Read Vaiphei LUKA 10 Bible Online

LUKA 10 - Vaiphei bible

LUKA 10

¹Ziazaw chun, LALPA‘n midang sawmsagi a têldok a; ama chia guatna khua tin ah chun pani ni’ kiton dingin a sawl masa’n.

²A kiang un, “Bulâk ding a tam ma ma in, a nasemte vang a tawm ui; chutichun, a ât ding ah nasemte hun sawl dingin bu neipa kiang ah chun don un.

³La chiana ding lam un chia kin un. Ngai un, ngei hon lak ah belamno gual in ka hun sawldok la hiu hi.

⁴Dangka dip, sakhau leh kengtawdapte keng kiu inla, lampi’nle kuama chibai bûk malam kiu in.

⁵Kua In hilehle, la lut masakna taphot ua chun, ‘Zia In ah hin thamuanna tung hen!’ ti sek unla.

⁶Thamuang tak ah hun zintun a um uh chun, la thamuanna thuu chu zia mipa chung ah chun um den intin; zia gual mi chu a umlo ahileh vang, nangmau kiang ah hung kile’kit ding ahi.

⁷La tunna ngai un tung zing unla, a hun piak tapo uh chu ne’n, dawn mai un; nasemte chu law mu tâk ahi ngal a. In chuam chuam in kichawn vêl vêl kiu in.

⁸Khawpi la lut ua a hun lop tapote chun nêk ding a piak taphot uh chu ne ziang unla;

⁹damlo umte chu sudam unla, a kiang un ‘Pathian gam chu la kiang hung tung ding ahi tai’ tiu in.

¹⁰Himaleh, khawpi la lutnau ah chun a hun lawp lo ua leh, zia khawlai ah chun pawtdok unla:

¹¹La khawlai leivui uh ka kengpêk ua bek hile nanghaw demna dingin, la chung un ka hun thinthâk khum la hiu. Ahi’n la, Pathian gam chu la kiang ua hung tung ding ahi tai ti hiau in, ti malam pek un,” a tia.

¹²Ka hil la hiu, zia ni ah chun zia khawte thok sâng ah chun Sodomte thok ding chu a dân um jaw’n a.

¹³Korazin, la chung a gik hi! Bethsaida, la chung a gik hi! La sung ah thil lopi tak kibawlte hi Tura leh Sidon ah a la kibawl hileh vang, saidip puan kisil in, vut kibuak khum in a gitlonateu a la haisan zo ta ma ma in au!

¹⁴Himaleh, vaihawmna hun ah chun, nangmau thok ding sâng in Tura leh Sidon thok ding chu a dân um jaw’n a.

¹⁵Nang Kapernaum, van tiang in choisa’n hiding la hem? Mithi khua tiang ah sotthâk ah um ding lei vei!

¹⁶Kuale nang uh thu ngai tapo chu keima thu ngai hi’n tiu in; nang uh hun musit chu keima ei musit hi’n au; kuale keima ei musit chu ei sawlpa musit ahi, a tia.

¹⁷Tichun, sawmsagite chu kipak tak in a hung tung kit tau ah; a kiang in, “Lalpa, thitha buakte natiangle la min in ka thu thuu in a um ziang ui!” a hun tiu a.

¹⁸Himaleh, ama’n a kiang un, “Setan van ah kipat kawlphe gual ah hung ketha ka mui.

¹⁹Ngai un, gûlte, ainuvette chotden theina leh mêlma chung ah thuneina ka piak la hiu; bangma’n hun hi’liam thei pua’n au.

²⁰Thithate la thu thuu ah a um ziak un kipak ziang kiu inla, van ah la min uh zik ahi ziakin kipak zaw tau in,” a tia.

²¹Zia lai tak ah chun, Jesu chu Thagau Thiangtho in a hung kipak ma ma ta’n: “Aw he pa, lei leh van Lalpa, zia thilte hi mipilte leh mithiamte lak ah la îm ah, nausente kiang ah la puandaw ziak hin, la chung in ka kipak hi; ahi ngût hi, He pa, namgma mit mu ah ziate chu hi’ding ah kilawm leh pha lasak him ahi.

