Read Vaiphei MATTHAI 3 Bible Online

MATTHAI 3 - Vaiphei bible

MATTHAI 3

¹Zia lai ah chun, Baptispa Johan chu hung in, Judai gamthip ah thu a hung gen a:

²“La gitlo uh haisan tau in, van-gam chu a nai tai,” ti in.

³Ama chu ahi, jawlnei Isai in: Gamthip ah mi kiko chun, “LALPA lamlian siamtup unla, a lampite siamzang ta un, a tii,” ti ah a gen kha.

⁴Zia Johan chun sangawngsau mul puan a sil ah, a kawng chu savun kawnggâk in a gâk ah; a an chu gam bepi leh gam khuaizu ahi.

⁵Zia lai ah chun, Jerusalem khua mite, Judai gam ah mite leh Jordan luidung ah mi zosia a kiang in a hung khawm ua;

⁶a gitlonateu kipuang in, Jordan lui ah chun baptisma a chang chiat tau hi.

⁷Himaleh, Pharisaite leh Sadukaite tam tak baptisma chang ding ah hung a la mu phât in a kiang un, “Gulsuante haw, lungnatna hung tung ding chu pumpel dingin kua’n a hun hil em?

⁸Gitlo haisanna tawh kilawm ga chu hun sua phot tau in.

⁹Abraham chu ei suanpa ahi ti ziang kiu in, Pathian in zia suangte hi le Abraham suante a chansak thei hi ti ka hil la hiu.

¹⁰Heicha chu thingbul tin in a koi tau hi; ga pha sua lo taphot phûk in mei ah pai lut ding a hiu.

¹¹Keima’n gitlo haisanna di’n tui in ka hun baptis in, ka nung ah hungdingpa chu keima sâng in a lopi zaw’n, a kengtawdap chawi tâk le ka hi puai. Ama chun, Thagau Thiangtho leh mei in hun baptis in a.

¹²A khut in phajâp a chawi ah, a bu’te chu hun jap thiang intin, a bupang ah chun koihe in a. Busite vang chu mei mitthei lo ah chun hâl ta’n a,” ti’n a gen a.

¹³Ziaphatchun, Jesu chu Galili gam ah kipat in Jordan lui ah baptisma chang dingin Johan kiang in a hung a.

¹⁴Himaleh, Johan chun, “Nang in lei baptis zawk sik ah, ka kiang ah la hung zaw ahi maw?” ti’n nan a la gua.

¹⁵Himaleh, Jesu’n a kiang in, “Tu’hin ei chansak mai in, zia gual ah dikna dan zosia sukbukim hi I bawl dingin a kilawm hi,” ti’n a dawnhu a; tichun lem a sa tai.

¹⁶Jesu baptisma a chan zaw ah tui lak ah kipat a hung pawt phatin, van a hung kihong a, Pathian Thagau chu vakhu gual in a hung suk ah, a chung ah hung chû a mu tai.

¹⁷Chuleh, van ah kipat aw gi chun, “Zia hi ka Chapa Dawi tak, ka kipakna ma ma chu ahi,” a hun tia.