Read Vaiphei MARKA 14 Bible Online

MARKA 14 - Vaiphei bible

MARKA 14

¹Chiakân kût leh vaithum thawipanglo kût bawlna dingin ni ni a um nalai a. Thiampulalte leh lekhazikte chun, lungthim thiam ah mat ah tha theina ding a hawl tau a;

²himaleh, “Kût ni’n vang hi ki’hen, achutiloleh, mipi lak ah buaina hung um kha’n a,” a tiu a.

³Bethani khua phâk, Simon In ah ankuang a up pet in, numei pakhat spiknard thau gimtui man tam tak, alabastar bûk ah hun chawi in a hung lut ah; a bûk chu a hun tatkêk ah, a luchung ah chun a hun sung a.

⁴Zia tak ah um khenkhatte chu a lungawi ta puau a, “Bangatia, zia sathau hi hiti suk pâmmai mai mai a hem?

⁵Dangka za thum vêl ah zok ah, mi gentheite kiang ah piak zawk ding a hia,” ti’n, ama chu a phun khum tau a.

⁶Jesu chun, “A hi’ hi’ chu hi’sak tau in, bangatia la sukbuai uh a hem? Ka chung ah hin thilpha tak a bawl ahi.

⁷Migentheite chu la kiang un a um zing un, a chung un la nop hun hun un thilpha la bawl piak thei ui, kei vang la lak un um zing lo ding ka hi.

⁸Ama hin a theitawp a sua ahi; ka taksa hi vui dingin thau ei la nu’ khol ahi hilam.

⁹Titakzet in ka hil la hiu, khawvel pumpi chanchinpha kigenna taphot ah, zia a thilbawl hile ama hetzingna dingin gen khawm pek in au,” a tia.

¹⁰Chun, Juda Iskariot, sawm leh nite lak ah pakhat chu ama mat piakna ding lemchâng ngaitua in, thiampu lalte kiang in a vachia a.

¹¹Zia thu chu a la het un a kipak ma mau ah, dangka piak dingin a la tiam tau a. Zia kipat chun a mat ding dan a ngaitua pan tai.

¹²Vaithum thawipanglo Kût bawl ni, ni masa pen ah, Chiakân Kûtna ding gancha a tha niu ah chun, a nungzuite chun a kiang in, “Chiakân Kût jan an nêkna ding mun, ka vachiau ah, ka va guanggalna ding uh chu khoi tak a hem?” a tiu a.

¹³Ziaphatchun, a nungzuite lak ah pani a sawl a, a kiang un, “Khawpi valut leu chin pawsal khat tuibêl pua vamu’n la tiu in, zia pa chu zui unla.

¹⁴Ama lutna In pen ah chun, a Inneipa kiang in, ‘Ka hotupau in, Malzin pindan chu khoi tak a hem, ka nungzuite tawh jan an ka upkhawmna ding uh chu?’ a tii, vati leu chin,

¹⁵ama chun, Indan chungnung lam ah pindan kiningting tak chu hun kawkmu intin, zia tak ah chun va guanggal un,” a tia.

¹⁶Tichun, a nungzuite chu a chiau a, khawpi chun a lut ua, a kiang ua a gen gual gual khan a vamu ngal ziang un; zia tak ah chun Chiakân Kût jan an ding chu a guanggal tau hi.

¹⁷Nitâk ah chun, sawm leh nite tawh a hung khawm tau a.

¹⁸Tichun, a kichuu a, ankuang a hun ûm phat un Jesu chun, “Titakzet in ka hil la hiu, ka an nêkpi, la lak ua pakhat hin ei matsak ding la hiu,” a tia.

¹⁹Amau haw chu a hung lungkham tau ah, pakhat khat in a kiang ah chun, “Kei vang hi pua’ng ka maw?” ti’n a dong chiat tau a.

²⁰Chun, ama chun a kiang un, “Nang uh sawm leh nite lak ah pakhat, ka kuang ei sawkpi pa hi ahi.

²¹Mihing Chapa hi, a chung thu a la kizik gual in um ding him chu ahi; himaleh, Mihing Chapa matsak ding pa chung chu a gik hi! Ama chu a la pianda mai leh ama â dingin phazaw ding ahi,” a tia.

²²Chutia, an a nêk lai ua chun, Jesu’n vaithum chu a la, a maljawl ah, a phelsua ah a kiang un a pia, “La un, zia hi ka taksa ahi,” a tia.