²²Thil zosia ka pa’n ei piakdaw a hita’n, Chapa chu kua a hem, Pa tilo chun kuama’n a hepua’n; Pa chule kua a hem, Chapa leh a kiang ua chapa’n a puandawnate bep lo ngal chun kuama’n a hepuau hi,” a tia.

²³A nungzuite lam in a kihei ah, a chuam in a kiang un: “La thil muteu hi a muna mitte chu a hampha na e!

²⁴Ka hil la hiu, leng leh jawlnei tam takte chun, zia la thil muu haw hi mu a la nop uh ahi; himaleh, a la mu man ta puau hi; chuleh, la thil hiatteu hile het a nuam ui; himaleh, a la he man ta puau hi,” a tia.

²⁵Zia lai tak ah chun, danthiam mi pakhat a hung dingdok a, ama patepna dingin, “Hotupa, kumtuang hinna ka neitheina dingin bang ka bawl diam?” ti’n a hun dong a.

²⁶Jesu’n, a kiang in, “Dan Lekhabu’n bang a kizik em? Bang la simdok em?” a tia.

²⁷Ama chun, “Lalpa la Pathian chu la lunggil zosia leh, la hatna zosia leh, la lungthim zosia’n la hepi ding ahi; chuleh, nangma la kihepi gual in la Invêngte le la hepi ding ahi, ti ahi,” a tia.

²⁸Jesu chun, “La dawnhu dik ma ma hi, zia gual ah chun vabawl lechin hing in la,” a tia.

²⁹Himaleh, ama leh ama thiam kichan gua’n Jesu kiang in, “Ka Invêngte chu kuate a hiu em?” ti’n a dong a.

³⁰Jesu’n a dawnhu a, “Mi kua a hem khat Jerusalem ah kipat Jeriko zuan in a chia suk leh, guchate a tuak kha ta’n; a puante lâkpiak in a hi’liam ua, a thilo bep in a nusia tau a.

³¹Zia lampi chun thiampu pakhat a hung a; himaleh, a mu phât in lam pâm langkhat lam in a pêl tai.

³²Zia gual ma chun Levi mi pakhatle a hung a, a mun a hung tun phatin a vak en ah, ama’nle lam pâm langkhat lam in a pêl kit tai.

³³Himaleh, Samari mi pakhat, khualzin in a hun tuak kha ta’n, a mu phât in a lungsiat ma ma a.

³⁴A vazuan ah, a liamnate chu uain leh sathaunu’ piak in, a tuam piak tai. Ama sabiltung chung ah chun a chuansak ah, khualbûk pakhat in a puilût ah, a kaitua tai.

³⁵A jing ah a nutsia ding kuan in, denarii dangka pani a ladok ah, khualbûk vêngpa kiang ah chun a pia, a kiang in, ‘Zia hin ama hi a la kaitua inla, zia khêl ah hi la sênna a um leh, ka hung kit phat leh hun dit ing ka’ a ti malam a.

³⁶Aleh, zia gucha tuak khapa â ding ah hin, zia mi pathumte lak ah a kuapen hi a Invêng chu hiding in la gêl em?” a tia.

³⁷Ama chun, “A chung ah jangai penpa chu,” a tia. Ziaphatchun Jesu’n a kiang in, “Ahileh, chia inla, nang inle zia gual chun vabawl ta’n,” a tia.

³⁸Chuleh, a chiau a, khua pakhat in a lut a; zia tak ah chun Martha kiti numei pakhat in a In ah a la ko lut a.

³⁹Ama chun suapi numei pakhat Mari kiti chu a nei ah, zia nu chu Jesu kengbul ah kichu’n, a thugen a ngaitha.

⁴⁰Martha vang chu tawi lumlet in a buai ma ma a; tichun, a kiang in a hung a, “Lalpa, ka suapinu hin nêk leh châk bawl ding ah ei ngansia ziang hi la awi ah a hem? Ei kithuapi dingin hun sawl ta’n la,” a hun tia.

⁴¹Jesu chun, “Martha, Martha, thil tam tak la ngaitua ah buai la hi;

⁴²thil khat bep a poimaw hi. Mari’n zia chanpha chu a têl ah, zia chu lâkpiak ding ahi puai,” ti’n a dawnhu a.