chu ahi puai.

⁹Ken chu ka ti la hiu, Min a ji chu midang tawh tatsualna ziak le hilo ah a nol ah, midang a kichenpi kit ngal leh ângkawm ahi’n, mi nolsa nei chule ângkawm ahi, a tia.

¹⁰A nungzuite’n a kiang in, pawsal leh a ji chung thu zia gual chu ahileh, kichen hi phalo ahi chu, a hun tiu a.

¹¹Himaleh, ama chun, zia thu chu mi zosia’n zui thei pua’n au, piak chuam ah umte â ding bep ahi.

¹²Mitilge, a nuteu gilpi sung ah kipat zia gual ah piang him te chu a um un; mihing khut ah gete le a um ui; van-gam ziak ah kiget kawm le a um ui. Kuale a pom thei in pom mai uh hen, a tia.

¹³A chung ua khut a la ngak ah, a pauchap piak dingin naupangte a hun pui un; ziate chu a nungzuite’n a la gai tau a.

¹⁴Himaleh, Jesu’n a het phat in, “Naupangte kha ka kiang in hung sak unla, a la zada kiu in; van-gam chu zia tawhbang mite â ding chu a hingal in,” a tia.

¹⁵Tichun, a chung un khut a la nga, ziazaw chun a chia mang tai.

¹⁶Mi pakhat a kiang in a hung ah, “Hotupa, kumtuang hinna ka nei theina dingin bang thilpha ka bawl diam?” ti’n a hung dong a.

¹⁷Ama’n a kiang in, bangatileh, a pha ei dong la hem? A pha pakhat bep a um a, zia chu Pathian ahi; hinna lut la nop leh thupiakte kha zui in, a tia.

¹⁸Ama chun, a khoipen hi mawm? a tia. Jesu’n a kiang in, Tual la tha ding ahi puai, âng la kawm ding ahi puai, la guk ding ahi puai, dik lo tak ah hetpi ah la pan ding ahi puai.

¹⁹La nu leh pa le ja inla, nangma la kihepi gual in la vengte le hepi in, tite hi, a tia.

²⁰Tangval chun a kiang in, zia haw hi ka neu lai ah kipat ka la zop ahi tai, bang a kivât nalai em? a tia.

²¹Jesu’n a kiang in, “Pha bukim ah um la nop chun chia inla, la nei zosia zuak inla, migentheite kiang in pia’n, zia tak chuleh van ah go nei inla: Chuleh, hung inla ei zui in,” a tia.

²²Zia tangval chu sum tam tak nei mi ahiziak in, zia thu chu a het phatin lungkham tak in a chia mang tai.

²³Jesu’n a nungzuite kiang in, “Titakzet in ka hil la hiu, mi hausa van-gam ah lut ding chu a haksa ahi.

²⁴Zia hi ka hun hil kit hi: Mi hausa Pathian gam a lut sâng in sangawngsau pin bil hawm ah a lutthen a bailam zawi,” a tia.

²⁵Zia chu a nungzuite’n a het phat un a lungkham tau a, aleh, kua hukdam in um zo ding a hem? a tiu a.

²⁶Jesu’n amau chu a en a, “Zia chu mihing â dingin thil hitheilo a hi; himaleh, Pathian â dingin bangkim ahithei hi,” a tia.

²⁷Peter in a hun dawnhu a, ngaitia, kei un bangkim nusia in ka hun zui un; bang ka mu diam uh le? a tia.

²⁸Jesu’n a kiang un, “Titakzet in ka hil la hiu, Thil zosia siamthakna mun ah Mihing chapa a lopina Lal chutpha a chut tak leh nanghaw ei zuite hi, Israel nam sawm leh nite vaihawm piak dingin, lalchutpha sawm leh ni ah chu ding la hiu.

²⁹Kuale ka min ziak ah In a hem, a suapipa a hem, suapinu a hem, a nu a hem, a pa a hem, a ji a hem, a cha a hem, a gam a hem nusia chun, a le, za’n mu’n tiu in, kumtuang hinna chang in au.

³⁰A masa tam tak le hung nunung intiu in, a nunung tam tak le hung masa ding a hiu,” a tia.