²³Zia gual ma chun, no chule a la, kipak thu a gen zaw in a kiang un a pia, a leng un a dawn chiat tau a;

²⁴Jesu’n a kiang un, zia hi ka thisan, mi tam tak â ding ah pawt, thuthung chu ahi.

²⁵Titakzet in ka hil la hiu, Pathian gam ah a thak ah ka dawn ding ni a tun kit masia, zia grep tui hi dawn kit talo ding ka hi, a tia.

²⁶La pakhat a sak zawu chun Oliv tâng lam in a chiau a.

²⁷Jesu’n a kiang un, “Tu’jan ah hin la leng un ei tai taisan ding la hiu; ‘Belampu chu vua’ng ka tin, belamte chu jam chek sik sek in au, ti kizik gual ah khan’.

²⁸Himaleh, ka hung thawkit nung tak leh, la malam un Galili lam ah a la chia ding ka hi,” a tia.

²⁹Ziaphatchun, Peter in a kiang in, “Midang zosia jam leule kei chu jam pua’ng ka,” a tia.

³⁰Jesu’n a kiang in, “Titakzet in ka hil la hi, Tu’ni, tu’jan ngei ngei ah hin, âk nivei a khuan ma’n thumvei ei kilepsan ding la hi,” a tia.

³¹Himaleh, ama chun, titakzet in a gen a, “La thi thina thi ding hiziang lengle hun kilepsan lo hial ding ka hi,” a tia. Zia gual chun a hun ti chiat un.

³²Ziazaw chun, Gethsemani a tiu mun chu a tung ua; a nungzuite kiang ah chun, “Ka pauchap sung in zia tak ah hin a la chuu in,” a tia.

³³Peter, Jakob tawh Johan chu a pui chuam ah, nasa tak ah thavai in a lungkham ma ma a.

³⁴Ziaphatchun, a kiang un, “Thivang hial ah lunggim ka hi, zia hin a la um unla, a la hak zing un,” a tia.

³⁵Chun, a malam deu un a vachia a, leitual in a kiseppai ah, a thei ahileh zia hunbî chun a pêltheina dingin a pauchap a:

³⁶“Abba, he pa, nang â dingin thil bangkim hi’thei ahi’n, ziaziakchun, zia no hi ei lakmang piak mai in; himaleh, keima thu hilo in, nangma thu hizaw hen,” a tia.

³⁷Chun, a hung ah, amau haw chu ipmu’n a hung mu ta’n, Peter kiang in, “Simon, ipmu la hi maw? Dakkâl khat sung ziang le hak zo lo la hi em?

³⁸Thepna la lut lona ding un kiging zingin pauchap un, thagau in vang a ngapcha’n, taksa vang a hat lo ahi,” a tia.

³⁹Chun, a vachia kâng deu kit ah, a gen ngai ma kha gen in a vapauchap kit a.

⁴⁰A hung kit ahileh amau haw chu ipmu ma’n a hung mu kit ah, a i-mut uh a suak ma ma ngal ua, dawnhu ding dan le a he ta puau hi.

⁴¹A hung kit thumveina chun a kiang un, “Ipmu ah kichawl zing nalai ding la hiu em? tu’hin vang a hun ahi tai, a hun tung ma ahi tai; Mihing Chapa hi migilote khut ah matsak ah um ding ahi tai.

⁴²Kipan unla, chia tai tiu, en tiam un, ei matsak ding pa saw a hung tung ding ma ma ahi tai,” a tia.

⁴³Zia thu a gen lai tak chun, Juda chu a kiang a hung tung ngal ta’n, ama chu sawm leh nite lak ah pakhat kha a hia. Ama’n a hun pui Thiampulalte leh lekhazik upate tawh mipite chu, chemjam tawh, khetbûk tawh a hung tung ngal tau hi.

⁴⁴Ama matsak ding pa chun a kihiat tuana ding un, “Ka chawp pen pen chu hiding ahi, zia mi chu man in, bit tak in pui mai un,” a la ti’sa ahi.

⁴⁵Tichun, a hung tun phatin a hun zuan a, “Hotupa,” ti’n a chawp a.

⁴⁶Tichun, ama chu a man ua a pui tau hi.

⁴⁷A kiang ah ding pakhat chun a chemjam a hun jukdok ah, thiampu lianpen suakpa chu a hun sat leh, a bil a satthâk piak a.

