Read Vaiphei MATTHAI 5 Bible Online

MATTHAI 5 - Vaiphei bible

MATTHAI 5

¹Mipite chu Jesu’n a mu phât in, tâng in a chia to ah, a kichut zaw phat in a nungzuite a kiang in a hung ua,

²ama chun zia thute hi gen in, a hun hil pan a:

³Thagau ah tasam ahi lam kihete chu mi hampha a hiu, van-gam chu amau â ahi ngal a.

⁴Lusûnte chu mi hampha a hiu; Pathian in thamuan ding ahi ngal a.

⁵Mi zaidamte chu mi hampha a hiu; Lei go hi lua ding ahi ngal un.

⁶Dikna ngai ah gilkial leh dangchâkte chu mi hampha a hiu; Tai leh niansak ah um ding ahi ngal un.

⁷Mi jangai theite chu mi hampha a hiu; khawtua’na mu ding ahi ngal un.

⁸Lunggil ah thiangthote chu mi hampha a hiu; Pathian mu ding ahi ngal un.

⁹Chamna siamte chu mi hampha a hiu; Pathian cha ah sak in um ding ahi ngal un.

¹⁰Dikna ziak ah sukgentheina thuakte chu mi hampha a hiu; van-gam lua ding ahi ngal un.

¹¹Keima ziak ah min a hun hosiat ua, a hun sukgenthei ua, juau ah thu phalo zosia a hun hêk phat ua leh mi hampha la hiu.

¹²Lim unla, kipak tak in um un; van ah la kipakman ding uh chu a lopi ngal in; zia gual ma chun la mau ah jawlneite kha le a sukgenthei uh ahi kha.

¹³Lei chi la hiu; himaleh, chi hi dau taleh bang in ahi al kit thei diam? Zia chu paimang ah, mite chotden ding bep lo ngal in panna a nei ta puai.

¹⁴Khawvel vâk la hiu. Tâng chung ah khua um chu sêlgûk thei ahi puai.

¹⁵Min thaumei hâl in, law nuai ah a koi ngai puau in, a tunna’n a tung zaw sek ui; tichun, In sung ah mi zosia a salvâk sek hi.

¹⁶Zia gual ma chun, la vâk uh chu mite mit mu in vâk ta hen; tichun, la thil hi’phatteu chu mu’n, van ah la pau chu chawihoi thei in au.

¹⁷Dan thu a hem, jawlneite thuhil a hem subei ding ah hung hi dingin ei ngaitua kiu in, a subei ding ah hung ka hipua’n, a subuting ding ah hung ka hizawi.

¹⁸Titakzet in ka hil la hiu, Lei leh Van a manthai masia, Dan thu sutvom neucha a hem, zikvom neucha a hem, a leng ua a tunkim masang sia pakhat chale mangthai pua’n a.

¹⁹Ziaziakchun, kua’nle, dan thupiakte lak ah a neu pen hi botsia hen la, zia gual ma chun midang le bawsiatsak ding ah a hil chun, ama chu van-gam ah chun mi neu pen ti’n au. Zia gual ma chun, kuale dan thupiak jawm ah, midang le jawm ding ah hil chu, van-gam ah chun mi lian ti’n au.

²⁰Ka hil la hiu, Pharisaite leh Lekhazikte felna hi la khûp lo ua leh, van-gam chu lut lo hial ding la hiu.

²¹Malai mite kiang ah chun, Tual la tha ding ahi puai, a tiu tawh, Tualthat tapo chu vaihawmna ah lauthawn um tak in dingin ah, a tiu la he tau hi.

²²Himaleh, ke’n vang, kuale a unau chung ah lungna tapo chu vaihawmna â dingin lauthawn um tak in um intin; chuleh, kua’n le a unau kiang ah, “Raka, Panna bei” ti tapo chu vaihawmte vaihawm piak lauthawn um tak in um intin; chuleh, a unau kiang ah, “More, Mingol” ti tapo chule vaihawm piak lauthaw’n um tak in um in a, ti ka hil la hiu.

