Read Vaiphei MARKA 12 Bible Online

MARKA 12 - Vaiphei bible

MARKA 12

¹Ziaphatchun, a kiang un tekhinthu mang in thu a gen pan a: Mi pakhat in grep huan a bawl a; dâi pha tak in a bawl ah, a sûkna khûk dingle pha tak in a siam ah, a vênna ding Insâng le a sa’n; tichun, lou bawlte kiang in a sân in a pedok a, gam gamla takin a zin mang tai.

²A ga law hun ahi’phatin a sân la dingin lou bawlte kiang in a suak pakhat a sawl a.

³Himaleh, zia pa chu a la man in a vuau ah, khutngawn in a chia kitsak tau a.

⁴Ziaphatchun, suak dang pakhat a sawl kit a; ama chu suang ah sep in, a luchang sukliam piak in, mualpho tak in a la bawl kit tau a.

⁵Ziazaw chun midang khat a sawl kit a; zia pa vang chu a la that tau a; zia gual ma chun midang dang le, a khen a la vuau a, a khen a la that tau hi.

⁶A chapa khat neisun a doichuam ma ma chu a um nalai a; ama chu a nunung pen in a sawl ah, “Ka chapa hi vang a la ja deu in au,” a tia,

⁷Himaleh, lou bawlte chun, “Zia hi a go lua ding pa chu ahi; that hitiu, chutileh a go chu chang mai ding I hiu,” a la tiu a.

⁸Tichun, a la man in, a la that tau a; grep huan ah kipat chun a paidok tau hi.

⁹Ahileh, zia grep huan neipa chun bang a hun law ta diam? Hung intin a lou bawlte chu hung sumangthai intin, a grep huan chu midang kiang in pedok ta’n a.

¹⁰Zia gual ah Lekha Thiangtho ah kizik hi a la sim kha lo la hiu em? “Insate’n a doi lo uh suang kha, zia suang ma kha, a kil ah suang phachuam pen a hung hi’n;

¹¹zia hi LALPA thilbawl chu ahi, I mit muu in a lamdang ahi, ti a kizik kha,” a tia.

¹²Zia thu chu amau demna a gen ahi ti a het phat un, ama chu mat a nuam tau a; himaleh, mipite chu a lau tau a; tichun, ama chu nusia in a chia mang tau hi.

¹³Pharisaite khenkhat leh Herod pawl ah mite a thugenna kipat matna ding hawl in a hun sawl ua.

¹⁴A hung tun phat un a kiang in, “Hotupa, midik tak la hi, kuama khawksak chuam la nei pua’n, kuama khen chuam nei diak lo in, thutak in Pathian lampi chu la zilsak zaw sek hi, ti ka hiau hi. Aleh, Kaisar kiang ah leiman piak hi a thiang em, thiang lo?

¹⁵Pia ding ka hiu em, pelo ding?” a hung tiu a. Himaleh, ama chun a dawhau a la hia, a kiang un, “Bangatia ei ze-et la hiu em? Dangka thik denarii khat ei hun etsak tiam un,” a tia.

¹⁶Tichun, a hun lau ah, ama chun a kiang un, “Zia hi kua luchang lim leh kua min a hem?” a tia. Amau chun, “Kaisar,” a tiu a.

¹⁷Ziaphatchun, Jesu’n a dawnhu a, “Kaisar thilte chu Kaisar kiang in piau inla, Pathian thilte chu Pathian kiang in piau in,” a tia. Amau chun lamdang a sa ma mau hi.

¹⁸Ziazaw chun, thawkitna a um puai tite Sadukai haw lak ah khen khat a hung un, zia gual hin a hung dong tau a:

¹⁹Hotupa, Mosi khan zia gual hin a la zik a, “Pawsal khat in cha nei man lo in a ji chu thi’san ta leh, a suapipa’n lua in, chi a suan piak ding ahi,” ti ahi.

²⁰Unau pawsal pasagi a um un, a upa pen chun ji a nei ah, suan bei in a thi ta’n;

²¹chuleh, a pani’na pa chun a lua a, suan bei ma’n a thi kit a; a pathumna pa chunle chutima chun a kichenpi kit a;

²²a pasagina tiang in a kichenpiu a, pakhat chânle suan a nei ta puau a, a tawp in numei chule a hung thi tai.

²³Thawkit hun ah chun ama chu kua pen ji a hita diam? Pasagite chun a kichenpi chiat tangal un, a tiu a.

