Read Vaiphei MARKA 6 Bible Online

MARKA 6 - Vaiphei bible

MARKA 6

¹Zia kipat chun a pawtdok ah, ama khua Nazareth lam in a chia ah; a nungzuite chun a zui pek un.

²Sabbath ni chun sunagog ah thu a hil ah, a thugen hekhate chun lamdang a sau a: “Zia mi hin khoi ah kipat zia tawhbang thu hi a het a hi diam? A khut ah zia gual thilhitheina piak ah a um ziang hi, khoi lam ah kipat pilna mu ahi diam?

³Thingbawl thiampa leh Mari chapa Jakob, Josia, Juda leh Simon suapipa kha hilo a hem? A suapinute le zia hi um hilo a hiu em?” a tiu a, a lung uh a dam ta puai.

⁴Himaleh, Jesu’n a kiang un, “Jawlnei chu ama khua lam ah, ama chanaute lak leh, ama Inkuante lak ah tilo ngal chu chawihoi lo in a um ngai puai,” a tia.

⁵Damlo tawmchate chung ah a khut ngat ah a hi’dam tilo ngal, zia tak ah chun thil thupi bangma a bawl puai.

⁶A ginchâk lo dan uh chu mak a sa ma ma a. Tichun, a kiangnai tuam ah khawneute chun a chia ah, thu a hil pek a.

⁷A kiang in sawm leh nite chu a ko chuam ah, pani ni’n a sawldok a; thitha buakte chung ah thilhitheina a pia.

⁸A khualzinna ding ua chun, tiangkhut longal bangma dang, dip le, vaithum le, sakhau ah dangka le keng lo dingin thu a pia;

⁹kengtawdap bep keng ah, puanâk chungle a thua ah ken lo ding a tia.

¹⁰A kiang un, “Khawi tak hilehle, la lutna taphot un la kipatdaw kit masiau tungden sek unla.

¹¹Kuale nangmau hun lawp lo ah, la thugenteu le ngai nuamlote chu, amau in a maw kipuak ding ahi dan uh hiatsakna dingin, la keng ua leivui thinthâk khum malam sek un,” a tia.

¹²Tichun, a kuandok tau a, mite’n a gitlonau a haisan theina ding un thu a vagen tau a.

¹³Thitha tam tak le a vanawdok ua, damlo tam tak le sathaunu’ in a hi’dam ui.

¹⁴Jesu min chu gam tin ah a kithan tâk ziakin, a chanchin Lengpa Herod in a la he ta’n; mi khenkhat in, “Baptispa Johan kha hung tho dawk kit ah, thil lopi tak tak hun bawl ahi,” a tiu a.

¹⁵Mi khenkhat in, “Elijah hi’n ah,” a tiu a. Midangte chun, “Jawlnei a hem, ahiloleh, jawlnei tawhbang khat hi’n a,” a tiu a.

¹⁶Herod in zia chu a la het phat in, “Johan, a gawl ka tan ngei kha a hung thokit ta ahi chu!” a tia.

¹⁷Herod in a suapipa Philip ji, Herodias a la kichenpi ziakin, Johan chu man in suangkul in a la khum ahi tai.

¹⁸Johan chun Herod kiang ah khan, “La suapipa ji la kichenpi hi a thiang puai,” a la ti ziak ahi.

¹⁹Ziaziakchun, Herodias khan a la muda in, a that nuam ten ten ah, himaleh, a that thei puai.

²⁰Herod chun Johan chu midik leh mi thiangtho ahi dan a het ziakin, pha tak in a vênbitsak ah; a thu gen a ngai phat leh a lungjing sek a; himaleh, a ngai nuam ma ma sek ngal a.

²¹Herod in a pianchampha ni chun, a miliante, a sepai hotuliante leh Galili gam ah miliante â dingin luaithe’na a bawl lai in hun lemchâng a hung um ta’n.

²²Herodias chanu chu a hung lut ah, a hung lâm ah, zia chun Herod leh a kiang ah umte chu a kipaksak ma ma ziang a; ziaphatchun, Lengpa’n naupangnu kiang ah chun, “La dawi pen pen gen in,

²³banghilehle, la dot chu hun pia ziang ding ka hi, ka lenggam kimkhat hial le hun pia ziang ing ka,” ti’n thu a tiam tai.

²⁴Ziaphatchun, ama chu a taidok vak ah, a nu kiang in, “Bang ka don diam?” a vatia. A nu chun, “Baptispa Johan luchang hun don in,” a tia.

²⁵Lengpa kiang lam in a hung tai kit a, “Tu’ ma ma hin Baptispa Johan luchang kuang in ei pia’n,” a ti tai.

²⁶Lengpa chu a lungkham ma ma ziang a; himaleh, a thutiamte leh a kiang ah chute ziak ah chun a nial nuam ta pua’n;

²⁷ama vêngte lak ah sepai pakhat chu Johan luchang vala dingin a sawl a. Ama chule a chia ah, suangkul ah um chu a lu a vatan piak a,

²⁸a luchang chu kuang in a hun dom ah, naupangnu kiang in a hun pia tai. Ama chun a nu a pesawn tai.

