Read Vaiphei LUKA 17 Bible Online

LUKA 17 - Vaiphei bible

LUKA 17

¹Jesu’n a nungzuite kiang in, “Pûksanna hi a umlo thei ahi puai; himaleh, pukna umsakte chung a gik hi.

²Kuale zia a neupente lak ah pakhatle pûksak chu, a ngawng in sumhêk suang ki-awsak hen la, tuisuagiat ah kisep lut leh, zia chu ama â dingin phazaw’n a.

³Chingthei ta un, la suapipa’n la chung ah thil a hi’khial chun, zilgai in la; a haisan leh ngaidam ngal in.

⁴Mi pakhat in ni khat sung in la chung in sagivei hi’khial leh le, sagi vei ma nangma lam a hun ngat kit a, ‘Ka hai veng veng tai’ a ti leh la ngaidam ding ahi,” a tia.

⁵Ziaphatchun, sawlchâkte chun, “Ka ginnau ei hi’hat piak in,” a hung tiu a.

⁶Lalpa chun, a kiang un, “Ankam mu tawhbang ginna la nei phot ua leh, zia thingtheimi kung kiang ah hinle, ‘La zung pum in kibotdok inla, tuisuagiat sung ah vakiphu in’ tileuchin, la thuu mang ding ahi,” a tia.

⁷Chuleh, “La lak ua mi pakhat in la suakteu chu lou kai ding a hem, ganching ding a hem in mang leu chin, a hung tun si’n leh, ‘Hung inla, la an hung kinêk in’ kua a hem a la ti sek ding?

⁸Zia chu timalak sâng in, ‘Ka nêk ding ei bawl piak inla, puan chêng inla, ka nêk ka dawn zaw masia ei zen in, ziazaw chuleh ne’n la dawn na’n la’ kua a hem tilo ding?

⁹A suak in a thupiakte pha tak ah a bawl sek ziak ah, a kiang ah kipak thu kua’n a gen ngai em?

¹⁰Zia gual ma chun, nanghaw’nle la kiang ua thupiak zosia gual ah la bawl nung un, ‘Suak phachuam lo I hiu, I sep uh hi I sep ding him uh ahi’ ti sek un,” a tia.

¹¹Jesu chu Jerusalem lam zuan ah a chia lai in, Samaria gam leh Galili gam a haw malam a.

¹²Khua pakhat ah a lutna chun, phâk sawm hial in a la lamtuau a, gamla tak ah kipat in a hung kiko un:

¹³“Hotupa Jesu, ka chung un jangai in,” a hun tiu a.

¹⁴Amau chu a vak mu phât in, “Chiau inla, thiampute vaki-etsak un,” a hun tia. A chia zing lai un a hung thiangtho tau a.

¹⁵A lak ua pakhat chun a hung dam tai ti, a kihiat phatin, a hung kile’kit ah, aw ngai tak in Pathian a hun chawihoi tai.

¹⁶Jesu kengbul in a hung bokkhup ah, kipak thu a hung gen tai; ama chu Samaria mi ahi.

¹⁷Jesu’n a kiang in, “Mi sawm kha la thiang tau hilo a hem? Pakuate kha khoilam tung zo a hitau em?

¹⁸Zia gam chuam mi longal hi, Pathian chawihoi ding ah hung kit a um puau hi,” a tia.

¹⁹Chuleh, zia pa kiang ah chun, “Tho inla, chia ta’n, la ginna chu la dampi ahi,” a tia.

²⁰Khatvei chu Pharisaite’n Jesu kiang in, Pathian gam hung tun ding dan a hung dong ua; ama chun a kiang un, “Pathian gam chu muthei dingin hung tung pua’n a.

²¹‘Entia, zia tak ah hin’ a hem, ‘En un, zia tak ah sawn’ ti ziang thei hipua’n a; ngai un, Pathian gam chu la lak un a um hi,” a tia.

²²Chuleh, a nungzuite kiang in, “Mihing Chapa dam lai ni’te hi ni khat bêk la ngai vung vung hun uh hung um intin, ahi’n la, mu ta pua’n lau.

²³Zia hun tak chuleh, ‘En un, zia lam ah hin’ a hem, ‘En un, zia lam ah sawn’ ti leule taksang kiu in; delle del kiu inla, zuile zui diak kiu in.

²⁴Kawl a hung phiat ah, van nuai langkhat lam ah kipat langkhat lam a hung tun ziang gual hin, Mihing Chapa hung ni leh zia gual chu hung hiding ahi.

²⁵Himaleh, thil tam tak hun thuak masa phot intin, tu’lai khangthakte doi lo in hung um in a.

²⁶Noah hun lai gual ah khan, Mihing Chapa hung ni phat leh le hung um ding ahi.

²⁷Noah kuang ah a lut ah, tui a hung lêt ah, a leng ua a thi’gam niu kha a tun masang sia, a ne’n a dawn ua, ji leh pawsal in a kinei ua.

²⁸Zia gual ma chun, Lot hun lai ah khanle a neu in a dawn ua, a chawu in a zuak un, a phuu in a sau a;

²⁹himaleh, Lot in Sodom khua a pawtsan phat ah khan, van ah kipat in mei leh kât a hung zu’n, a leng un a thigam tau hi.

³⁰Mihing Chapa a hung kit ni phat leh le zia gual chu hiding ahi.

³¹Zia ni phat chuleh, Inchung ah um chun In sung ah a thuamphua umte la dingin vakum ki’hen; lou ah umte’n le In lam ah hung vaikit ding gaw kiu hen.

³²Lot ji hezing un.

³³Kuale a hinna humbitna hawl chun chân intin; kuale a hinna chân chun humbit zaw’n a.

³⁴Ka hil la hiu, jan lai ah lupna pakhat ah mi pani lumte le, pakhat lak in um intin, pakhat nutsia hi’n a.

³⁵Numei pani busukhawm lai le, pakhat lâk in um intin, pakhat nutsia hi’n a.

³⁶Lou ah mi pani um le, pakhat lâkin um intin, pakhat nutsia hi’n a,” a tia.

³⁷Ziazaw chun, amau chun a kiang in, “Lalpa, zia chu khoilam ahi diam?” ti’n a dong un. Ama chun, “Sapûl luang umna taphot ah chun mulukolte le um khawm in au,” a tia.