Read Vaiphei MARKA 10 Bible Online

MARKA 10 - Vaiphei bible

MARKA 10

¹Zia mun chu nusia in, Judea gam leh Jordan gâl lam in a chia ta’n; chuleh, mipi tam tak a kiang in a hung khawm un; tichun, ahi dan ngai gual in thu a hil a.

²Pharisaite khenkhat a kiang in a hung un, ama ze-etna’n, “Pawsal in a ji a nol a thiang diam?” ti’n a hung dong ua.

³Ama chun, “Mosi’n bang ti’n thu a pe em?” a tia.

⁴Amau chun, “Mosi’n kinolna lekha zik in kinol a phal hi,” a tiu a.

⁵Ahi’n, Jesu’n a kiang un, “La lung uh a tâk ziakin zia thupiak chu a hun zik piak ahi.

⁶Himaleh, siamtil ah chun Pathian in numei leh pawsal in a siam hi.

⁷Ziaziak hin pawsal in a nu leh pa nusia intin, a ji a tûk ding ahi;

⁸amau chu taksa pumkhat hung hita’n au. Tichun, amau chu pani hi talo in, taksa pumkhat hizaw ta’n au.

⁹Ziaziakchun, Pathian in a zop tâk chu mihing in khen ki’hen,” a tia.

¹⁰In sung ah chun a nungzuite’n zia thu chu a dong kit ua.

¹¹Ama chun a kiang un, “Kua’n le a ji a nol ah, midang a kichenpi kit chun, a ji chu a ângkawm san ahi;

¹²numei inle a pawsal a khen ah, midang a kichenpi kit chun, ama chu ângkawm ahi ngal hi,” a tia.

¹³Ama khawi dingin, mipite chun naupangte a hun pui ua; himaleh, nungzuite chun a hun puite chu a la vau un.

¹⁴Ahi’n, Jesu’n zia chu a mu in a lungdam paw ma ma ah; a nungzuite kiang in, “Naupangte kha ka kiang ah hungsak un la, zada kiu in; Pathian gam chu zia gual mite â ding chu ahi ngal a.

¹⁵Titakzet in ka hil la hiu, kua’nle zia naupangte gual ah Pathian gam a la lawp lo ahi chun, a sung ah lut lo hial in au,” a tia.

¹⁶Chun, amau chu a kawi ah, a chung un a khut a nga, maljawlna a pia tai.

¹⁷A kipatdok guat lai tak in, mi pakhat a hung tai ah, a ma-âng in a hung khupdin ah, a kiang in, “Hotupa pha, kumtuang hinna ka nei theina dingin bang ka hi diam?” a hung tia.

¹⁸Jesu’n a kiang in, “Bangatia pha lei ti a hem? Mi pakhat bep lo chu kuama a pha a um puai, zia chu Pathian ahi.

¹⁹Thupiakte la he a pom: Tual that kin, ângkawm kin, Gucha kin, Hiatpitu dik lo in pang kin, Mi dawha bawl kin, La nu leh la pa ja in, ti te hi,” a tia.

²⁰Ama chun, “Hotupa, ziate zosia chu ka neu lai ah kipat ka la zop zaw sik sek ahi tai,” a tia.

²¹Jesu’n ama chu a en ah, a hepi ma ma ah, a kiang in, “Hi’ding pakhat la nei nalai hi; chia inla, la nei zosia vazuak inla, gentheite kiang in pia’n; tichun, van ah go nei in la tin; chuleh, hung inla, ei zui in,” a tia.

²²Ama chu sum tam tak nei ahiziak in, zia thu chu a het phat in a lungngai ta’n, lunggim tak in a chia mang tai.

²³Jesu’n a en vêl ah, a nungzuite kiang ah chun, “Mihausate â ding chun Pathian gam ah lut a haksa na ding e!” a tia.

²⁴Zia thu chu a nungzuite’n lamdang a sau a, ahi’n, Jesu’n a dawnhu kit a, “Naute haw, mi a hausakna ki-ngate â dingin Pathian gam ah lut chu a haksa na e!

²⁵Mihausa Pathian gam a lut sâng in, sangawngsau pin bil hawm ah a lut then a bailam zawi,” a tia.

²⁶A nungzuite chun gen theilo khop in lamdang a sau ah, a kiang ah amau kihotua in, “Chuti ahileh kua a hem hukdam hithei ding?” a tiu a.

²⁷Jesu’n amau chu a hun en ah, a kiang un, “Zia chu mihing â dingin hitheilo ahi, Pathian â dingin vang a hithei hi; bangkim hi Pathian â dingin hi’thei ahi ngal a,” a tia.

²⁸Ziaphatchun Peter in, “Ngaitia kei un bangkim nusia in ka hun zui ui,” a hun tia.

