Read Vaiphei MATTHAI 27 Bible Online

MATTHAI 27 - Vaiphei bible

MATTHAI 27

¹Jingkal phatin, thiampu lalte leh upate zosia, chuleh, mipite chun Jesu tha ding dan chu a ngaitua tau a.

²Ama chu kân sa’n a pui ua, gam ukpa Pilat kiang in a pedok tau ahi.

³Ama man ah pang Juda khan, Jesu thiamlo a chansak ui ti a het phat in a kisik ah, a dangka sawmthum kha thiampu lalte leh upate kiang in a hun chawi kit a.

⁴“Mawna neilo thisan ka matsak ziak ah hin thil ka hikhial tai,” a tia. Amau chun, “Zia chu kei un bang ding ka tiu em? Nang in la law law kilaw ta’n,” a tiu a.

⁵A dangka chu tempul sung ah seplut in a nusia ah, a pawtdok ah, ama leh ama a vakikhâi lum tai.

⁶Ziaphatchun, thiampu lalte chun zia dangka chu a lau a, “Zia hi thisan man ahi ziakin thawlawm bawm ah koi a thiang puai,” a tiu a.

⁷Tichun, a kiho ua, malzin vuina dingin bêlvêlte lou mun khat a chawu a;

⁸ziaziakchun, zia lou mun chu tu’ni tiang hin, “Thisan Mun,” a kiti den tai

⁹Jawlnei Jeremiah in a la gen guitunna dingin; “Dangka sawmthum, Israel chate’n a bithiak, ama man ding tawh kigûn zat chu a lau a;

¹⁰LALPA‘n ei tiam piak gual ngei in, bêlvêlte lou mun chawkna’n a kimang tai,” a ti kha a guitung tai.

¹¹Jesu chu gam ukpa ma-âng in a ding ah, gam ukpa chun, “Judate Lengpa la hi em?” ti’n a dong a. Jesu chun, “La hi lei ti chu lam,” a tia.

¹²Himaleh, thiampu lalte leh upate hêkna chu bangma’n a dawnhu puai.

¹³Pilat chun, “Hiti zojai ah a hun hêknau hi la he pua a hem?” a tia.

¹⁴Ama chun a hêkna thuu chu kam khat inle a dawnhu pua; ziaziakchun, gam ukpa chun mak a sa ma ma a.

¹⁵Kût ni hileh, gam ukpa chun mipite doisak pen pen suangkul ngâkte lak ah pakhat a thâdaw sek chu a hi’dan ngai uh ahi’n.

¹⁶Zia lai ah chun suangkul ngâkte lak ah chun migilo minthang tak pakhat, Jesu Barabba a tiu chu a um a.

¹⁷Chutia, a hung kikhop phat ua chun, Pilat in a kiang un, “Aleh, Jesu Barabba a hem, ahiloleh, Jesu Messiah kiti hi, kuapen ka hun thâdaw piak diam?” a hun tia.

¹⁸Mitthipna ziak ah ama chu a mat uh ahi ti a he ngal a.

¹⁹Chun, vaihawmna chutpha a chut lai in, a ji chun, “Zia midik chung ah khan bangma hi’kin, tu’ni hin ama ziakin ka mang in thil tam tak ka thuak ahi,” ti’n mi a hun vaithâk a.

²⁰Himaleh, thiampu lalte leh upate chun mipi chu a tîlsiau a, Barabba chu thâ dawsak ah, Jesu chu sukmanthai sak tei ding ah don dingin a nawu a.

²¹Gam ukpa chun a kiang un, “Zia panite lak ah hin a kua zawk hi hun thâdaw piak ding ka hem?” a hun ti kit a. Amau chun, “Barabba,” a tiu a.

²²Pilat chun a kiang un, “Jesu, Messiah kiti hi bang ka law ta diam?” a tia. A leng un a kiko ua, “Ama chu kros ah khenden in,” a hun tiu a.

²³Gam ukpa chun a kiang un, “Bangatia a hem, bang thil hikhial a nei em?” a tia. Himaleh, nasa zaw diak in a hung kiko ua, “Kros ah khenden in,” a hun ti kit ua.

²⁴Pilat in bangma hi’thei a nei ta puai, hung buai zaw deu deu ding ahi ti a het phat in, tui a la, mipite ma ah chun a khut a sawp a, “Zia midik thisan hin ka thiang hi; nang un la law lawu kilaw tau in,” a tia.

²⁵Ziaphatchun, mipi zosia chun a hun dawnhuu a, “A thisan chu keimau leh ka chateu chung in um ta hen,” a tiu a.

²⁶Ziaphatchun, Barabba chu a hun thâdaw piak ah, Jesu chu a vok zaw phatin khetden dingin a hun pedok tai.

²⁷Chun, gam ukpa sepaite chun Jesu chu gam ukpa In ah a puilût ua, zia tak ah chun sepai pawl zosia le a hung kikhawm tau a.

²⁸A puante chu lîpthâk piak in puan sandup a silsak un,

²⁹linglukhuk a phêk ua, a khuk sak un, a khut changlam ah chun luangkang khat a choisak un; a ma-âng ah bokkhup in, tawtbawlna mang in, “Chibai, Judate Lengpa,” a tiu a.

³⁰Chil a siatkhum un, luangkang chu la’n a luchang a khet piak un.

³¹Chutia, tawtbawlna a mat zaw phat un a puansil chu a lâkpiak kit ua; ama puanâk ma âksak kit in, khetden dingin a puidok tau hi.

³²A hung pawtdaw lai tak un, Kurini khua mi pakhat, a min Simon a tiu chu a muu ah, a chamlo in kros chu a putsak un.

