Read Vaiphei LUKA 11 Bible Online

LUKA 11 - Vaiphei bible

LUKA 11

¹Jesu chu mun khat in a pauchap ah, a zaw phat in, a nungzuite lak ah pakhat chun a kiang in, “Lalpa, Johan in a nungzuite a hil sek gual in pauchap dan ei hil in,” a hung tia.

²A kiang un, “La pauchap tak ua leh zia gual hin gen sek un: ‘Ka Pau, la min ja in um hen. La gam hung tung hen.

³Nisi’n ka nêkkhop uh an ei pia’n.

⁴Ka chung ua thil hikhialte ka ngaidam sek gual un, nang inle ka thil hikhialteu ei ngaidam in. Chetna hun ah ei puilût kin’ ti in,” a tia.

⁵Chuleh, a kiang un, “La lak ua kua a hem khat in gualpha pakhat nei hen la, jankhang in a kiang in vachia in: ‘Lawm, vaithum pathum ei thunglâksak in;

⁶ka gual dawi khat khualzin a hung tung hen, a ma-âng ah lui ding bangma ka nei puai’ hang ti leh;

⁷ama chun, In sung ah kipat in, ‘Ei subuai kin, tun kot a kikhâk ta’n; ka chate le ka kiang ah jalkhun ah a ipmu tau in, tho in ka hung pia thei ta puai’ ti’n a la dawnhu ta leh;

⁸ka hil la hiu, a gualpa ahi ziakin tho in vapia ziang lo maleh, a dot tun tun ziak ah chun tho in a dawi jat chu vapia tho tho in a,” a tia.

⁹Chutichun, ka hil la hiu, Don un, piak hi’n lau; hawl un, mu’n lau; kiu un, kot chu hon piak hi’n lau.

¹⁰A don tapo in a mu sek un; a hawl tapo in a mu sek ui; kotkhak kiu tapo chu hon piak hiding a hiu.

¹¹Nanghaw lak ah a chapa’n sanga don taleh, kua a hem sanga pelo ah gûl pia ding?

¹²Aktui don ta leh ainuvet a pia diam leh?

¹³Nanghaw migilo in bawn la chateu thilpha piakna châng la het ua leh, la pau van ah um chun adonte chu Thagau Thiangtho pena lawm lawm in ah e! a tia.

¹⁴Tichun, thitha buak vop pautheilo pakhat a nawdok piak a; thitha chu a pawt daw phatin, pautheilo chu a hung paudok ta’; mipite chun lamdang a sa ma mau a.

¹⁵Himaleh, a lak ua mi khenkhat chun, “Thithate chung ah vaihawmpa, Belzebul ziak ah thithate chu nawdok thei ahi,” a tiu a.

¹⁶Ziaphatchun, midang lawi khat chun, ama patepna’n van ah kipat thilmak a hung phût un.

¹⁷Himaleh, ama chun a ngaituanau chu a la he, a kiang un, kua gam hilehle amau leh amau kilangkhen him him chu a kisumangthai sek ui; Insung khatle amau leh amau kilangkhen chule a pûk sek ui.

¹⁸Setan le ama leh ama kikhen ta leh, a gam bangti’n dingdok thei ding a hem? Belzebul ziak ah thithate nawdok ahi lei tingal un.

¹⁹Belzebul ziak ah thithate nawdok ka hi chun, la dawithiamteu in kua ziak ah nawdok a hiu em? Ziaziakchun, ziate chu la chung ua vaihawm dingte chu a hiu.

²⁰Himaleh, Pathian khut ziak ah thithate nawdok ka hi chun, Pathian gam la kiang un a hung tung tai.

²¹Mihat chun galthuam bukim tawh a In ah a um sung sia chu a thuamphuate le bit tak in a um hi.

²²Himaleh, ama sâng ah hatzaw a hung ah, a hung thâtzaw leh chu a kisuanpi gâlvan zosia a hung lâkpiak ah, gâllâk in a hawm jak piak sek hi.

²³Keima lam ah pang lo chu ei do ahi’n, ei lâk khawmpi lo chu ei thejak piak ahi.

²⁴Thitha buak chu mi pakhat sung ah kipat in a pawtdok ah, kichawlna ding hawl in gamkeu in a vâk tawl tawl ah, himaleh, a mu zaw tâk lo phatin, “Ka hung pawtna In ma ma khan vachia kit mai ing ka” a ti’n;

²⁵a hung kit leh, phiat thiansa leh siamtupsa’n a mu ta’n.

²⁶A vachia ah, thitha dang, ama sâng ah gilozaw pasagi a hun pui ah, a lut tau ah; zia tak ah chun a hung chêng tau hi. Ziaphatchun, zia pa hindan chu a masa sâng ah khan nasa tak in a hung sezaw tai, a tia.

²⁷Zia thute a gen lai tak chun, Mipi lak ah chun numei pakhat a hung kiko a, “Nang hun vopnu sul leh, nawitui ah nang hun chawmnu chu a hampha na lawm lawm e!” a hun tia.

²⁸Himaleh, ama chun, “Ahi, himaleh, Pathian thu he ah zuite chu mi hampha zaw a hiu,” a tia.