²⁹Jesu’n a dawnhu, a kiang in, “Titakzet in ka hil la hi, kuale a In a hem, a suapipa a hem, a suapinu a hem, a nu a hem, a pa a hem, a ji a hem, a cha a hem, a gam a hem, keima leh chanchinpha ziak ah nusia chu,

³⁰tu’ damsung ma ma hinle, Inte, suapipate, suapinute, nute, pate, gamte, sukgentheina tawh ale’ za khat ah mulo ding a um puau, a hung tung ding kumtuang hinna tawh.

³¹A masa tam takte chu a nunungpen hung hi’n tiu in, a nunung pente chule hung masa’n au,” a tia.

³²Jerusalem lam zuan ah Jesu chu, a malam ua chia ah a zui zing lai un, maksakna dim in a hung lau tau a. Sawm leh nite chu a pui chuam kit ah, a chung ah thil hung tung dingte chu a hil pan kit a;

³³“Ngai un, tu’hin Jerusalem ah chia to ding I hiu; Mihing Chapa hi thiampu lalte leh lekhazikte khut ah matsak in um intin, thi dingin a chung thu tan piak in au; ziazaw chuleh, Jentelte khut ah pedok ding a hiu;

³⁴tawt bawlna’n mang intiu in, chil sekkhum in, jep intiu in, that in au; chuleh, ni thum zaw tak leh hung thokit ding ahi,” a tia.

³⁵Zebedai chate Jakob leh Johan chu a kiang in a hung un: “Hotupa, ka thil dot tapo uh ei hi’piak lechin ka nuam ui,” a hung tiu a.

³⁶Ama chun a kiang un, “Bang hi’piak leng ei ti la hiu em?” a tia.

³⁷Amau chun, “La lopina la um tak leh pakhat la changlam ah, pakhat la veilam ah chu dingin ei phal piak in,” a tiu a.

³⁸Himaleh, Jesu’n a kiang un, “La thil dot uh chu bang ahi la hepuau hi. Ka no dawn ding chu dawn thei ding la hiu ah, ka baptisma chan ding chule chang thei ding la hiu ah a hem?” a tia.

³⁹Amau chun, “Hi’thei ing kau,” a tiu a. Ziaphatchun, Jesu’n a kiang un, “Ka no dawn ding chu dawn in la tiu in, ka baptisma chan ding chule chang ngut in lau;

⁴⁰himaleh, ka changlam leh ka veilam ah chut ding thu chu, keima thu ah ka piak ding ahi puai; guat piak ah umte bep kiang ah piak hiding a hi,” a tia.

⁴¹Zia thu chu sawmkhatte khan a hun het phat un, Jakob leh Johan chung in a lungawi ta puau a.

⁴²Himaleh, Jesu’n a kiang un, “Jentelte chung ah vaihawm ding ah kiguatte chu, a chung un a lal ma ma sek un, a milianteu chun a chung un thu a nei ma ma sek ui, ti la hiau hi.

⁴³Nanghaw lak in vang zia gual chu a hilo ding ahi; kuale la lak ua a lianpen hiding chu, la nasem un a pan diu ahi.

⁴⁴La lak ua kuale a luchang pen hi’nuam chu, la suak ua a pan phot diu ahi.

⁴⁵Mihing Chapa hial hile mite’n ama na a sep piak ding ua hung ahi puai; mi nasep piak ding leh mi tam tak tatna ding ah a hinna pia ding ah hung ahi zawi,” a tia.

⁴⁶Jeriko khua a hung tung tau a. Jesu chu Jeriko khua kipat a nungzuite tawh, mipi tam tak tawh a pawt daw lai un, Timai chapa Bartimai mitthûm chu lam pâm ah khutdaw in a la kichu.

⁴⁷Nazareth Jesu ahi ti a het phat in, “Jesu, David Chapa, ei lungsiat in!” ti’n a kiko a.

⁴⁸Mi tam tak in a la thip hiat hiat dingin a vau un; himaleh, ama chu a kiko ngai zaw diak a, “David Chapa, ei lungsiat in!” a ti kit a.

⁴⁹Jesu chu a hung ding ah, “Ama chu hun pui un,” a tia. Tichun, mitthûmpa chu a hun ko ua, “Thamuang tak in um in, hung dingdok in, a hun ko hi,” a tiu a.

⁵⁰Ama chun a puansil chu a septha vak ah, a kipan ah, Jesu kiang lam a hun zuan tai.

⁵¹Jesu’n a kiang in, “Bang hun bawl piak leng la nuam em?” a tia. Mitthumpa chun, “LALPA, mu’thei ka nuam hi,” a tia.

⁵²Jesu’n a kiang in, “Chia ta’n, la ginna hi la dampi ahi,” a tia. Ziaphatchun, khua a hun muthei ngal ta’n, Jesu a zui ngal tai.