Read Vaiphei MATTHAI 25 Bible Online

MATTHAI 25 - Vaiphei bible

MATTHAI 25

¹Chuleh van-gam chu nungak thiangtho sawmkhat, a thaumei uh keng ah, moneipa dawn ding ah kipandokte gual kha hi’n a.

²A lak ua panga a pil un, panga a ngol ui.

³A ngolte chun a thaumei uh a keng un; himaleh, a tui a kengthua puau a;

⁴a pilte chun vang a ûm in thautui a kipuak un, a thaumei uh tawh a keng khawm ui.

⁵Himaleh, moneipa chu a hung hak tâk ziakin a la ipmu vuang un, a la ipmu man tau a.

⁶Jankhang lai tak chun, ngai tiam un, moneipa a hung tai, a dawn dingin hung pawt tau in, ti ah kiko gi a hung um ta’n.

⁷Ziaphatchun, nungak thiangthote chu hung tho in, a thaumei uh a hun vâk tau a.

⁸A ngolte chun, a pilte kiangah chun, “La thautui uh ei hawm un, ka thaumei uh mit ding ahi tai,” a tiu a.

⁹Himaleh, a pilte chun: “Hilo e, kei uh â ding tawh nang uh â dingin a kiting puai; chiau inla, a zuakte kiang in vakichawk tau in,” a tiu a.

¹⁰Chutia, a chaw ding ah a vachia mang kâl ua chun, moneipa chu a hung tung ta; tichun, kisazosa umte chu tawh kichenna ankuang ûm dingin a lut tau a, kot chu a khak tau hi.

¹¹Ziazaw chun, nungak dangte kha le a hung tung un, LALPA, LALPA, kot ei hon in, a hung tiu a.

¹²Himaleh, ama chun, titakzet in ka hil la hiu, nanghaw ka hun he’kha puai, a la ti san tai.

¹³Zia gual chun, kiging zing in um un, Mihing Chapa hung ding ni leh, a hun ding bangma la he pawngal un, a tia.

¹⁴Chun, van-gam chu mi pakhat, gamdang ah khualzin ding ah kisa, a suakte ko ah, a sumte kolsak gual chu ahi;

¹⁵pakhat kiang in talent nga a pia, a dang khat kiang in talent ni a pia, chuleh a dang khat kiang in talent khat a pia; tichun, a hi’thei ding hun tiang chiat un a pia, a zindok tai.

¹⁶Talent nga changpa chu a kuandok ngal a, sumkawl a vavei ah, talent nga dang a vaveipung a.

¹⁷Zia gual ma chun talent ni changpa kha le a kuandok ah, talent ni dang a vaveipung kit a.

¹⁸Ahi’n, talent khat changpa khan chu lei a cho ah, a pu dangka chu a phûm tai.

¹⁹Sawt tak nung in zia suakte pu chu a hung tung ta’n, a dangkau kha bang a la lawu em ti a hun etpi ta’n.

²⁰Tichun, talent nga changpa kha a hung a, talent nga dang tawh a hun chawi ah, he pu, talent nga lei kolsak kha ahi’n, en in, talent nga dang ka mube hi, a tia.

²¹A pu chun a kiang in, la bawlpha na e! Suak pha leh ginum, tawmcha chung ah la ginum ziakin, tam tak chung ah vaihawm dingin hun koi ing ka; la pu kipakna’n lut ta’n, a tia.

²²Chuleh, talent ni changpa chule a hung a, he pu, talent ni lei kolsak kha ahi’n, en in, talent ni dang ka mube hi, a tia.

²³A pu chun a kiang in, la bawlpha na e! Suak pha leh ginum, tawmcha chung ah la ginum ziakin, tam tak chung ah vaihawm dingin hun koi ing ka; la pu kipakna chun lut ta’n, a tia.

²⁴Chuleh, talent khat changpa kha le a hung a, he pu, nang hi mi genhak tak la hi ti ka hia’n, la tu’lo nale la ât sek a, la the’lona ah le la lakhawm sek hi;

²⁵tichun, ka hun lau ah, ka chia ah, la talent kha lei ah ka vaphûm ah, en in, nang â ngai ma kha ka hun chawi kit hi, a tia.

