Read Vaiphei MATTHAI 21 Bible Online

MATTHAI 21 - Vaiphei bible

MATTHAI 21

¹Jerusalem a tun ding kuan un Bethphage khua, Oliv tâng chu a hung tung tau a; Jesu’n a nungzuite pani a sawl ah, a kiang un:

²La ma zawn ua khua sawn vachiau inla, zia tak ah chun sabiltung pakhat kihen, a kiang ah a no um vamu’n la tiu in; ziate chu hun sût unla, ka kiang in hun kai un.

³Ahi’n, min a hun dot ua leh, LALPA‘n a doina a um ah hun koi kit pai ding ahi, tileuchin hun kaisak ziang in au, a tia.

⁴Zia hi jawlneite mang ah a la kigen kha a guitunna ding ahi:

⁵Zion chanu kiang in: En in, la lengpa chu kingaitawm tak in, sabiltung chung ah chuang in, sabiltungno ngei chung ah chuang in, a hung hi, ti’n la hil un, ti thu kha, a tia.

⁶A nungzuite a vachiau a, Jesu’n thu a piak gual ah chun a vahiu a;

⁷sabiltung leh a no chu a hun kai un, a chung un a puanteu a phau ah, a chung ah chun a chuansak tau hi.

⁸Mipite chun a puanteu chu lampi’n a la phau ah; a khenkhatte chun thingsawlte a sât ua, lampi’n a phau a.

⁹A ma lam ah chiate leh a nung lam ah hungte chu a kiko ua: David Chapa kiang ah Hossana! LALPA min ah hung chu a vangpha ahi! Chungnung pen ah Hossana! a tiu a.

¹⁰Jerusalem khua a lut phatin, khawpi sung ah mite chu a la so veng vung ua, zia mi hi kua ahia hem? a tiu a.

¹¹Mipite chun, zia hi Galili gam ah Nazareth khua Jawlnei Jesu ahi, a tiu a.

¹²Jesu chu tempul in a lut a, thil zuakte leh chawte zosia chu a hun nawdok ah, dangka thengte leh vakhu zuakte dawkan chu a sot pai piak a.

¹³A kiang un, Ka In chu pauchapna In kiti ding ahi, ti ah kizik ahi; himaleh, nang un guchate kikhum khawmna’n la mang ui, a tia.

¹⁴Tempul ah chun mitthûmte leh kengbaite a hung khawm ua, ama chun a la hi’dam tai.

¹⁵Thiampu lalte leh lekhazikte chun a thilmak bawlte chu mu’n tempul ah naupang kikote’n, David Chapa kiang ah Hossana! a tiu chu a het phat un a lungna tau a;

¹⁶a kiang in, ziate thugen hi la he em? a hung tiu a. Jesu’n a kiang un, I, ka hia’i, Naupangte leh nausen nawi chep nalaite kam ah pawt chun, pâkna a bukimsak hi, ti ah kizik kha la sim kha puau ah a hem? a tia.

¹⁷Amau chu a pawtsan ah, khawpi kipat in a pawtdok ah, Bethani khua’n a chia a, zia tak ah chun a giak tai.

¹⁸Jingkal ah khawpi lam ah a hung kile’kit phatin a gil a hung kial ta’n.

¹⁹Lamgei ah chun theichang kung pakhat a mu’n, a vazuan ah, a dua longal bangma a mu puai. A kiang in, kumkhua’n a la ga nawt kin! a tia. Tichun, theichang kung chu a vuaitha ngal tai.

²⁰Nungzuite chun zia chu a muu in, bangati leh, theichang kung hi vuai ngal mai ahi diam?, ti’n mak a sa ma mau a.

²¹Jesu’n a kiang un, Titakzet in ka hil la hiu, ginna la nei ua, la gin lâ lo uh chun, theichang kung chung ah thil kihi’ gual bep hi hi’pua’n la tiu in, zia tâng kiang ah hinle, hung kichawn inla, tuisuagiat ah hung kipai lut in, tileu chun la ti gual un hung um ziang ding ahi.

²²Bangkim ginna nei ah la dot taphot uh chu, lawting ding la hiu, ti’n a dawnhu a.

²³Tempul ah thu a gen lai tak in, thiampu lalte leh mipi lak ah upate a hung lut un, bang thuneina nei ah, zia thilte hi bawl la hem? Chuleh, zia thuneina hi kua hun piak a hem? a hung tiu a.