²⁴Jesu’n amau haw chu a dawnhu ah, a kiang un, “Pathian lekha thu leh Pathian thilhitheina la het lo ziak ua ngaikhial sek hilo la hiu em?

²⁵Mithite a thawkit tak leh vang, kichenpi ti leh kichensak ti bangma um ta pua’n tin; vansawlchâkte gual in um zaw ta’n au.

²⁶Mithi thawkitna thu Mosi lekhabu chun, chîmbuk ah Pathian in, ‘Kei Abraham Pathian, Isak Pathian, Jakob Pathian ka hi,’ tia a gente kha sim kha’lo la hiu em?

²⁷Ama chu mithite Pathian a hipua’n, a hingte Pathian ahi zawi; la ngaikhial nasa ma mau hi,” a tia.

²⁸Chun, lekhazikte lak ah mi pakhat a hung ah, a lawite kinialna chu a la ngaitha zing ah, Jesu’n amau chu a dawnhu dikten hi ti a het phatin, a kiang in, “Thupiak zosia lak in khoi hi a thupi pen diam?” ti’n a hung dong a.

²⁹Jesu’n, “Thupiak lak lak ah thupi pen chu zia hi ahi: ‘Aw Israel, ngai tiam un! LALPA I Pathian uh chu LALPA pakhat bep ahi.

³⁰Ziaziakchun, LALPA la Pathian chu la lunggil zosia’n, la thagau zosia’n, la lungthim zosia leh la hatna zosia’n la hepi ding ahi,’ ti hi.

³¹A zaw ah zia hi ahi: ‘Nangma la kihepi gual in la vêngte le la hepi ding ahi,’ ti hi. Ziate sâng ah thupiak thupi zaw him him a um puai,” ti’n a dawnhu a.

³²Ziaphatchun, lekhazikpa chun a kiang in, “A phai, Hotupa, thudik tak la gen hi: Pathian chu pakhat bep a um in, ama tilo chu a dang a um puai;

³³ama chu lunggil zosia, hetthiamna zosia, thagau zosia leh hatna zosia ah hepi ah, eima kihepi gual ah vêngte hepi chu hâlmang thillat leh kithoina sâng inle a thupi zaw ma ma hi, ti la gen dik hi,” a tia.

³⁴Pil tak in a dawnhu hi ti Jesu’n a mu in, a kiang in, “Pathian gam chu la gamlat ta puai,” a tia. Zia nung ah chun min thu a dong kit ngam ta puau hi.

³⁵Jesu’n tempul ah thu a zilsak lai in, “Bangatileh, lekhazikte khan Messiah hi David Chapa ahi, ti sek a hiu em?

³⁶David khan la, Thagau Thiangtho in, a kam ngei in, ‘LALPA chun ka LALPA kiang ah: La mêlmate la keng nuai ah ka koi piak masia, ka changlam ah kichu’n,’ a la ti’n,” a tia.

³⁷David ngei khan ama chu, “LALPA a ti’n; bangatileh, a chapa hi ziang thei ahi diam?” a tia. Mipi vantangte chun kipak tak in a thugen chu a ngaithau a.

³⁸A thu zilsakna chun, lekhazikte lak ah pilvâng un; amau chun puanâk chual âk ah vâk vêl vêl a nuam un, kaithial lai ah chibai kibûk haw hi a nop lam uh ahi’n;

³⁹sunagog ah chutna hoi pen bang, ankuang ûmna mun hoi pen bang a doichuam sek ui.

⁴⁰Meithâite sum a ne zo un, mi thepna’n sawtpi pi a pauchap ui. Ziate chun thiamlo channa huaisia zaw tuak in au, a tia.

⁴¹Jesu chu thawlawm bawm zawn in a kichu; thawlawm bawm ah mi sum khiak dante chu a en a. Mi hausate chun tam tak tak a khiau a.

⁴²Zia hun ah chun meithâi chaga tak khat a hung ah, sum-eng paisa pani a hung khia, zia chu thik paisa khat tawh kibang bep ahi’n.

⁴³A nungzuite chu a kiang in a ko ah, a kiang un, “Titakzet in ka hil la hiu, thawlawm bawm ah khiate zosia lak in zia meithâi chaga tak hin a khia tam pen hi.

⁴⁴Midang zosia khan a neival uh a khiak uh ahi’n; ama hin chu a nei sun sun, a hinpi ding cheng chu a piak ziang ahi,” a tia.