Read Vaiphei MATTHAI 24 Bible Online

MATTHAI 24 - Vaiphei bible

MATTHAI 24

¹Jesu chu Tempul sung ah kipat a hung pawt ah, chia mang ding a kisak lai tak in, a nungzuite chu tempul thupi dan kawkmu dingin a hung un.

²Ama chun a kiang un, zia zosia hi la muu hi maw? Titakzet in ka hun hil hi, zia tak ah suang kitiang khawm haw zosia hi pakhat chale hawi lo ah sukchip lo ding a um puai, a tia.

³Oliv tâng vum ah a kichut lai in, a nungzuite chu a gûk in a hung ua, zia la gen zosia hi bangtik leh a hung um diam; chuleh, la hung kitna ding leh khawveltawpna ding tepte’na chu bang ahi diam ei hil in, a hung tiu a.

⁴Jesu’n a kiang un, kuama’n a hun theppûk lona ding un chingthei un.

⁵Ka min in mi tam tak in, Khrista chu ka hi, ti’n mi tam tak hun pui mang intin uh.

⁶Kidona leh kido thuthangte hia’n la tiu in; la lungkham lona ding un kivêng un; zia thil zosia chu a hung tung ding him chu ahi; himaleh, a tawpna chu hiziang pua’n a.

⁷Nam khat leh nam khat kido in au, gam khat leh gam khat le kido intiu in, kialte hung tung in, mun chuam chuam in lîn hung kilîng in a;

⁸zia zosia chu nauvei kipatna ahi.

⁹Nang uh chu gawt dingin hun matsak intiu in, tha le hun that in au; ka min ziakin nam zosia huat in um in lau.

¹⁰Ziaphat chuleh, mi tam tak pûk intiu in, kimatsak tua in; hung kimuda tua in au.

¹¹Jawlnei lêm tam tak hung pawt in, mi tam tak hun thêm zo in au.

¹²Dan khawksak lona a pun ding ziakin, mi tam tak hepina chu hung dai in a.

¹³Himaleh, a tawp tiang ah thuakzote chu hukhin in um in au.

¹⁴Chuleh, zia Gam Chanchinpha hi nam zosia hiatsakna dingin khawvel zosia ah genjak in um intin; ziazaw chuleh, tawpna chu hung tung in a.

¹⁵Ziaziakchun, jawlnei Danial in a gen, hi’buakpa ki’dak um chu mun thiangtho ah hung ding la mu phât ua leh (a sim kha taphot in a umdan he hen;)

¹⁶Judea gam ah umte chu tâng ah jam uh hen la;

¹⁷Inchung ah umte chu a In sung ah vante la dingin kum ki’hen;

¹⁸loulai ah um chunle a puan la dingin chia kit ki’hen.

¹⁹Zia hun ah nauvop lai leh nau nawichep lai neite chung chu a gik hi!

²⁰La jamna ding uh chu phalbi lai a hem, sabbath ni a hem ahi lona ding in pauchap un.

²¹Buaina nasa tak hung tung ding ahi ziakin, zia gual him him chu lei chung siam lim ah kipat tu’tiang ah hin a um kha naipua’n, um le um kit diak talo ding ahi.

²²Zia ni chu sukchom hilo vang leh, mihing kuama a suakcha umlo ding ahi; himaleh, têlchuamte ziakin zia ni chu sukchom hiding ahi.

²³Ziaphat chuleh, entia, zia hin Messiah a um hi! a hem, zia son a um hi! a hem tileule taksang kiu in.

²⁴Messiah lêmte leh jawlnei lêmte hung pawt intiu in, melchikna leh tepte’na thupi tak tak le hun etsak in au; hithei vang leh têlchuamte hial le thep zaw hun gua’n au.

²⁵En tiam un, a hun masang ah ka hun hil la hiu.

²⁶Ziaziakchun, hung en un, gamthip ah hin a um hi, tileule vachia diak kiu inla, pindan sunggil in a um hi, tileule taksang diak kiu in.

