Read Vaiphei LUKA 15 Bible Online

LUKA 15 - Vaiphei bible

LUKA 15

¹A thugen ngaitha dingin sedawlte leh migilote a hung khawm ua.

²Pharisaite leh lekhazikte chun, “Zia pa hin migilote a lop in, a lak un an a ne sek hi,” ti’n a phun sau sau tau a.

³Ama chun zia tekhinthu hi a gen a:

⁴La lak un mi pakhat hin belam za khat nei hen la, a lak un pakhat chu mansua taleh, sawmkua leh kuate chu gamthip ah nusia in, a mang pen chu a mudaw masia vahawl lo ding kua a hem?

⁵A mudaw tak leh, a liangko in hun pua’n tin, kipak ma ma in,

⁶a In a hung tun tak leh, a Invêngte leh a gualte ko khawm in, a kiang un, ei hung kipakpiu in, ka belam matsua kha ka mu kit tai ti ding a hi.

⁷Ka hil la hiu, zia gual ma chun, mipha sawmkua leh kua lungheina nei diaklote chung sâng in, migilo pakhat lungheina chung in van ah mi kipak zaw’n au.

⁸Numei kua a hem khat in dangka thik sawm nei hen la, a lak ah pakhat mansua taleh, thaumei vak in, munphiat in, a mu kit masia gunchu tak ah hawl lo ding kua a hem um?

⁹Ahi’n, a hun mudaw tak leh, a Invêngte leh a gualte ko khawm in, ei hung kipakpiu in, ka dangka thik matsua kha ka mu kit tai ti ding a hi.

¹⁰Ka hil la hiu, zia gual ma chun, Pathian vansawlchâkte ma ah chun migilo pakhat lungheina ziakin kipakna a um sek ahi, a tia.

¹¹Chuleh, Jesu’n zia gual hin a gen kit a: Kua a hem khat in chapa pani a nei in,

¹²a neuzawpa chun a pa kiang in, “He pa, ka gochan ding sia chu ei pia’n,” a tia. Tichun, a nei zosia chu a hawm piak tai.

¹³Chomkhat zaw in, a chapa neuzaw chun a chan ding zosia lakhawm in, khual gamla tak in a chia ta’n; kinoptel tak in a um ah, a nei zosia chu a sumang zo tai.

¹⁴A sum a mat zaw phatin, zia gam ah chun kial huaisia tak a tung ta’n; nêk ding a hung tasam tai.

¹⁵Tichun, zia gam ah mi pakhat kiang ah chun kilaw dingin a vakipia ta’n; zia pa chun vok an pia ding in a lou lam in a sawl a.

¹⁶Kuama’n nêk ding bangma a piak lo ziak un, vokchate thil hawng nêk haw chule a ducha tai.

¹⁷A hung kihetdaw phatin, “Ka pa kiang ah suak sumlawte’n nêksên lo a nei tam siat uh tawh, kei la zia hin gilkial ah thi ding ka hi ta’n!

¹⁸Kipan ing ka tin, ka pa kiang in, He pa, van ah mi chung leh nangma mit mu in thil ka hi’khial tai.

¹⁹La chapa tâkle ka hita puai; la kiang ah suak sumlawte lak ah pakhat gual hin ei siam mai ta’n, vati ta’ng ka,” a tia.

²⁰Tichun, a kipan ah, a pa kiang lam a zuan tai. Ahi’n, gamla tak ah kipat in a pa’n a hun mu ta’n, a hepi ma ma ah, a del ah, a ngawng kawi in a chawp ngawi ngawi tai.

²¹Chun, a chapa chun a kiang in, “He pa, van ah mi chung leh nangma mit mu in thil ka hi’khial tai, la chapa tâkle ka hita puai,” a tia.

²²Ahi’n, a pa chun a suakte kiang ah, kin tak in, “Puan phapen kha hun la’n silsak un; chuleh, khutsebi busak unla, kengtawdap le hun busak un.

²³Chuleh, bawngno thau pen kha hun kai un la that un, kipak tak in nei tiu.

²⁴Zia ka chapa hi a thisa hung hing kit, a mangsa kimu kit ahi,” a tia. Tichun, nunnop a hun bawl pan tau a.

²⁵Zia pet ah chun, a chapa upa zaw chu lou ah kuan ahi’n; In kiang a hung tun phatin, La sak git leh lâm thawm a hun he ta’n.

²⁶Tichun, suak pakhat a ko ah, bang bawl a hitau em? ti’n a dong a.

²⁷Ama chun a kiang in, la nau a hung tung in, dam tak ah a hung tun ziakin la pa’n bawngno thau tak khat a that ah ahi, a tia.

²⁸Ama chu a lungna ta’n, a lut nuam ta puai; a pa a hung pawt ah, a hung thêm a.

²⁹Ahiziakin, ama chun a pa kiang in, ngaitia, kum zia chanpi hi la suak gual in na ka sêm ta’n, la thupiakte le ka botsia kha puai; himaleh, ka gualte tawh nunnop ka bawlna dingin kelno khatle lei penai puai.

³⁰Himaleh, zia la chapa, nawchizuakte kiang ah la sum nezopa hi a hung phatin, ama â dingin bawngno thaupen la tha piak in, a tia.

³¹A pa chun a kiang in, ka chapa, ka kiang ah um zing la hi hilam, ka nei zosia hi nang â ahi.

³²Zia la nau hi a thisa hing kit ahi’n, a mangsa kimu kit ahi; ziaziakchun, kipak in limna I bawl ding him uh ahi a tia, ti’n a gen tai.