Read Vaiphei LUKA 20 Bible Online

LUKA 20 - Vaiphei bible

LUKA 20

¹Ni khat chu, tempul ah mite kiang ah chanchinpha a hil lai tak in, thiampu lalte leh lekhazikte tawh upate chu a kiang in a hung tau a;

²a kiang in, “Bang thuneina zia thute hi hil la hem? Zia thuneina hi kua hun piak a hem?” a hung tiu a.

³Ama chun a kiang un, “Ke’nle thil pakhat hun dong ing ka tin ei dawnhuu in:

⁴Johan baptisma kha, van ah mi thu a hem, ahiloleh, mihing ah kipat a hem?” a tia.

⁵Ziaphatchun, a kikumtuau ah, “Van ah kipat tileuhin la, bangatia taksang lo?” ei ti’n tin.

⁶“Mihing ah kipat tileuhin la, mipi hin suang in ei sep intiu in; Johan kha jawlnei hi ngei ah a la het uh ahi ngal a,” a ti tau a.

⁷Ziaziakchun, “Khoi lam ah hung kipan ahi ka hepuau hi,” ti’n a dawnhu tau a.

⁸Ziaphat chun Jesu’n le, “Ahileh, ke’n le kua thuneina zia thilte hi bawl ka hi em ti hun hil diak pua’ng ka,” ti’n a dawnhu tai.

⁹Mipite kiang in zia tekhinthu hi a gen a: “Mi pakhat in grep huan a bawl ah; a huan chu nasem ah kilaw nuamte khut in a pedok ah, hun sawt tak châm dingin gamla tak in a zin mang tai.

¹⁰A ga lâk hun in a grep ga a chan ding chu la dingin a suakte pakhat a sawl a; himaleh, a huanbawlte chun a la vuau a, khutngawn in a la sawl mang kit tau a.

¹¹A suakte lak ah pakhat a sawl kit a, ama chule a la vaw kit un, jachak um takin a la bawl ua, khutngawn ma in a sawl kit tau hi.

¹²Chuleh, a pathumna chu a sawl kit a; zia pa chu a la hi’liam in, a la nawdok tau hi.

¹³Grep huan neipa chun, ‘Bangti’n ka bawl ta dia aw? Ka chapa dawi tak sawl mai ing ka; ama hi a la muu ah, a la jadeu khâk ua leh,’ a ti ta’n.

¹⁴Himaleh, huan bawlte chun a la mu phât un a la kiho ua, ‘Zia pa hi a golua ding pa kha ahi, hung tiam un, a la that hitiu; chutileh, a go chan ding chule ei haw chang ziang ding I hiu,’ a la tiu a.

¹⁵Tichun, ama chu grep huan ah kipat chun a kaidok ua, a that tau a. Aleh, zia grep huan neipa chun bang a hun law ta diam?

¹⁶Hung intin, a huan bawlte chu hung that intin, a huan chu midang bawlsak zaw ta’n a,” a tia. Amau haw chun, zia chu a het phat un, “Zia lawm lawm chu tung ki’hen,” a tiu a.

¹⁷Tichun, amau chu a en a, “Aleh, zia thu kizik hi a umzia la hiau em? ‘Insate doi lo suang kha, zia suang ma ma kha a kil ah suang poimaw pen ahi tai,’ ti thu kizik hi,” a tia.

¹⁸“Kuale, zia suang chung ah kipûk chu kitat liam in tin; a del den khâkte vâng vâng chu gawtpen ding ahi,” a tia.

¹⁹Lekhazikte leh thiampu lalte chun zia tekhinthu chu amau kawk ah a gen ahi ti a het phat un, a chung ah khut thâk ngal a nuam tau a; himaleh, mipite chu a lau kit tau hi.

²⁰Tichun, ama chu gam-ukpa vaihawmna thu leh, thuneina hêk ah a um theina dingin, a chânggu zing tau ah; a hêk theina thu he dingin mi pha gual ah kisiam mi a sawl tau hi.

²¹Ziate chun, “Hotupa, thu dik tak ah gen in mi la hil in, kuama khenchuam neilo in dik tak in Pathian thu la hil sek hi, ti ka hiau hi.

