Read Vaiphei MATTHAI 6 Bible Online

MATTHAI 6 - Vaiphei bible

MATTHAI 6

¹La thilpha hi’teu mihing mit mu ah kilang ding bep hilo dingin chingthei un; chutilochun, la Pau van ah um kiang ah chun kipakman ding nei pua’n lau.

²Chutichun, tasam kiang ah thil khat la piak in, miphalêmte’n mi pakchât a law theina ding ua kikhopna Inte, khawlai dungte ah a piak sek gual uh hin la malam ah pengkul mûtsak in suklat gaw kiu in. Titakzet in ka hil la hiu, a kipakman uh chu a mu zo tau hi.

³Nang la hileh tasam kiang ah thil khat la piak in, la khut changlam in a hi’chu la veilam in he ki’hen,

⁴la thil piak chu a gûk ah a umtheina dingin; chutichun, la pa la thilhi’te a gûk ah a la musekpa chun hun dit in a.

⁵La pauchap phat leh, miphalêmte gual ah la hi’ding ahi puai; amau chun mi mutheina ding sunagog leh, khawlai lamka bul ah te’n a pauchap nuam diak sek ui. Titakzet in ka hil la hiu, a kipakman uh chu a mu zo tau hi.

⁶Nang vang la pauchap ding phat leh, la pindan sunggil ah lut inla, la kot khak inla, la pa kuama mu’lo ah a la um zing kiang ah chun pauchap in: tichun, la pa la thil bawlte a gûk ah a la musekpa chun hun dit in a.

⁷Chun, la pauchap phat leh Jentelte gual in gennon mai mai kiu in; a gen tam ziak ua ngaithâk ah um dingin a kigingcha sek ui.

⁸Amau gual in um kiu inla, la dot mau inle la pau chun bang a hem la tâksap a he ngal in.

⁹Zia hi la pauchap dan ding uh chu ahi: “Ka Pau van ah um, la min ja in um hen la,

¹⁰la gam hung tung hen. La dawi gual van ah mi’n a hi’gual un, lei ah mi’n le hiu hen.

¹¹Nisi’n ka nekkhop uh an ei pia’n.

¹²Ka chung ua thil hi’khialte ka ngaidam sek gual un, nang inle ka thil hi’khialteu ei ngaidam in.

¹³Gilo ding ah thepna hun in ei puilût kin la, gilo lak in ei hukdok zaw’n: Gamte, thil hi’theinate, lopinate, kumtuang in nang â ahi, Amen,” ti in.

¹⁴La chung ua thil hi’khialte la ngaidam ua leh, van ah la Pau chunle nang uh hi’khial hun ngaidam ding ahi.

¹⁵Himaleh, nang un la chung ua thil hi’khialte la ngaidam lo ua leh, van ah la Pau inle nangmau thil hi’khial chu hun ngaidam diak pua’n a.

¹⁶An la ngawl tak ua leh le mi phalêmte gual in ngui mêl pu kiu in; amau chun mi mit mu ah anngawl a hiu kilat theina dingin, a mêl uh a hinâng chiat chuat sek ui. Titakzet in ka hil la hiu, a kipakman uh chu a mu zo tau hi.

¹⁷Nang un vang an la ngawl phat ua leh kijutzol unla, la mai uh phiat thiang un.

¹⁸Chutileh, la Pau a gûk ah um mit mu ah longal chun mihing mit mu in anngawl in kilang pua’n la tiu in, tichun, la thilbawlte a gûk ah a la mupa chun hun din in a.

¹⁹Lei ah nget leh tuiêk in a neksiatna, guchate’n a sukvan ua a gûk theinau ah hin la go uh khol kiu in.

²⁰Van ah nget leh tuiêk in a nêksiat theilona, guchate’n a sukvan ua, a gûk theilonau ah chun la go uh khol zaw tau in.

²¹La go umna taphot un, la lungthim uh le um ding ahi ngal a.

²²Taksa thaumei chu mit ahi. Chutichun, la mit a chîm leh la taksa a pum in a vâk suak hi;

²³la mit a siat leh vang la taksa a pum in a thim zo hi. La sung ah vâk chu thim hitaleh, thim chu nasa na’n ah e!

²⁴Kuama’n hotu pani na a sêmkop thei puai; pakhat muda in pakhat ngaina’n, pakhat â di’n gunchu intin, pakhat simmaw in a. Pathian leh sum na sêmkop thei pua’n lau.

²⁵Ziaziakchun, ka hil la hiu, bang ka ne’n bang ka dawn dia aw, ti’n la hinna thuu leh, bang ka sil in bang ka chêng ta dia aw, ti’n la taksa thuu ah lungkham kiu in. Nêk ding sâng ah hinna lopi zaw hilo a hem? Sil leh chên sâng in taksa a lopi zaw hilo a hem?

²⁶Chunglêng vachate hi en un; bu a tu puau in, a ât diak puau in, bubûk ah a sung lut diak puau hi; himaleh, la pau van ah um chun a vâk ngal a. Nang uh chu amau sâng in gam cheng in, la lûl zawu hilo a hem?

²⁷Nang uh lak ah lungkham ziakin kua a hem ama dunglam tong khat ah hi’sâng thei?

²⁸Chuleh, sil leh chên thu ah bang ding ah lungkham la hiu em? Gamlak ah lili pâkte khan dan hi phatak in ngaituau in; na a sêm puau in, patle a khêk diak puau hi;

²⁹himaleh, ka hil la hiu, Solomon hial le a lopina zosia ah a kithuam khan, ziate lak ah pakhat tuk zo hinle jem in a um puai.

³⁰Hampa tu’ni hing ngal, jing ah thukkhûk ah se’lut ziang ding mai bawn, Pathian in chuti lawm ah a jem chun, aw nang uh ginna tawmte haw, nang uh chu sil leh chên pia zaw ma ma lo ding a hem!

³¹Ziaziakchun, ‘Bang I ne diam?’ a hem, ‘Bang I dawn diam?’ a hem, ‘Bang I sil diam?’ ti thu in lungkham kiu in.

³²Jentelte’n zia zosia chu a hawl sek him ui. Zia zosia chu la tasam ui ti, la Pau van ah um chun a hezing nai.

³³Himaleh, a gam leh a dikna chu hawl masa tau in; tichun, zia thil zosia chule piak belap in um in lau.

³⁴Ziaziakchun, jing â ding chu lungkham kiu in; jing chun ama â ding kilungkham kawm ding ahi ngal in. Ni khat â ding ah ni khat lungkham a hun hi.