²⁹Mipi a hung tam ma ma phat un, thu a hun gen pan ah, Tu’lai khang hi chu khang gilo tak a hiu; tepte’na a hawl un, himaleh, Jonah tepte’na tilo ngal tepte’na dang piak hita pua’n au.

³⁰Jonah kha Nineveh khua mite â ding ah tepte’na ahi gual khan, Mihing Chapa hile tu’lai khangthakte â ding ah tepte’na ahi.

³¹Vaihawm ni tak leh simlam lengnu kha, tu’lai khangthakte hi tawh hung ding khawm intiu in, ama chun thiamlo hun chansak in a: Ama chu lei langkhat lam ah kipat in, Solomon pilna ngaitha ding mai mai in a hung ahi kha! En tiam un, Solomon sâng ah lopi zaw zia tak ah hin a um hi!

³²Nineveh khua mite kha le vaihawm ni tak leh tu’lai khangthakte hitawh hung ding khawm intiu in, thiamlo hun chansak in au. Amau haw chun Jonah thugen ziakin a gitlonateu a haisan tau a: En tiam un, Jonah sâng ah lopi zaw zia’ hin a um hi!

³³Kuama’n thaumei vak in law nuai in a koi ngai puau in, a tunna’n a tung zaw sek ui; mi a hung lutte’n a vâk chu a mu’na ding un.

³⁴Taksa ah vâk chu mit ahi; ziaziakchun, mit hi a vâk hoi leh taksa pum chu a vâk ah; himaleh, mit hi a siat chun, taksa hi a pum in a thim ahi mai hi.

³⁵Ziakziakchun, nangma ah vâk chu thim a hilona dingin chingthei un.

³⁶La taksa chu a pum ah a vâk chun, nangma ah thimna um pua’n tin, thaumei pha tak ah kivâk gual chun, bangkim chu hung vâk suak ziang ding ahi, a tia.

³⁷Zia thu a gen lai tak ah chun, Pharisai mi pakhat in a In ah an ne dingin a chial a; a vachia ah, a lut ah, an ne dingin a kichu’n.

³⁸Khut sawp lo ah an ne ding ah a um chu, Pharisai pa chun a mu in mak a sa ma ma a.

³⁹Lalpa chun a kiang in, Nanghaw Pharisaite hin, no leh kuangte hi a pawlam bep la sawp thiang un; himaleh, la sunggil lam uh chu du-âmna leh nunsiatna dim ahi.

⁴⁰Nanghaw mingolte haw, a paw lam siampa chun a sunglam le a siam tho tho pua a hem?

⁴¹Himaleh, la nei leh lamteu chu migentheite kiang in pia zaw leu chin, nang uh â dingin bangkim a thiang ahi.

⁴²Ahi’n, nanghaw Pharisaite haw, la chung uh a gik hi! Pudinate, lokhate leh anche lohingte sawm ah khat la pesek ui; ahi’n, diktatna leh Pathian hepina chu la limsak puau hi, ziate chu ei vei la bawl ding uh; a dangte chule thul diak lo in.

⁴³Nanghaw Pharisaite haw, la chung uh a gik hi! Sunagog ah chutna mun sâng sâng la ngainau a, kaithial ah chibai kibukte la nuam ui.

⁴⁴La chung uh a gikna e! Thân tepte’na a umlo ziak ah mite’n thân a hi’lam helo ah, a chung ah mi a nop nop ua a chia seknau haw tawhbang chu la hiu hi, a tia.

⁴⁵Ziaphatchun, danthiam mi pakhat in a hun dawnhu a, “Hotupa, la thugen chun keihaw lei selpho na e!” a hun tia.

⁴⁶Ama chun, “Nanghaw dan thiamte haw la chung uh a gik hi! van-gik tak tak in la siam un, mi la puaksak sek ui, nanghaw’n la la khutmûk chau inle la sukha nuam puau hi.

⁴⁷La chung uh a gik hi! La pu la pateu thâsa jawlneite thân haw chu nang un a suang la dawu a.

⁴⁸A dik tak ah gen in, la pu la pateu thilbawl haw chu pha la sakpi ten uh ahi hilam! Amau in a la that ua, nang un a suang la dawu a!

⁴⁹Ziaziak hin, Pathian pilna chun zia gual hin a la gen hi: ‘Jawlneite leh nungzuite hun sawl ing ka tin, a lak ua khenkhat chu that intiu in, khen khat chu genthei tak in bawl in au, a ti kha.

⁵⁰Ziaziakchun, khawvel siamtil ah kipat jawlneite thisan kisua zosia kha, tu’lai khangthakte chung ah hin kiphût ding ahi.

⁵¹Abel thisan ah kipat, mâichâm leh mun thiangtho kikâl ah Zekhariah thisan kisua tiang in, tu’lai khangthakte chung ah hin kiphût ding a hi.

⁵²Nanghaw dan thiamte haw, la chung uh a gik hi! hetna chabi chu la kol un, nangmau la la lut nuam puau a, midang a hung lut nuamte la la lutsak nuam diak puau in,” a tia.

⁵³A chia daw phatin, lekhazikte leh Pharisaite chun nasa tak in a hun lang bawl tau a; ama nialna ding thu tam tak a hun ngaitua tau a,

⁵⁴a paukhialna bang hem ah mat gua’n, a chânggu zing tau hi.