²²A leh, Kaisar kiang ah sia ka piak uh hi a thiang em thiang lo?” ti’n a dong tau a.

²³Himaleh, ama chun a dawhau chu a he,

²⁴“A dangka chu ei etsak tiam un. A chung ah hin kua luchang lim leh kua min a hem um?” ti’n a dong a. Amau chun, “Kaisar,” a tiu a.

²⁵Ziaphatchun, “Kaisar thil chu Kaisar kiang in piau inla, Pathian thilte chu Pathian kiang in piau in,” a tia.

²⁶Tichun, mipi het ah a thugen khial lâk ding a mu puau ah; a dawnhuna chu mak a sa ma mau a, a thip chil chel tau hi.

²⁷Ziazaw chun Sadukai, thawkitna a um puai tite lak ah mi khenkhat a kiang in a hung un:

²⁸“Hotupa, Mosi chun zia gual hin ei zik piak a: Mi pakhat in a ji chu cha nei man lo in thi’san leh, a suapipa chun a ji chu a lua ah, a suapipa suan ding chu a hinpiak ding ahi, ti ahi’n.

²⁹Zia gual ah chun unau pawsal pasagi a um un, a upa pen chun ji a nei in, cha nei man lo in a thi ta’n;

³⁰a zaw in, a paninapa chun a kichenpi a,

³¹chuleh, a pathumnapa chun a kichenpi kit a. Zia gual chun, a pasaginapa chan ah cha nei man umlo in a thi’san chiat tau a.

³²A tawp ah chun numei chule a hung thi tai.

³³Aleh, thawkit ni tak leh, kua pen ji a hung hita diam? A pasagiu ah chun a kichenpi chiat ngal un,” a hung tiu a.

³⁴Jesu’n a kiang un, “Zia khawvel chate hin mi la kichenpiu ah, mile la kichensak ui.

³⁵Himaleh, khawvel hung tung ding ah chun, thina kipat thokit ah, zia mun lua tâk ah umte chu, kichen ti um ta pua’n tin, kichensak tile um diak ta pua’n a.

³⁶Thi le thithei ta pua’n tiu in, vansawlchâkte tawh kibang in um ta’n tiu in, thawkitna chate a hiziak un Pathian chate hita’n au.

³⁷Lalpa, Abraham Pathian, Isak Pathian leh Jakob Pathian chun Mosi kha a ko ah, hampa buk lak ah kipat a kiang ah khan mithi thawkitna a um ngei ahi ti a la taklang hi.

³⁸Ama chu mithi Pathian a hipua’n, a hingte Pathian ahizawk ziakin, ama ah chun mi zosia a hing uh ahi,” a tia.

³⁹Ziaphatchun, lekhazikte lak ah mi khenkhat chun, “Hotupa, la gen chu a dik ma ma hi,” a tiu a.

⁴⁰Zia nung ah chun kuama’n bangma dang a dong kit ngam ta puau hi.

⁴¹Chun, ama chun a kiang un, “Aleh, Messiah hi bangati leh David chapa kiti thei a hem?

⁴²Pâkna Labu ah chun, ama David ngei chun: ‘LALPA chun ka Lalpa kiang in: Ka changlam ah hin kichu’n,

⁴³la mêlmate la keng nuai ah ka koi masang sia,’ a ti’n.

⁴⁴David chun, Lalpa, a ti leh, bang ti’n a chapa hithei ding a hem?” ti’n a dong a.

⁴⁵Chuleh, mipi tam tak het in, a nungzuite kiang in thu a gen a:

⁴⁶“Lekhazikte puanâk chual tawh vâk tawl tawl a nuam un; kaithial lai ah chibai kibûk ngaina, sunagog ah chutna mun sâng deu ngaina leh luaithe’na mun ah chutna phapen ngainate lak in kivêng pha tau in.

⁴⁷Amau chun meithâite a ne gam un, mi mu dingin sawt tak tak a pauchap ui; ziate chun thiamlo channa nasa zaw hun tuak ding a hiu,” a tia.