Read Vaiphei LUKA 18 Bible Online

LUKA 18 - Vaiphei bible

LUKA 18

¹Chun, lungke lo hial ah pauchap ding ahi dan hilna dingin, zia tekhinthu hi a gen a:

²“Khawpi pakhat ah hin vaihawm pakhat, Pathian le lau lo, mihingle bangma ngai lo a um a.

³Chuleh, zia khawpi sung ma chun meithâi pakhat, vaihawmpa kiang ah hung in, ‘Ka mêlmapa chung ah phuba ei lâkpiak in’ a hung ti sek a.

⁴A lim ah chun a nuam ziang pua’n; himaleh, a vainung ah chun a hung kingaitua leh, ‘Pathian lau lo in, mihingle bangma’n ngai lo lengle,

⁵zia meithâinu hin ei subuai zing in, a phuba hi lâkpiak mai ing ka; achutiloleh, hung kit kit intin, ei hung subuai zing ding ahi’ a ti ta’n.

⁶Tichun, Lalpa chun, ‘Zia vaihawmpa thugen hi ngaituau in.

⁷Pathian chun, a mi têlte sun leh jan ah ama kiang ah thûm leh mau ah umte chu, phuba lâkpiak lo in jaidaw zing ding a hem?’ a tia.

⁸Ka hil la hiu, a kin thei pen in phuba chu lâkpiak in a. Banghileh le, Mihing Chapa a hung kit phat leh lei ah hin mi ginum a hun mu’na diam?” a tia.

⁹Jesu’n, midik tak ah kingai, mi dang zosia bangma simcha lo kuate a hem kiang in zia tekhinthu hi a gen a.

¹⁰“Mi pani Tempul ah pauchap dingin a chiau in; pakhat chu Pharisai ahi’n, pakhat chu sedawl mi ahi.

¹¹Pharisai pa chu a hung ding ah, ama chang in zia gual hin a hung pauchap a: ‘Pathian, keima hi mi dang gual ah negu, diktat lo leh ângkawm ka hilo ziakin leh, zia sedawlpa gual hile ka hilo ziakin la chung in ka kipak hi.

¹²Hapta khat sung in nivei an ka ngawl in, ka nei tapo sawm ah khat ka pesek hi’ a ti’n.

¹³Sedawlpa chu vang gamla tak in a ding ah, van lam le dak ngam lo ah a awm chûm kawm kawm in, ‘Pathian, kei migilo ka hi, ka chung ah jangai in’ a tia.

¹⁴Ka hil la hiu, a masa pa sâng in zia pa chu thiamchang ah um in a In lam in a chia suk tai. Ama kichawisâng tapo sukniam hi’n tiu in, kingainiamte chu choisa’n in um in au,” a tia.

¹⁵A kiang ah chapangte chu a khoi dingin a hun pui un; himaleh, a nungzuite’n a la mu phât un a la vau un.

¹⁶Himaleh, Jesu’n a kiang in a ko a, “Zia chapangte kha ka kiang ah a hung diu zada kiu inla, hun puisak un; Pathian gam chu zia gual mite â ding chu ahi.

¹⁷Titakzet in ka hil la hiu, kuale zia chapangte’n Pathian gam a lop gual ua lawp lo tapo chu, a sung ah lut lo hial ding a hiu,” a tia.

¹⁸Zia tak ah chun vaihawm mi pakhat in thil khat a hung dong a, “Hotupa pha, kumtuang hinna ka neitheina dingin bang ka bawl diam?” a hung tia.

¹⁹Jesu’n a kiang in, “Bangatia, pha ei ti la hem? Pathian ti’lo ngal chu kuama a pha a um puai.

²⁰Thupiakte kha la hia’i, ‘Ângkawm kin’ ‘Tualthat kin,’ ‘Gucha kin,’ ‘Hetpitu dik lo in pang kin,’ ti leh, ‘La nu leh pa ja in,’ tite hi,” a tia.

²¹Ama chun, “Ziate haw chu ka naupan lai ah kipat ka la zop zaw ahi tai,” a tia.

²²Jesu’n zia a thugente chu a het phat in a kiang in, “Aleh, thil pakhat in la vât nalai hi; la nei zosia zuak in la migentheite kiang in vapia’n, chuti leh van ah go nei in la; chuleh, hung in la, ei zui in,” a tia.

²³Ama chu mihausa tak ahi ziakin, zia thu chu a het phat in, a lungkham tai.

²⁴Jesu’n ama chu a en a, “Mi hausate Pathian gam a lut diu a haksa na e!

²⁵Mihausa Pathian gam a lut sâng in, sangawngsau pinbil hawm ah a lûtthen a bailam zawi,” a tia.

²⁶Zia a thugen a la hete chun, “Aleh, kua hukdam hithei ding a hem?” a tiu a.

²⁷Ama chun a kiang un, “Mihing â ding ah hitheilo chule, Pathian in a hithei sik sek hi,” a tia.

²⁸Tichun, Peter in, “Ngaitia, kei uh hin bangkim nusia in ka hun zui un,” a tia.

²⁹Ama chun, a kiang un, “Titakzet in ka hil la hiu, Pathian gam ziak ah, a In a hem, a nu leh pa a hem, a suapite a hem, a ji a hem, a chate a hem nusiate chu,

³⁰tu’hun ma ma leh a hung tung ding kumtuang hinnale, ale’ tam tak mulo ding kuama a um puau hi,” a tia.

³¹Sawm leh nite chu a pui chuam ah, a kiang un, “Ngai tiam un, Jerusalem lam ah chia to ding I hiu a, jawlneite’n Mihing Chapa chung thu a la genlawk zosiau kha hung guitung ding ahi.

³²Jentelte khut ah piakdaw in um in tin, tawtbawl na’n mang intiu in, musit tak in engbawl intiu in, a chil uh sekkhum in au.

³³Ama chu jep intiu in, hun that in au; himaleh, a ni thum ni leh hung thokit ding ahi,” a tia.

³⁴Amau ah zia thute chu a kisêl nâk lai ziakin, a ngaina a hepuau ah; a gente chu a hethiam thei him him puau hi.

³⁵Jeriko khua a hung tun ding kuan un, mitthûm pakhat, khutdaw in lam pâm ah a la um a;

³⁶mipi hung thawmgi chu a het in, bang thu a hem ti a dong a.

³⁷Amau chun, “Nazareth Jesu chia ahi,” ti’n a hil un.

³⁸Ziaphatchun, a hung kiko ah, “Jesu, David Chapa, ei lungsiat in,” a hun tia.

³⁹A malam ah chiate chun thip dingin a vau un; himaleh, ama chu a kiko ngai zaw diak a, “David Chapa, ei lungsiat in,” a ti kit a.

⁴⁰Ziaphatchun, Jesu chu a hung ding ah, ama chu a kiang ah hun pui dingin thu a pia; a kiang a hung tun phat chun,

⁴¹“Bang hun hi’piak leng la nuam em?” ti’n a dong a. Ama chun, “Lalpa, muthei ka nuam hi,” a tia.

⁴²Ziaphat chun Jesu’n, “Khua hun muthei ta’n, la ginna hi la dampi ahi,” a tia.

⁴³Thakhat in khua a hun muthei ta’n, ama chu a hun zui a; Pathian a chawihoi a; mipi zosia chun zia chu a muu a, Pathian a chawihoi chiat tau hi.