²⁷Sualam ah kawl a hung phêt ah tumlam chan ah a kilat gual hin, Mihing Chapa hung kit ni chule zia gual chu hi ding ahi.

²⁸Sapul umna taphot ah mulukolle um khawm in au, a tia.

²⁹Zia buaina hun zaw zaw ah chun, nisa hung thim intin, thapi’n le a vak sua ta pua’n a; van ah kipat in aksite hung kia’n tin, van thil hi’theinate hilîng in um in a.

³⁰Zia tak chuleh, Mihing Chapa tepte’na chu van ah hung kilang intin, lei ah nam zosiate chun hun sûn intiu in, Mihing Chapa chu a lopina tawh, a thilhitheina tawh, van sûm chung ah hung chu a la mu’n au.

³¹Pengkul gi nasa tak tawh, a vansawlchâkte hun sawldok intin, kawl kil li ah kipat, van tawp langkhat lam ah kipat a langkhat lam tiang in, a mi têlchuamte chu hun lakhawm in au.

³²Tichun, theichang kung ah kipat hin thil umdan zil un: A bâk a hung sel ah, a duate a hung no tak leh, nipi a nai tai, ti la he sek ui.

³³Zia gual ma chun, zia thilte hi la hun mu tak ua leh, kotkhak bul ah um ahi tai, ti hiau in.

³⁴Titakzet in ka hil la hiu, zia thilte hi a leng ah a tunkim masia, zia khangthakte hi bei pua’n au.

³⁵Lei leh van mangthai intin, ka thu ahileh vang mangthai pua’n a.

³⁶Zia ni leh hun ding chu kuama’n a hepuau in, vansawlchâkte leh chapa’nle a hepua’n, ka Pa bep in a hia’i.

³⁷Himaleh, Noah hun lai gual khan, Mihing Chapa hungna ding chule hung hiding ahi.

³⁸Zia hun lai ah tuilêt masang ah, Noah a kuang ah a lut ni tiang ah khan, a neu in, a dawn ua, a kichen sak un, a kicheng ui.

³⁹Tui a hung lêt ah a hun chupmang masia kha, khawhe lo in a um un; zia gual ma khan Mihing Chapa hungna ding chule hung hiding ahi.

⁴⁰Zia hun tak chuleh, lou ah mi pani um le pakhat chu lâk hi’ntin, pakhat chu nutsia hiding ahi.

⁴¹Numei pani buhêkna sêm khawm le pakhat lâk in um intin, pakhat nutsia in um in a.

⁴²Ziaziakchun, kiging zingin um un; la LALPAu chu bangtik ah hung ding ahi la hepaw ngal un.

⁴³Himaleh, zia hi he un, Inneipa chun gucha hung ding hun chu he masa hileh, a la kiging zing intin, a In chu phiatvansak lo hial ding ahi.

⁴⁴Ziaziakchun, nang uh le kisa zosa’n um un; Mihing Chapa chu la ginchâk lo lai tak un hung kha ding ahi.

⁴⁵Suak ginum leh pil tak, a pu’n a hun tak ah an hawm piak sek ding ah, suak dangte Insung ah a koi ding chu kuapen ahi diam?

⁴⁶A pu a hung lai tak ah zia gual ah a la bawl a hun mu ding chu a hampha na e!

⁴⁷Titakzet in ka hil la hiu, a nei zosia chung ah hotu dingin koi in a.

⁴⁸Himaleh, suak phalo chu a kingaitua ah, ka pu a hung hak hi, ti’n,

⁴⁹a suak chanpite a la vua hen la, zukhamte tawh ne leh dawn in um leu vang;

⁵⁰zia suakpa pu chu a ginchâk lo lai tak in, a het lo kâl in hung intin,

⁵¹tumni hun sua intin, miphalêmte chan chu chansak intin; zia tak ah chun kâ leh hagial um ta’n a, a tia.