Read Vaiphei MARKA 1 Bible Online

MARKA 1 - Vaiphei bible

MARKA 1

¹Pathian Chapa, Jesu Khrista chanchinpha kipatna;

²Jawlnei Isai lekhabu ah chun: “Ngai in, ka sawlchâk la ma’n ka hun sawl a, ama chun la lampi a la sial masa ding ahi.

³Gamthip ah mi kiko aw chun, ‘LALPA lampi sial unla, a lampite chu hi’zang un,’ ” a ti kit hi.

⁴Gamthip ah kipat in Baptispa Johan chu, gitlo ngaidamna ding ah gitlo haisanna baptisma thu gen in a hung pawtdok a.

⁵Tichun, Judea tânggam ah kipat leh Jerusalem khawpi mite chu a hung khawm ua; a gitlonateu puang in, Jordan lui ah chun baptisma a hung chang tau hi.

⁶Johan kivanna chu sangawngsau mul leh savun kawnggâk ah kigâk in, gam bepi leh gam khuaizu a an ahi.

⁷Ama chun, “Ka nung ah hung dingpa chu kei sâng in a lopi zaw’n, a ma-âng ah kûn ah a kengtawdap khau phel tâkle ka hi puai;

⁸keima’n tui in ka hun baptis in, ama chun vang Thagau Thiangtho in hun baptis ding ahi,” a tia.

⁹Zia hun lai ah chun, Jesu chu Galili gam ah Nazareth khua kipat in a hung a, Jordan ah chun Johan in baptisma a chansak a.

¹⁰Tui lak ah kipat a hung pawt daw lai tak ah chun, van hung kihong chu a mu’n; chuleh, Thagau chu vakhu gual in a chung in a hung chu’ suk a.

¹¹Van ah kipat chun aw a hung pawt a, “Nangma hi ka Chapa dawi tak, ka kipakna ma ma chu la hi,” a hun tia.

¹²Ziazaw zaw chun, Thagau in gamthip in a sawldok ngal a.

¹³Gamthip ah chun Setan thep in ni sawmli a um a; gamsa lak in a um ah, vansawlchâkte chun na a hung sep piak tau a.

¹⁴Johan suangkul ah a khum nung un, Jesu chu Pathian gam chanchinpha gen in Galili gam in a hung a:

¹⁵“A hun a buting ta hen, Pathian gam chu a nai tai, la gitlo uh haisan unla, chanchinpha hi ging tau in,” ti’n a gen pan a.

¹⁶Jesu chu Galili Dilpâm ah a vâk vêl lai in, Simon leh a suapipa Andria Dil ah lên sep a vamu’n, amau chu sanga man mi a hiu a.

¹⁷Jesu’n a kiang un, “Ei zui un, mipi man dingin hun siam ing ka,” a tia.

¹⁸Ziaphatchun, amau inle a lênteu chu nusia in a zui ngal tau hi.

¹⁹Zia kipat chu gamla locha a chiau leh, Zebedai chapa Jakob tawh a suapi Johan a kuang sung ua lênsia siampha um chu a mu kit a.

²⁰Amau chule a ko ah; amau inle a pau Zebedai chu kuang ah chun, a mi gawiteu tawh nusia in a zui ngal tau hi.

²¹Kapernaum khua lam in a chiau a; sabbath ni ahi’phatin kikhopna In ah a lut ah, zia tak ah chun thu a gen tai.

²²Ama chun thunei tak gual ah thu gen in, lekhazikte gen dan tawh kibang lo ah a het ziak un, a thu zilsak chu lamdang a sa ma mau a.

²³Ahi’n, zia sunagog ah chun mi pakhat thitha buak vop a um a;

²⁴a hung kikodok a: “Nazareth Jesu, kei haw bang ei law ding la hi em? Ei sumangthai ding ah hung la hi em? Nang, Pathian Mithiangtho la hi ka henai,” ti in.

²⁵Jesu’n ama chu a hun vau a, “A la thip inla, zia pa sung ah kipat khan hung pawtdok in,” a tia.

²⁶Ziaphatchun, thitha buak chun nasa tak in a hun sawisa, aw ngai tak ah kiko in, a pawtdaw san tai.

²⁷A leng un lamdang a sa chiat tau a, “Zia hi bangtidan a hem? Zilsakna zat chuam tak ahi hi! Thitha buakte nasan thunei tak in thu a pia’n, a thu a mat ziang uh hi!” ti’n a kihotua sau sau tau a.

²⁸Tichun, a chanchin chu Galili gam zosia’n a kithang suak tai.

²⁹Sunagog ah kipat a hung pawt phatin, Simon leh Andria te In ah chun Jakob leh Johan tawh a lut un.

³⁰Simon talpinu chu khawsik in a la um a, kin tak in Jesu chu a hung hil pai ua.

³¹Ama chu a hung ah, a khut ah tûk in a kaitho ah; tichun, a khawsik chu thakhat in a hung pha ziang ah; a nêk leh châk diu buaipi in a hung pang ngal tai.

³²Nitâk ah nisa a hung tum phatin, a kiang in damlo leh thitha buak mat tam tak a hun pui khawm un.

³³A khawjang un zia In kot mai ah chun a hung khawm tau a.

³⁴Tichun, natna chi chuam chuam ah na zosia a la hi’dam a, thitha buak matte le a nawdaw piak ah, thitha buakte chun ama a het ziak un, a pau daw ding uh a phal puai.

³⁵A jing ah jingkal, khawvak thian ma in a tho ah, munthip khat in a chia ah, a vapauchap tai.

³⁶Simon leh a kiang ah umte chun a hun hawl zui ngal un.

³⁷Ama a vamu phât un, “Mi zosia’n a hun hawl ui,” a vatiu a.

³⁸Ama chun a kiang un, “Thu ka gentheina dingin mun dang, khaw nai tuam ah chia hitiu; zia chu ka hungpi pen ahi ngal a,” a tia.

³⁹Tichun, Galili gam zosia leh a sunagog teu ah chun thu a gen ah, thithate le a nawdok pek tai.

⁴⁰Zia tak ah chun phâk pakhat a hung ah, a ma-âng ah chun a hung bokkhup ah, “La nop chun lei hi’thiangtho thei hi,” ti’n a hung don a.

⁴¹Jesu’n a lungsiat ma ma ah, a hun khoi a, “Ka nuam hi. Hung thiangtho ta’n,” a hun tia.

⁴²Tichun kin tak in, a phâkna chun a nusia ngal ta’n, a hung thiangtho ngal tai.

⁴³Tichun, thu khau tak ah pekawm in a sawl mang ta’n:

⁴⁴“Kuama kiang in bangma gen kin la; himaleh, chia inla, thiampute vaki-etsak in; Mosi’n hi’ding ah a piak gual khan kisukthianna thillat chu valân in, a hetchianna ding un,” a tia.

⁴⁵Himaleh, ama chu a pawt a, zia thu chu kikopi in a gen jak tai; tichun, Jesu chu mi mu in khua’n a lut thei ta pua’n, munthip in a um zaw tai; himaleh, muntin ah kipat in a kiang in a hung khawm tho tho ui.