Read Vaiphei MARKA 11 Bible Online

MARKA 11 - Vaiphei bible

MARKA 11

¹Jerusalem a tun ding kuan un, Oliv tâng ah Bethphage leh Bethani khaw kiang in, a nungzuite lak ah mi pani a sawl a.

²A kiang un, “La ma zawn ua khua sawn vachiau inla, khua sung la lut phat phat ua leh, sabiltungno, kuama chuan khâk nailona chu a la kihên vamu’n la tiu in, zia chu hun tham un la hun kai un.

³Kua’nle, ‘Bang ding ah la thap uh a hem?’ a hun tiu leh, ‘LALPA‘n a doina a um ah ahi,’ tileuchin hun phal ngal ziang in au,” a tia.

⁴Tichun, a vachiau a, kotzing paw lam ah, kotkhak bul ah sabiltungno kihên chu a vamuu ah, a tham tau a.

⁵Zia tak ah dingte lak ah khen khat chun, “Sabiltungno chu bangatia la thap uh a hem?” a hun tiu a.

⁶Amau chun Jesu gen gual gual in a gen ua, tichun, a kai uh a phal piak tau hi.

⁷Sabiltungno chu Jesu kiang a hun kai tung phat un, a chung ah a puanteu phâ in, Jesu chu a chuang ta’n.

⁸Mi tam tak in a puanteu lampi’n a la phau a; midang in lam lai ah chun thingsawl a la zau un.

⁹A malam ah chiate leh a nung lam ah hun zuite chu a hung kiko un: “Hosanna! LALPA min ah hung chu a hamphai!

¹⁰I pau David leng gam hung tung chu a hamphai! Van chung sangpen ah khin Hosanna!” a tiu a.

¹¹Jerusalem khua a lut phatin, tempul in a chia a, bangkim a et vêl zaw phatin, nitâk lam le a hung hita’n; tichun, sawm leh nite chu tawh Bethani khua lam in a chia kit tau hi.

¹²A jing ah chun Bethani khua kipat a hung lai un, a gil a hung kial ta’n.

¹³Theichang kung a dua bawk pha tak nei pakhat a vak gâl mu ah; a ga ka mu khâk leh ti’n a vazuan ah, a vatun phatin a dua bep lo ngal bangma a mu ta pua’n, theichang ga hunle chu a hinai paw him a.

¹⁴Jesu’n, “Kuama’n bangtik lai inle la ga ne ta kiu hen,” a tia. Zia chu a nungzuite’n a la hiau a.

¹⁵Jerusalem a hung tung tau a. Jesu chu tempul in a lut ah, tempul sung ah thil zuakte leh chawte chu a hun nawdok ah, dangka thengte dawkan leh vakhu zuakte chutna haw chu a sot pai piak sik sek a;

¹⁶chuleh, tempul sung ah kuama’n van a puak lut lum let uh le a phal ta puai.

¹⁷A kiang ua thu hil in, zia gual hin a gen a: “Ka In chu namtin â ding ah pauchapna In kiti ding ahi, ti zik hilo a hem? Nang un vang gucha hon kikhum khawmna’n la mang ui,” a tia.

¹⁸Zia thu chu thiampu lalte leh lekhazikte chun a het phat un, ama tha theina ding a hawl tau a; mipite chun a thuhil dan chu lamdang a sak ziak un, amau chu a lau tangal un.

¹⁹Nitâk lam a hung hi’phatin khawpi’ kipat chun a nungzuite tawh a pawtdok tau hi.

²⁰Jingkal kit ah theichang kung kiang kha haw malam ah a chia lai un, theichang kung kha a zung tiang ah a la vuai ta chu a muu a.

²¹Peter chun a hun hetdaw phatin a kiang in, “Hotupa, en tia, theichang kung hânsia la law kha a la vuaitha ziang tai,” a tia.

²²Jesu’n a hun dawnhu a, “Pathian ah ginna nei un.

²³Titakzet in ka hil la hiu, kua’nle ginglâ lo ah, zia tâng kiang ah hin, kichawn inla tuisuagiat ah kisep lut in, la tiu chun, la ti gual gual un guitung in a.

²⁴Ziaziakchun, ka hil la hiu, bangkim pauchap ah la dot tapo uh chu, a musa’n kingai ziang un, chutileh mu ziang ding la hiu,” a tia.

²⁵Chuleh, pauchap ding ah la din tak ua leh, mi ngaidam ding la nei ua leh ngaidam phot un; zia tak chuleh la Pau van ah um chun nang uh hi’khialna le ngaidam ding ahi.

²⁶Himaleh, nang un mi la ngaidam lo ua leh, la Pau van ah um chunle la hi’khialnau chu hun ngaidam diak pua’n a, a tia.

²⁷Jerusalem khua lam in a hung kit tau a. Tempul sung ah a vâk vêl lai in, thiampu lalte leh lekhazikte leh upate a hung un;

²⁸a kiang in, “Bang thuneina mang ah zia thilte hi bawl sek la hem? Zia thilte hi’theina hi kua hun piak a hem?” a hung tiu a.

²⁹Jesu’n a dawnhu, “Keima’nle thil pakhat hun dong ing ka, zia chu ei dawnhuu inla, ziazaw tak chuleh keima’nle kua thuneina zia thilte hi bawl sek ka hi hun hil ing ka.

³⁰Johan baptisma bawl kha van ah kipat a hem mihing ah kipat ei hil un,” a tia.

³¹Tichun a kingaituau a, van ah kipat tileuhin la, bang a tia gingcha lo la hiu em? ei ti’ntin,

³²mihing ah kipat, ti ding la, mipi a lau ngal ua; mi zosia’n la Johan kha jawlnei tak tak hi’n a he ngal un.

³³Tichun, “Ka he puau hi,” ti’n a dawnhu tau a. Ziaphatchun, Jesu’n le amau kiang ah chun, “Keima’nle kua thu zia thilte hi ka bawl a hem ti hun hil diak pua’ng ka,” a tia.