²⁹A nungzuite’n a chanchin chu a het phat un, a luang chu a lau ah, thân in a vasial tau hi.

³⁰A nungzuite chu Jesu kiang in a hung tung khawm kit tau a, thil a vahi danteu leh thu a vagen danteu haw a gen tau a.

³¹Ama chun a kiang un, “Hung unla, munthip ah chomkhat hung chawlnga ta diu in,” a tia. Zia tak ah chun mipi chiatua veng vung a tam ta luau ah, an nasan le a ne man puau hi.

³²Tichun, kuang in a chuang ua, gamthip lam in a chia chuam tau hi.

³³Mipite chun a chia pêt chu a muu ah, mi tam tak in amau chu a hiau ah, khawtin ah kipat in zia mun ah chun keng in a tai khawm un, amau sâng in a la tung masa zaw tau a.

³⁴Kuang ah kipat a hung pawt daw leh, mipi tam tak chu a hun mu ta’n, a lungsiat ma ma ah, amau haw chu a ching ding umlo belam gual in a mu’n; tichun, thil tam tak a hil tai.

³⁵Nitâk lam in a nungzuite a hung ua, “Zia tak hi gamthip mun ahi’n, khuale a vaigei tangal in;

³⁶I kiang nai tuam ua khuate ah hin sawl inla, zia khawneucha cha haw ah sawn a nêk ding uh vaithum bangma va kichawk leu pha’n ah, nêk ding bangma a nei pawngal un,” a vatiu a.

³⁷Ama chun a kiang un, “Nang un a nêk ding uh piau in,” a tia. Amau chun a kiang in, “Ka vachiau ah, dangka denarii za ni man vaithum ka vachawk ua, nêk ding ka piak diu ahi diam?” a tiu a.

³⁸Ama chun, “Vaithum bang jat la nei awm hun en tiam un,” a tia. A nei zat uh a het phat un, “Vaithum panga leh sanga pani,” a tiu a.

³⁹Ziaphatchun, a pawl pawl ah hampa hing chung ah kichutsak ding in thu a pia.

⁴⁰Tichun, za khat gualte leh sawmnga gualte’n a hung kitiang tau a.

⁴¹Vaithum panga leh sanga pani chu a la, van lam a en ah, mal a jawl ah, vaithumte chu hawm dingin a pia; zia sanga pani chu tawh, a leng ua lak in a hawm suak tau a.

⁴²A leng un a ne chiat ua, a vâ chiat tau a;

⁴³vaithum nên leh sanga nên a nêkbang uh bawm sawm leh ni a luak dim kit tau a.

⁴⁴Vaithum nete chu pawsal piting ziang le sang nga a hiu hi.

⁴⁵Mipi a sawl mang nung in, a nungzuite chu Dil gâl langkhat lam, Bethsaida lam ah kin tak ah chia masa dingin a sawl a.

⁴⁶Mipite chu a sawl mang nung in tâng lam ah pauchap dingin a chia tai.

⁴⁷Nitâk lam a hung hi in kuang chu Dil lailung in a um nalai ah, ama vang ama ngawn in mualkâng in a um hi.

⁴⁸Amau kha a la kitawl pek ua; himaleh, hui in a le’lam lam ah a mut ziak in, a kuang jap uh chu a gim ma ma ziang ui ti a mu zing ziakin, jingkal phalvak ding vêl in Dil chung ah chun keng in a hung a; amau chu chia thensan a gua.

⁴⁹Himaleh, tui chung ah keng ah hung chu a mu phât un, thitha hi’n ah, a ti ziak un a kikojak ziang tau a;

⁵⁰ama chu a mu chiat un, a tiza ma mau a. Ama chun kin tak in a hun ho a, “Thamuang tak in um un, keima ka hi, lau kiu in,” a hun tia.

⁵¹Kuang sung ah a kiang ua a valut phatin, hui chule a thip tai. A lungthim tak un lamdang a sa ma mau ah, mak a sa ma mau hi.

⁵²A lung uh a ngong ziakin, vaithum thu kha le a ngaitua pha ta puau hi.

⁵³Gâl langkhat lam a hung kai un, Genesaret gam a tung ua, a kuang uh tuipi gei in a hên tau hi.

⁵⁴Kuang ah kipat a hung pawtdawu leh mipite’n ama a la he ngal un,

⁵⁵zia gam kîmvêl cheng ah mite chu a tai vêl pai un, a umna a hetna lam lam un damlote chu phêk in a hun jawn ua.

⁵⁶Khawlian leh khawneu a chiana lam lam ah chun, damlote chu kaithial munte’n a lupsak ua, a puan mong bêk khoi ding a don tun tun un; chun a khoi kha taphot chu a dam pek tau hi.