²³Mâichâm ah la thilpiak la koi lai ngei ah, la unau in la chung ah lung hi’lona a nei la hetdaw ahileh,

²⁴zia mâichâm ma-âng ah chun, la thilpiak chu nusia’n la, chia kit in la, la unau vakichampi masa phot in, ziazaw chuleh hung inla, la thilpiak chu hung lân in.

²⁵La langpa tawh vaihawmna In lampi la kiton lai un kichampi vak in, chutilochun, vaihawmpa hun matsak intin, vaihawmpa chun mimante khut in hun pia’n tin, suangkul ah khum kha’n au.

²⁶Titakzet in ka hil la hiu, paisa khat nasan le la piak kim masia zia kipat chun hun pawtsak lo hial ding ahi.

²⁷Ângkawm kin, a tiu hi ti la he tau hi.

²⁸Kei vang in, kuale numei tatsiatpi ding et ah en tapo chun, a lungthim in a ângkawm zo ahi tai ti ka hil la hiu.

²⁹La mit changlam in a hun hi’puk ahileh, kheldok inla, pai mang ziang in; taksa bukim ah gawtmun ah chia sâng in, taksa bâk pakhat manthai chu nang â dingin a pha zawi.

³⁰La khut changlam in a hun hi’puk chun, tan tha’n la, pai ziang in; taksa bukim ah gawtmun ah chia sâng in, taksa bâk pakhat bei chu nang â dingin a pha zawi.

³¹Kuale ji nol tapo chun kinolna lekha a kiang in pia hen, ti le a um a.

³²Himaleh, ke’n vang, kuale a ji chu pawsal dang tawh gitlona ziak hilo ah nol tapo chun, ama chu a ângkawm sak ahi; chuleh kuale nolsa kichenpi tapo chu ângkawm a hiu ti ka hil la hiu.

³³Malai mite kiang ah chun, “Zuau in kitiam kiu inla, LALPA kiang ah la thutiamte chu pitin zawu in,” a tiu ti la hiau a.

³⁴Himaleh, kei vang in ka hil la hiu, kihaksial him him kiu inla, van sam in kitiam kiu in, zia chu Pathian lalchutpha ahi ngal a;

³⁵lei sam inle kihaksial diak kiu in, zia chu a keng ngakna ahi ngal a; Jerusalem sam inle kitiam diak kiu in, zia chu Lal lopi khawpi ahi ngal a.

³⁶La lubuk sâm in kihaksial diak kin, samzang khat cha hile la hi’kâng in, la hi’vom thei pawngal a.

³⁷La thugen chu ahileh ahi himai hen la, ahiloleh ahilo hiziang hen; zia khêlvâl chu gitlo ah kipan ahi sek hi.

³⁸Mit sik ah mit, ha sik ah ha, kiti sek la he tau hi.

³⁹Himaleh, kei vang in ka hil la hiu, migilo thuk kiu in; la biang changlam bêng tapo chu a langkhat le daw zaw’n la.

⁴⁰Kua’n le a hun hêk ah, la puanâk a lâkpiak chun, la puanâk chungle lâksak ngal in.

⁴¹Mêl khat chia ding ah min a hun sawl chun, mêl ni chia mai in.

⁴²La thil hun donte chu pia’n la, a khêl nuamle kilepsan kin.

⁴³La vêngte hepi inla, la mêlmate huan, a tiu la he tau hi.

⁴⁴Kei vang in ka hil la hiu, La mêlmateu hepiu inla, a sugentheite chu pauchap piak un;

⁴⁵la Pau van ah mi chate la hi’theina ding un; ama chun migilote leh miphate chung ah chun ni a suak sak gêl ah, mi dik leh dik lo chung ah le gua a zuksak sek hi.

⁴⁶Nang uh hun hepite bep la hepiu chun, kipakman bang a hem la mu ding uh? Sedawl mite’n le zia gual ma chun a bawl tho puau em?

⁴⁷La unaute bep chibai la bûk leh bang a hem la phat zawk na? Jentelte’n le zia gual chun a bawl puau ah a hem?

⁴⁸Tichun, la Pau van ah um a phat bukim gual in nang uh le pha bukim in um un.