⁴⁸Ahi’n, Jesu’n a kiang un, “Suammang man ding gual ah ei man ding ah chemjam tawh, khetbûk tawh hung kuan la hiu maw?

⁴⁹Tempul ah thu zilsak ah ka um lai khan la lei man puau a; himaleh, Pathian Lekha thu chu a guitung ding him ahi,” a tia.

⁵⁰A leng un ama chu jamsan in, a tai mang tau hi.

⁵¹Chun, tangval kua a hem pakhat hin, puan malngat bep sil in a hun zui ah. Ama chu a la man ua,

⁵²ahi’n, a puan malngat sil lai chu nusia in, a ngawn chang in a tai mang tai.

⁵³Tichun, Jesu chu thiampu lianpen kiang in a pui un; thiampu lalte, upate, lekhazikte a hung khawm un.

⁵⁴Peter in gamla tak in a zui a; thiampu lianpen In tiang in a zui tung a; zia tak ah chun vêngtute tawh mei awi in a kichuu a.

⁵⁵Thiampu lalte tawh vaihawm pawl zosia chun Jesu chu a tha theina ding un, a hêkna ding a hawl ua; himaleh, a mu zo puau a.

⁵⁶Mi tam tak in juau in suanlam a siam ua; himaleh, a suanlam siamteu chu a kituak thei puai.

⁵⁷Dik lo tak ah hêk ding kua lawi a hem khat a hung kipan un, hiti hin a tiu a:

⁵⁸“Zia pa hin, ‘Zia tempul khut ah kisa hi susia’ng ka tin, khut ah sak lo, ni thum sung in tungding ing ka,’ a tii,” a tiu a.

⁵⁹Himaleh, chutichun le a hêkna thuu chu a dik thei diak puai.

⁶⁰Ziaphatchun, thiampu lianpen chu a lak un a hung ding ah, Jesu kiang ah chun, “Bangma dawnhuna ding neilo la hem? Bang a hem a hun heknau hi?” ti’n a dong a.

⁶¹Himaleh, ama chu a thip bik bek ah, bangma cha’n a dawnhu puai. Ziaphatchun, thiampu lianpen chun a dong kit a, “Messiah, Maljawlna Chapa chu la hi em?” a tia.

⁶²Jesu chun: “Ka hi. Dan tak leh Mihing Chapa hi, thil hitheipa khut changlam ah kichu, van sûmpi ah hung suk, hun mu ding la hiu,” a tia.

⁶³Ziaphatchun, thiampu lianpen chun a puan a hun botthêk ah, “Hêkna dang bang a kul nalai em?

⁶⁴A Pathian gensiatna nangmau ngei inle la he tau hilo maw? Bangti’n la ngai awm?” a hun tia. A leng un ama chu thitâk in a guat tau hi.

⁶⁵Khenkhat in a chil uh sekkhum in, a mai a tuam piak ua; a bêng un, a hil lut lut un, “Thu gen in,” a tiu a. Vêngtute chun a tûk kawm un a bêng malam pek tau a.

⁶⁶Peter chu nuai lam Intual ah a um pêt in, thiampu lianpen suak numeite lak ah pakhat a hung a.

⁶⁷Peter mei-awi chu a mu phât in a vak en a, “Nangle Nazareth Jesu lawite hilo la hem?” a tia.

⁶⁸Ama chun, “La thugen chu ka hekha puai, a ngaina le ka hepuai,” ti’n a kilep ah, Intual lam in a vapawt ah, tichun, âk a hung khuang tai.

⁶⁹Chuleh, numei chun a hun mu kit phatin, a kiang ah dingte kiang ah chun, “Zia pa hile a lak ua mi ahi,” a tia.

⁷⁰Himaleh, a kilep kit a; chuleh, sawt lo nung in a kiang ah dingte chun Peter kiang in, “Nangle a lak ua mi la hi ngei hi, Galili mi la hingal in,” a tiu a.

⁷¹Himaleh, ama chun, “Zia la mi gen pau chu ka he him him puai,” ti’n a kikhâm hial a.

⁷²Zia lai tak chun âk a ni veina a hung khuang tai. Ziaphatchun, Peter in a kiang ah Jesu’n a gen: “Nang in âk nivei a khua’n ma’n thumvei ei kilepsan ding la hi,” a ti kha a hun hedok ta’n; tichun, leitual ah kichu suk in a kap tai.