³³Golgotha, Lugumun a ti sek uh mun chu a hung tun phat un,

³⁴a dawn dingin uain, thil kha tawh kihel a piau ah; a vak tep leh a dawn nuam ta pua’n.

³⁵A khetden zaw phat un, a puante chu âisân in a kihawm un;

³⁶chut kawm in ama chu a vêng tau a;

³⁷chuleh, a luchung ah chun a hêknau lekha, “ZIA HI JESU, JUDATE LALPA ahi,” ti hi a kitâk hi.

³⁸Chun, a kiang ah chun suammang pani, a changlam ah pakhat, a veilam ah pakhatle a khenden un.

³⁹A kiang hun haw malamte chun a luu a sukkhum un, a eng eng in a ho malam un:

⁴⁰“Nang tempul susia ni thum sung ah tungding kit dingpa, nang leh nang kihukhing ta’n la; Pathian Chapa la hileh kros ah kipat chun hung kum in,” a tiu a.

⁴¹Zia gual ma chun thiampu lalte, lekhazikte leh upate chunle a engho un:

⁴²“Midang bawn hukdam ah, ama leh ama kihukdam theilo. Israelte Lengpa ahileh kros ah kipat in hung kumtha’n la, kei unle hun ging mai ding ka puau em;

⁴³ama chun Pathian a ging ah, Pathian Chapa ka hile a tingal ah; a nop ahi chun tu’hin hun hukdok leh hiding a pom,” a tiu a.

⁴⁴A kiang ah gucha kikhendente khan le a hun engho tau a.

⁴⁵Sûn kim ah kipat sunnung dak thum chan in gam pumpi a thim suak tai.

⁴⁶Dak thum ding vêl in, Jesu chu aw ngai tak in a hung kiko ah, “Eli, Eli, lama sabakhthani?” a hun tia. Zia chu, “Ka Pathian, ka Pathian, bangatia ei nusia la hem?” ti’na ahi.

⁴⁷Zia tak ah a la ding khenkhatte chun, zia a kiko git chu a het phat un, “Zia pa hin Elijah a ko ahi,” a tiu a.

⁴⁸Tichun, kin tak in mi pakhat a vatai ah, thilpân khat uain thuk tui ah chun a dia a, luangkang in a tâk ah, a vak dawnsak a.

⁴⁹Midangte chun, “Khawngai tia, a panpi dingin Elijah a hung him him em a la en hitiu,” a tiu a.

⁵⁰Jesu chu aw ngai tak in a hung kiko kit ah, a thagau a tha tai.

⁵¹Zia lai tak ah chun tempul sung ah puanjak chu a chunglam ah kipat a nuailam tiang in a hung kithêktha suk ah; lîn a kilîng ah, suangpite a hung puakjak tau a;

⁵²chuleh, thânte chu a hung kihong ah; mithiangtho tam tak a la ipmu sate taksa chu a hung thokit tau a.

⁵³Jesu a hung thawkit nung ah chun a thânteu ah kipat hung pawtdok in, khawpi thiangtho ah chun mi tam takte kiang in a vakilâk tau a.

⁵⁴Sepai zahotu leh a kiang ah Jesu vêng ah umte chun, linlîng leh thil umdante chu a mu phât un a lau ma mau a: “Zia mi hi Pathian Chapa a la hi tak tak hi,” a tiu a.

⁵⁵Gamla tak ah kipat a la thîl zing numei khenkhat a um ua, amau chu Galili gam ah kipat hun zui, a na sep piak sekte kha a hiu a.

⁵⁶Ziate lak ah chun Mari Makdalin tawh, Jakob leh Joseph nu Mari tawh, Zebedai chate nu kha le a pang ui.

⁵⁷Nitâk lam a hung hi’phatin, mi hausa pakhat a min Joseph, Arimathai khua um chu a hung a, Jesu nungzui ah a la pang ahi’n.

⁵⁸Pilat kiang in a vachia ah, Jesu luang a vadon a. Ziaphatchun, Pilat chun a luang chu a la pedok dingin thu a pia tai.

⁵⁹Joseph chun a luang chu a lâkdaw phatin, puannem thiangtho tak in a tuam a;

⁶⁰ama thân ding ah suangpi a khuak ah chun a sial ah, zia thânkot ah chun suangpi lian tak khat a lîk lut ah, a nusia tai.

⁶¹Ahi’n, Mari Makdalin leh Mari dang a um un, thân jawn ah chun a kichuu a.

⁶²A jing ah chun, zia chu Kisaklawk ni zaw ahi’n, thiampu lalte leh Pharisaite chu Pilat kiang in a hung khawm un,

⁶³“He pu, zia mithêmpa khan a dam lai khan, ‘Ni thum zaw leh thokit ding ka hi,’ a ti kha ka hezing ui.

⁶⁴Ziaziakchun, thân chu ni thum ni tiang vêng dingin thu pia’n; achutiloleh, a nungzuite’n ama chu vagu kha’n tiu in, nautâng lak ah, ‘Mithi lak ah kipat in a tho kit tai,’ ti kha’n au; tichun, thil dik lo nunung zaw chu a masa sâng in khawk zaw ding ahi,” a vatiu a.

⁶⁵Pilat chun a kiang un, “Vêngtu la nei uh hilo a hem? Chiau inla, a muan um thei ding pen in vabawl un,” a tia.

⁶⁶Tichun, a chiau a, thân chu a muan um thei ding pen ah bawl in, a suang chu a châl un, a vêng dingle a koi tau hi.