²⁴Jesu’n a dawnhu ah, Aleh, keima’nle thil pakhat hun dong ing ka, zia chu lei hil thei ua leh keima’nle bang thuneina nei ah, zia thilte hi ka bawl a hem ti hun hil ing ka:

²⁵Johan baptisma kha khoi ah kipat a hem? Van ah kipat a hem, ahiloleh, mihing ah kipat a hem? a tia. A kingaituau ah, Van ah kipat, tileuhin la, Bangatia gingcha lo? ei ti’n tin.

²⁶Mihing ah kipat, tileuhin la mipi hi I lau ngal un; mi zosia’n la Johan kha jawlnei ahi a la tita ngal un, a kitiu a.

²⁷Tichun, Jesu kiang in, ka hepuau hi, a ti tau a. Ama’nle a kiang un, ke’n le bang thuneina nei in zia thilte hi ka bawl a hem, ti hun hil diak pua’ng ka, a tia.

²⁸Bangti’n la ngai awm? Mi pakhat in chapa pani a nei in; a chapa khatnapa zawk kiang ah chun, ka chapa, tu’ni hin grep huan ah vakuan in, a tia.

²⁹Ama chun, ka nuam puai, a tia; himaleh, a vainung ah chun a hung kisik ah, a vakuan tai.

³⁰A pani’napa kiang ah chun a hung kit ah, zia gual ma chun a hung gen a. Ama chun, He pa, vakuan ing ka, a tia. Himaleh, a kuan diak puai.

³¹Aleh, zia pani’te chu a kua zawk chu a pa doigual bawl a hizaw diam? a tia. Amau chun, a masa zawkpa chu, a tiu a. Ziaphat ah chun Jesu’n a kiang un, Titakzet in ka hil la hiu, sedawlte leh nawchizuakte chun Pathian gam a hun lutsan tau hi.

³²Johan kha dikna lampi chu haw in a hung ah, himaleh, ama chu la taksang puau ah; sedawlte leh nawchizuakte’n a taksang ui, nang un vang ama chu muzing napi’nle, la taksan theina ding un la lung uh la hei nuam puau hi, a tia.

³³Tekhinthu dang pakhat a la ngai un: Mi kua a hem gamneipa pakhat a um ah; grep huan a bawl a, pal in pha tak in a ûm a, a grep sûkna khuk dingle a cho ah, a honna ding tau le a daw a; chun, lou enkolte kiang in a lousân lâk dingin a pedok ah, gam gamla tak in a zin daw san tai.

³⁴A ga law hun ding ah chun a lousân la dingin a suakte chu a lou bawlte kiang in a sawl a.

³⁵Himaleh, a lou bawlte chun a suakte chu a la man ua, pakhat chu a vuau ah, a dang pakhat chu a that ua, a dang pakhat ma chu suang in a la sep tau a.

³⁶A masate sâng ah tam zaw a sawl kit ah, a bawldan ngai mau khan a la bawl kit tau a.

³⁷A tawp in, a chapa chu a sawl ah, ka chapa hi vang a la ja deu na’n au, a tia.

³⁸Himaleh, a lou bawlte chun, a chapa chu a la mu phât un, a la kihotuak un, zia hi a golua ding pa chu ahi; hung un, a la that hitiu in, a gochan ding zosia chu ei un kilâk hitiu, a tiu a.

³⁹Tichun, ama chu a la man ua, grep huan pawlam ah chun a sepdok ua, a that tau hi.

⁴⁰Zia grep huan neipa chu a hung tak leh, zia lou bawlte chu bang a hun law ta bep diam? a tia.

⁴¹Amau chun a kiang in, Zia mi nunsiate chu that chimit intin, a grep huan chu midang a sân pha tak ah pia thei dingte kiang in pia zaw ta’n a, a tiu a.

⁴²Ziaphatchun, Jesu’n a kiang un, Pathian lekha thu ah: Insate’n a doilo uh suang kha, a kil ah suang poimaw pen chu a la hi: Zia hi LALPA thilbawl chu ahi’n, I mit muu in a mak ahi, ti ah kizik kha sim kha lo la hiu em? a tia.

⁴³Ziaziakchun, ka hil la hiu, Pathian gam chu nangmau ah kipat lâk mang hi’ntin, nam dang a ga sua dingte kiang ah chun piak hizaw ding ahi.

⁴⁴Kuale zia suang chung ah kipûk chu kitat jak ding ahi; a del den khâkte vâng vâng chu del pen mai ding ahi, a tia .

⁴⁵Thiampu lalte leh Pharisaite chun, zia tekhinthu chu amau chung thu a genna ahi ti a hun he tau a.

⁴⁶Ama chu a mat theina ding dan uh a hun ngaitua pan tau ah, ahi’n la, mipite’n jawlnei ah a het ziak un, mipite chu a lau kit ngal ui.