Read Vaiphei MATTHAI 4 Bible Online

MATTHAI 4 - Vaiphei bible

MATTHAI 4

¹Ziazaw chun, Jesu chu diabol thep ah um dingin gamthip ah Thagau pui lût in a um ta’n.

²Ni sawmli leh jan sawmli an a ngawl nung in, a gil a hung kial ta’n.

³Thêmpa chu a hung ah, a kiang in, “Pathian Chapa la hileh zia suang hi vaithum suak dingin thu pia ta’n la,” a tia.

⁴Himaleh, ama chun, “Mihing hi vaithum bep in hing pua’n tin, Pathian kam ah thu tin pawt in hing zaw’n a, ti zik ahi,” ti’n a dawnhu a.

⁵Ziazaw chun, diabol chun khawthiangtho ah chun a pui lût a, Pathian Biak In sip zum ah chun a dinsak ah, a kiang in,

⁶“Pathian Chapa la hileh chawmtha’n, la chung thu ah hin, ‘A vansawlchakte chu thu pia’n tin, a khut un hun dom intiu in, chutichun, la keng in suang khat chale suikha pua’n la,’ ti zik gual ah khan,” a tia.

⁷Jesu’n a kiang in, “LALPA la Pathian chian kin, ti ah kizik ahi,” a ti kit a.

⁸Chuleh, diabol chun tâng sâng tak in a pui kit a, khawvel gam zosia leh a lopina chu a etsak a.

⁹A kiang in, “Ka ma hin bokkhup in chibai bûk in ei ho inla, zia zosia hi pia sik sek ing ka,” a tia.

¹⁰Ziaphatchun, Jesu’n a kiang in, “Setan, chia mang in! ‘LALPA la Pathian chibai bûk inla, ama na bep sêm in,’ ti zik ahi,” a tia.

¹¹Ziazaw chun, diabol chun a nusia ta’n; vansawlchâkte a hung un, a na a hung sep piak tau hi.

¹²Johan a man ui ti Jesu’n a het phat in, Galili gam in a kilepmangsan tai.

¹³Nazareth khua nusia in, Kapernaum khua’n a chêngden tai; zia chu Zebulun leh Naphtali gam ah Dil gei ah um ahi’n;

¹⁴zia hi jawlnei Isai in a la gen kha a guitunna ding ahi:

¹⁵“Jebulun gam leh Naphtali gam, Tuipi zotna lamdung Jordan gâl khat lam ah, Jentelte Galili gam;

¹⁶‘Thim nuai ah chu te chun vâk lopi tak chu a mu tau in, thina lîm guam ah chu te chung ah chun, vâk a hung suakdok tai,’ tia a gen kha a hung guitun theina dingin”.

¹⁷Zia hun ah kipat chun Jesu’n, “La gitlo uh haisan un, van gam chu a nai tai,” ti’n a gen pan tai.

¹⁸Galili Dil gei ah Jesu a vâkvêl lai in, unau pani, Simon, Peter a tiu chu a suapi Andria tawh Dil ah lênsep lai a mu’n, sanga man mi a hiu a.

¹⁹A kiang un, “Ei zui un, mihing man dingin hun siam ing ka,” a tia.

²⁰Tichun, a lênteu nusia in a zui ngal tau hi.

²¹Zia kipat chun a chia pek ah, unau dang pani, Zebedai chapa Jakob leh a unau Johan, a pau Zebedai kiang ah kuang sung ah a lênsiateu siampha lai tak chu a mu’n, a ko ngal a.

²²Tichun, kuang leh a pau chu nusia in, a zui ngal tau hi.

²³Jesu’n sunagog ah a kikhopna Inteu ah chun, gam chanchinpha chu hil in, mite lak ah hivei tincheng leh damlona zosia hi’dam in Galili gam zosia a fang suak tai.

²⁴Suria gam zosia’n a chanchin a thang suak ta’n; tichun, damlo zosia, hivei nei leh natna tincheng thuakte, thithabuak matte, hipût neite leh zengte haw chu a kiang in a hun pui ua; a la hi’dam suak tai.

²⁵Galili lam ah kipat te, Dekapolis khua kipat te, Jerusalem khua kipat te, Judea gam ah kipat te, Jordan gâl ah kipat te chun mipi nasa tak in ama a zui tau hi.