Read Vaiphei MARKA 5 Bible Online

MARKA 5 - Vaiphei bible

MARKA 5

¹Dil gâl langkhat lam, Gerasin gam chu a hung tun phat un,

²kuang ah kipat a hung pawtdaw phat ah chun mi pakhat, thitha buak vop, thân ah kipat hung pawt tawh a kituak ngal ziang un.

³Ama chu thân lak ah te chu um sek ahi’n; kuama’n thikkhau ah le a hên zaw lo uh ahi.

⁴Tamvei tak kol leh thikkhau in a hên tau a, himaleh, a thikkhaute chu bottan in, a kolte chule a hisia mai sek a; kuama’n a thâtzaw lo uh ahi.

⁵A sun a jan in tâng gam leh a umna thân lak ah chun a kiko ko sek a; ama leh ama suang in a ki-âtliam sek hi.

⁶Gamla tak ah Jesu a mu phât in, a del ah, a ma-âng in a bokkhup ah,

⁷“Tichun, aw ngai tak in a hung kiko a; Jesu, Chungnung pen Pathian Chapa, bang ei law ding ah hung la hem? Ei sawisa lo ham ham dingin Pathian min in ka don la hi,” a tia.

⁸“Nang thitha buak, zia pa sung ah kipat hin hung pawt in,” Jesu’n a la ti ziak ahi.

⁹Jesu chun, “La min bang a hem?” a ti leh, ama’n, “Ka min chu Nuai a hi; tam tak ka hi’ziak un,” a tia.

¹⁰Chuleh, a gam ua kipat nawmang lo dingin a don a.

¹¹Tâng pang ah gamla lo cha ah chun vok hon tam tak a tau a;

¹²thitha buakte chun, “Zia vokte sung ah son ka luttheina ding un ei sawl mai in,” ti’n a don tau a.

¹³Tichun, Jesu chun a phal piak ah, thitha buakte chu a hung pawt ua, vok hon sang ni vêl ding sung ah chun a lut tau a; ziaphat chun vokte chu kenliang ah taitha suk in, dil ah tui hap vâ in a thi tau hi;

¹⁴Vokchingte chu a tai ua, khawpi sung leh gam sung in a vagen tau a; thil umdan en dingin mipite chu a vachia sau sau tau hi.

¹⁵Jesu kiang in a hung ua, thithabuak voppa kha lungthim lamzang tak leh, puan pha tak ah sil ah a la kichu a vamuu ah; a lau ma mau hi.

¹⁶Thil umdan mute zosia chun, zia thitha buak voppa leh vok honte chung ah thil umdan chu a genjak tau hi.

¹⁷Jesu chu a gam ua kipat chia mang dingin a don tau a.

¹⁸Kuang ah a hung lut pêt chun, zia thitha buak a la voppa khan ama kiang ah um zing ding a hung don a.

¹⁹Himaleh, Jesu’n a phal pua, a kiang in, “La In lam ah la gualte kiang in chia inla, LALPA‘n nang â ding ah thil a hun bawl piak a lopi dan leh a hun hepi dan hi vagen in,” a ti zaw tai.

²⁰Ama le a chia ah, Dekapolis khua lam ah chun, Jesu’n ama â ding ah thil lopi tak a bawl piak dan chu a vagen pan ngal ta’n; mi zosia chun lamdang a sa ma mau hi.

²¹Jesu kuang ah Dil gâl langkhat lam a hung kai kit phatin, mipi tam tak a kiang in a hung khawm ua; ama dil pâm ah chun a um a.

²²Sunagog ah hotu pakhat, a min Jaira chu a hung a, Jesu a mu phât in a kengbul ah a bokkhup a:

²³“Ka chanu naupangcha a thi vâng vâng ah, a hung damdaw kit theina dingin, a chung ah la khut hung nga dingin ka ni hi,” ti’n a don a.

²⁴Jesu chu ama tawh kiton in a chia tai. Mipi tam tak in a zui ua, a tuam hut hut un.

²⁵Chuleh, numei pakhat kum sawm leh ni thipût a um a.

²⁶Daktor tam tak kiang in nasa tak in sum a sêng ta’n, a nei zosia a sumang zo ta, phatchuam nâksâng in a khawk zaw deu deu a.

²⁷Zia nu chun Jesu chanchin a la het in, a nung ah mipi lak ah chun a hung ah, a puan chu a them ta’n:

²⁸“A puan bep hi khoi lengle dam mai ing ka,” a tia.

²⁹Tichun, phutlo halo in a thipût chu a kang ngal ta’n; a natna chu sukdam ahi tai ti a taksa’n a kihe ngal tai.

³⁰Ziaphatchun, Jesu’n ama thilhitheina a pawt hi ti a hun he, mipi lak ah chun a hung kihei a, “Kua a hem ka puan khoi kha?” a hun tia.

³¹A nungzuite chun a kiang in, “Mipi’n a hun tuam hut hut la mu ngal a, bangtidan ah kua a hem ei khoi kha ti’thei la hem?” a tiu a.

³²Jesu chun zia nu chu mu tei gua’n a en vel a.

³³Zia numei chun a chung ah thil tung chu a het ziakin, lau leh kithing kawm kawm in a hung ah, a ma-âng ah chun a hung bokkhup ah, thil umdan chu a gen tai.

³⁴Ama chun, a kiang in “Ka chanu, la ginna chu la dampi ahi, thamuang tak in chia ta’n, la natna ah kipat chun a la damden ta’n,” a tia.

³⁵Thu a la gen lai tak ah chun, sunagog ah hotupa In ah kipat mi pakhat a hung a, “Hotupa chu sukbuai dâ ta’n, la chanu kha a thi tai!” a hung tia.

³⁶Zia a thu gen chu Jesu’n a het phat in, sunagog ah hotupa kiang ah chun, “Lau kin la, gingcha mai in,” a tia.

³⁷Ziaphatchun, Peter, Jakob tawh, Jakob suapipa Johan tilo ngal kuama dang in a zui ding uh a phal puai.

³⁸Tichun, sunagog hotupa In ah chun a lut ah, mipi buai veng vung leh kap leh mau chu a mu’n.

³⁹A hung lut phat chun a kiang un, “Bangatia chuti buai ah, kap veng vung la hiu em? Zia naupang hi a thi ahi puai, a ipmu ahi zawi,” a tia.

⁴⁰Amau chun a nuisan ua. Amau haw chu a pawt dawsak ah, chuleh, zia naupang nu leh pa chu a pui ah, a kiang ah umte tawh, naupang lupna pindan ah chun a lut ua.

⁴¹Zia naupang chu a khut in a vak kai ah, a kiang ah chun, “Talitha-kumi,” a tia; zia chu, “Bawinu, hung tho in,” ti’na ahi.

⁴²Ziaphatchun, naupang chu a hung thodok ah, a keng in lam a hun jawt tai; ama chu kum sawm leh ni mi a hia; lamdang a sa ma ma ziang ui.

⁴³Amau kiang in zia thu chu, kuama hetsak lo dingin a khâmchak kei ah; a nêk ding bang a hem khat pia ding in a hil tai.