Read Vaiphei MATTHAI 2 Bible Online

MATTHAI 2 - Vaiphei bible

MATTHAI 2

¹Lengpa Herod hun lai ah, Judea gam Beth-lehem khua Jesu a hung pian in, sualam ah mipilte Jerusalem ah a hung un:

²“Khoi ah a hem Judate lengpa hung piang chu? Sualam ah a aksi chu ka muu ah, ama chibai bûk ding ah hung ka hiu,” a tiu a.

³Lengpa Herod in zia chu a het phat in a lauthawng ta’n, Jerusalem ah mi zosia le a lauthawng tau hi.

⁴Tichun, thiampu liante leh lekhazikte zosia a ko khawm ah, Messiah pianna ding mun chu a dong ta’n.

⁵Amau chun a kiang in, “Judai gam Beth-lehem ah, jawlnei in zia gual hin a la zik hi:

⁶‘Aw, nang Judai gam ah Beth-lehem khua, Judai gam ah thuneite lak in neupen pua’n la; la sung ah kipat in vaihawmpa hung pawt ding ahi ngal in, ka mi Israelte chingpa ding chu,’ ti hi,” a tiu a.

⁷Zia nung ah chun Herod in a gûk in mipilte chu a ko ah, aksi kilat hun tak chu a dongdok tai.

⁸Amau chu Beth-lehem khua lam in a sawl a, “Chiau inla, nausen chu gunchu tak in hun hawldok un, la mu phât uh leh ei hun hil un, keima’n le ama chu chibai ka bûk theina dingin,” a tia.

⁹Lengpa thu chu a het phat un a chia tau a; sualam ah aksi a muu kha nausen umna chung jawn a tun ah, a din masang sia a malam un a chia pek tai.

¹⁰Aksi a kichawl tai ti a mu phât un a kipak ma mau a.

¹¹In sung ah a lut ua, a nu Mari tawh nausen chu a muu a; bokkhup in chibai a bûk ua, a gobawmteu hong in, kipakna thilpiak sana, begaw leh murra a piau a;

¹²Chuleh, Herod kiang ah chia kit talo dingin a mang ua hil ah a um ziak un, lampi chuam in a gam lam un a chia kit tau hi.

¹³A chia mang nung un, LALPA vansawlchâk chu Joseph mang in a hung kilâk a, “Tho inla, nausen leh a nu pui inla, Aigupta gam ah jam inla, ka hun hil kit masia zia tak ah chun um zing un; Herod in nausen hi’mangthai dingin hawl ding ahi,” a tia.

¹⁴Tichun, Joseph chu a tho ah, jan kâl in nausen leh a nu chu a pui ah, Aigupta lam a zuan tau hi.

¹⁵Herod thi masangsia zia tak ah chun a um zing tau hi. Zia chu LALPA‘n jawlnei kam ah, “Ka chapa chu Aigupta gam ah kipat ka kodok a,” a ti kha a guitunna dingin.

¹⁶Herod in, Mipilte chun ama a lepbawl uh ahi, ti a hetdok phatin a lungna ta ma ma a. Tichun, mi a sawl ah, aksi kilat lai ah mipilte thu a dotna hun dungzui in, Beth-lehem leh a kîmvêl ah naupang kum ni ah pat a nuai lam zosia chu a that tai.

¹⁷Tichun, jawlnei Jeremiah kam ah thu a la gen hi a hung guitung tai:

¹⁸“Ramah khua huvau a hiau a, kapte, mithi ngai ah kiu vong vongte; Rakhel chun a chate a kâ in, a um tâk lo ziak un a thamuang thei puai,” ti hi.

¹⁹Herod chu a thi phatin, LALPA vansawlchâk chu Aigupta gam ah Joseph mang in a vakilâk a.

²⁰“Tho inla, nausen leh a nu chu Israel gam ah pui kit ta’n; nausen tha gawte kha a thi tau hi,” a tia.

²¹Tichun, Joseph chu a kipan a, nausen leh a nu chu Israel gam zuan in a pui to tai.

²²Himaleh, Arkelaus, a pa Herod thasâng in Judai gam ah leng in a pang hi ti a het phat in, zia tak ah chia chu a lau a. Chun, a mang ah hil ah a um gual in, Galili lam in a chia zaw tai.

²³Chun, khua pakhat Nazareth a tiu ah chun a chêng tai: “Ama chu Nazareth mi ti’n au,” ti ah jawlneite kam ah kigen kha a guitunna dingin.