Read Vaiphei MARKA 2 Bible Online

MARKA 2 - Vaiphei bible

MARKA 2

¹Ni bang jat a hem zaw in Kapernaum khua a hung lut kit a, In ah chun a um hi ti thu a hung thang a.

²Tichun, kotkhak bul ah le umna ding umlo khop hial in, mi tam tak a hung khawm tau ah; a kiang un thu a hil tai.

³Chuleh, zeng pakhat, mi pali’n lâng ah zawn in a kiang in a hun pui ua.

⁴Mipi ziak ah a kiangnai ah a hung lut theilo phat un, a umna Inchung chu a phel tau a; a phiat awng phat un zeng chu a lupna phêk pum in a hun khaithau a.

⁵Jesu’n a ginnau chu a la mu phât in, zeng kiang ah chun, “Ka chapa, la gitlona ngaidam ahi tai,” a tia.

⁶Himaleh, lekhazikte khenkhat zia chun a chuu a, a lungthim un,

⁷“Bangatia, zia pa hin zia gual ah hi thu gen a hem? Pathian gensia ahi chu lam! Pathian tilo ngal kua a hem gitlona ngaidam thei?” a tiu a.

⁸Jesu’n zia gual ah a ngaituau chu a lungthim in a he pai ah, a kiang un, “Zia thu chu bangati leh la lungthim ua ngaitua la hiu em?

⁹Zeng kiang ah, ‘La gitlote ngaidam ahi tai,’ ti leh, ‘La lupna phêk la’n la, keng in chia ta’n,’ ti hi khoi zaw a gen bailam zaw em?

¹⁰Banghitaleh, khawvel ah hin Mihing Chapa hin gitlo ngaidam theina a nei hi ti la hetna ding un;

¹¹zeng kiang ah chun, ‘Tho inla, la lupna phek la’n la, la In lam in chia ta’n,’ a tia.

¹²Tichun, ama chu a tho ah, a lupna chu a la, a leng ua mit mu in a pawtdok ta’n, a leng un mak a sa ma mau ah, Pathian a chawihoi tau a, ‘Zia gual him him hi I la mu ngai puau hi’ ” a tiu a.

¹³Jesu chu, Dil pang ah chun a pawt kit ah, mipi zosia chu a kiang in a vachiau ah, thu a hil ta’n.

¹⁴A chia kawm in, Alphâi chapa Levi chu sedawlna mun ah kichû a mu’n; a kiang in, “Ei zui in,” a tia. Ama le a kipan ah, a zui ngal tai.

¹⁵Chuleh, Jesu chu Levi In ah an ne ding ah a chut lai in, sedawlte tam tak leh, migilote tawh a nungzuite an nekhawm in a um un; ama zui chu a tam ma mau a.

¹⁶Lekhazikte leh Phasrisaite chun, sedawlte leh migilote tawh an a nêk khawm uh chu a muu in, a nungzuite kiang ah chun, “Bangatia, sedawlte leh migilote tawh an nekhawm ziang a hem?” a hung tiu a.

¹⁷Jesu’n a het phat in, a kiang un, “Mi damtheite’n daktor a ngai puau in, mi damtheilote’n a ngai sek ui; midikte ko ah hung ka hipua’n, migilote ko ah hung ka hizawi,” a tia.

¹⁸Johan nungzuite leh Pharisaite’n an a ngawl sek un; mipite a kiang in a hung ua, “Bang ding ah Johan nungzuite leh Pharisaite’n anngawl sek ngal in, la nungzuite hin anngawl sek lo a hiu em?” a hung tiu a.

¹⁹Jesu’n a kiang un, “Moneipa chu a kiang ua a um laisia mo lawmte’n an a ngawl ngai sek ua a hem? Mo neipa chu a lak ua a um sungsia chu a ngawl ngai puau hi.

²⁰Ahi’n, moneipa chu amau ah kipat pui mang ni hung tung intin, zia phat chuleh vang, hun ngawl ta’n au.

²¹Kuama’n puan lui puan thak them in a phaw ngai puau hi; phaw ta mawng leu le, a phawnau a thak chun a lui chu kai ek zaw ding a hia, a siatna chu khawk zaw ding ahi.

²²Chuleh, kuama’n uain thak chu a thawl lui in a thun ngai puau hi; thun taleu chu, a uain thak chun a thawl lui chu phujak mai ding ahi; tichun, a uain chu kibua zo intin, a thawl lui chule sia ta’n a; ziaziakchun, uain thak chu a thawl thak ah thun ding ahi,” a tia.

²³Chun, sabbath ni khat ah loulai a haw malam lai un, a nungzuite chun a chia kawm un buvui a jut malam un.

²⁴Pharisaite chun a kiang in, “Bangatia sabbath ni hi’thianglo chu hi’ ziang a hiu em?” a hung tiu a.

²⁵Jesu’n a kiang un, “David leh a lawite a basap ua, a gilkial lai ua a thil hiu kha sim kha lo la hiu em?

²⁶Abiathar thiampu lianpen ahi lai ah, Pathian In sung ah lut ah, thiampute longal in nêk thianlo vaithum kikoi chu a la nêk ah, a lawite le a piak thu kha?

²⁷Mihing hi sabbath ni â ding ah siam a hipua’n; sabbath ni hi mihing â ding ah siam ahi zawi.

²⁸Ziaziakchun, Mihing Chapa hi sabbath ni chung ah le Lal ahi,” a tia.