²⁶A pu chun a kiang in, nang suak gilo leh thadapa, ka tu’lona le ka ât sek ah, ka the’lona le ka lakhawm sek hi ti la he maw?

²⁷Chuti ahileh, ka dangka hi sum koina In bêk ah la vakoi ah, ka hung kit ah hin ka dangka chu a pung tawh ka mu kit ding ahi.

²⁸Ziaziakchun, a talent neisun kha lâkpiak un la, talent sawm neipa kiang in pia tau in.

²⁹Kuale a nei tapo piak belap hi’ntin, tam tak nei in a; himaleh, a neilo chu a neisun le lâkpiak hiding ahi.

³⁰Tichun, suak phachuam lo chu pawlam thim ah paidok un; zia tak ah chun kâ leh hagial um ta’n a, a tia.

³¹Mihing Chapa chu a vansawlchâkte tawh, a lopina kithuam ah a hung tak leh, a lopina lalchutpha chung ah hung kichu’n tin;

³²nam zosia chu a ma-âng ah kikhawm intiu in; amau chu belampu’n, kêlchate lak ah belamte a khendaw sek gual in hun khendan in a.

³³Tichun, belamte chu a changlam ah koi intin, kêlchate chu vang a veilam ah koi in a.

³⁴Ziaphat chuleh, Lengpa chun, a changlam ah umte kiang ah chun, hung un, nang haw ka Pa maljawlna changte haw, khawvel siam lim ah kipat nang uh â ding ah siam gam chu lua tau in;

³⁵ka gil a kial in nêk ding lei piau a; ka dang a châk in dawn ding lei piau a; malzin ka hi’ in lei zin tun un;

³⁶ngawnchang ah ka um in puan lei sil sak un; ka damlo in lei ve’thau a; suangkul ah ka um inle lei hung kanthau ah, ti’n tin.

³⁷Zia hun tak chuleh midikte chun, LALPA khoi tak ah gilkial in ka hun muu ah nêk ding ka hun piau ah a hem? Chuleh, khoi tak ah dangchâk ah ka hun muu ah, dawn ding ka hun piau ah a hem?

³⁸La malzinna ah le khoi tak ah ka hun zintun ua, khoi tak ah ngawnchang ah um lai puan ka hun piau ah a hem?

³⁹Chuleh, damlo leh suangkul ah la umna khoi tak ah ka hun kantha khau ah a hem? ti’n au.

⁴⁰Lengpa chun a kiang un, titakzet in ka hil la hiu, zia ka unaute lak ah a neupen chung ah la hiu kha le, keima chung ah hi’ la hiu, hun ti ta’n a.

⁴¹Chun, ah veilam ah umte kiang ah chun, nanghaw hânsedawlte haw, diabol leh a sawlchakte â ding ah kiguanggal kumtuang meipi lam ah chun chia tau in;

⁴²ka gilkial lai inle nêk ding lei pia puau a, ka dangchâk lai inle dawn ding lei pia puau a;

⁴³malzin ka hi inle lei zintun puau a; damlo leh suangkul ah ka umna’n le lei kantha nuam puau hi, ti’n tin.

⁴⁴Zia tak chuleh amau chun, LALPA, khoi tak ah gilkial leh dangchâk in a hem, malzin ah leh ngawnchang in a hem, damlo leh suangkul ah le ka hun muu ah, ngaisak lo ah ka um uh? ti’n tiu in.

⁴⁵Ziaphat chuleh, ama chun, titakzet in ka hil la hiu, ziate lak ah a neupen chung ah la hi’lo uh kha, keima chung ah hi’lo la hiu, a la ti’n a.

⁴⁶Tichun, ziate lawi chu kumtuang gawtna chun sawl ta’n tin; midikte chu vang kumtuang hinna chun lutsak ta’n au, a tia.