Read Vaiphei LUKA 21 Bible Online

LUKA 21 - Vaiphei bible

LUKA 21

¹Mi hausate’n thawlawm a hun khiak uh chu a la en zing a;

²ziate lak ah chun meithâi chaga tak pakhat in, dangka paisa ni a hun khiak chule a la mu’n.

³A kiang un, “Titakzet in ka hil la hiu, zia meithâi chaga tak nu hin midang zosia sâng in a khia tam pen hi;

⁴midang haw hin a nei vâl uh Pathian thawlawm ah a hun khiak uh ahi’n; ama hin vang a neisun sun, a kitodelna ding neisun a hung khiak ahi,” a tia.

⁵Kuate a hiu em in tempul thu, suang pha tak ah kisiam ahi dan leh, mite’n Pathian kiang ah a thillatteu kipekhawm ah chei ahi dan a hun gen lai un, ama chun:

⁶“Zia la thil muteu hi sukchip lo ah suang kithua him him um pua’n tin, a leng ah pai mang sik sek na ding hun chu hung tung ding ahi,” a tia.

⁷Amau chun a kiang in, “Hotupa, zia chu bangtik leh a hung tung diam? Zia gual chu a hung tunna ding tepte’na bang gual a um diam?” ti’n a dong tau a.

⁸Ama chun, “Thepzaw ah la um lona ding un chingthei un. Mi tam tak ka min in hung intiu in, ‘Ama chu ka hi,’ a hun ti ding hun uh a nai tai. Zia gual mite chu zui kiu in.

⁹Helna thute leh gâl thuthangte la hun het tak ua leh, lungkham ziang kiu in; zia thilte chu a hung tung masa ding him ahi; himaleh, a tawpna ding tak tak chu hiziang naipua’n a,” a tia.

¹⁰A thugen chu a sunzom pek a: Nam khat chu nam khat do dingin hung kipan intin; lenggam leh lenggamle hung kido in au.

¹¹Linlîng huaisia takte hung lîng intin, mun chuam chuam ah kialte tung intin, van ah kipat thil lau umte leh tepte’na nasa takte hung um in a.

¹²Himaleh, zia zosia chu a hung guitun suak masang in, hun man intiu in, hun sawi intiu in, kikhopna In ah hun pedok intiu in, suangkul inle hun khum in au; ka min ziakin lengte leh vaihawmte ma ah pui in um ding la hiu.

¹³Himaleh, zia chu amau chanchinpha la hiatsak theinau hun lemchâng hung hi zaw’n a.

¹⁴Ziaphat chuleh, bang ti’n ka dawnhu ta diam, ti’n gêl masa kiu in;

¹⁵la mêlmateu zosia’n a hun dodâl ua, a hun nial thei lona ding un, la thugen diu leh pilna hun pia ding ka hi.

¹⁶Chuleh, la nu leh pateu, la suapiteu, la unauteu leh la gualteu le, nanghaw matsak in hung pang in au; a khenkhat le hun that in au.

¹⁷Keima min ziakin mi zosia muda hung hi’n lau.

¹⁸Himaleh, la samzang khat chaule mangthai pua’n a.

¹⁹La thok-hatna ziak un la hinnau humbit in lau.

²⁰Chuleh, Jerusalem chu sepaite’n a hun ûm uh la mu tak ua leh, a hawm ah a umna ding chu a nai tai, ti he ziang un.

²¹Ziaphat chuleh, Judea gam ah umte chu tâng lam ah jam uh hen la, khawpi sung ah umte chu pawt ngal uh hen; gam dang ah a la umte chu valût kit ta kiu hen.

²²Zia ni chu phuba lak ni, thil zosia guitunna ding ah a la kizikte guitun ni hung hita’n a.

²³Zia hun lai tak ah nauvopte leh nau nawichep lai neite chu a chung uh gik in a! Lei chung ah hin lungkhamna nasa tak leh, zia mite chung ah chun lungnatna tung ding ahi ngal a.

²⁴Chemjam in thi’n tiu in, nam zosia kiang ah sal ah pui in um intiu in; Jentelte ni bukim masia Jerusalem chu Jentelte chotden in um in a.

²⁵Chuleh, nisa leh thapi leh aksite ah khin tepte’nate hung um intin, tuipite leh tuifawn kinawk ziakin lei chung ah nam tinte lak in buaina leh lungdonna tung in a.

²⁶Van thilhitheina ziak ah lei hi suklîng hiding ahi ziakin, a sung ah mite chu thil hung um ding dan lunggêl in, lau leh hatsam in hung um in au.

²⁷Ziaphat chuleh, Mihing Chapa hi lopina nasa tak tawh, a thilhitheina tawh sûm lak ah hung a la mu’n au.

²⁸Zia thilte chu a hung kipat tak leh, la kitatna ding uh ni chu a nai tak ziakin, dakdok unla, en vel un, a tia.

²⁹Ziazaw chun, tekhinthu pakhat a hun gen kit a: Theichang kung leh thing zosia umdan hi ngaituau in;

³⁰a hung sel tak leh, nipi a hung nai tai, ti la he ziang sek ui.

³¹Zia gual ma chun, zia tawh bang thil hung tung chu la mu tak ua leh, Pathian gam chu a hung nai ma ma tai ti hiau in.

³²Titakzet in ka hil la hiu, zia thilte zosia hi a hung tun suak masia, zia khang hi bei pua’n a.

³³Lei leh van chu mangthai intin, ka thu hi vang mangthai pua’n a.

³⁴La lungthimteu chu nêk papna leh zu duna leh, zia khawvel dam sung ngaituanate ah la kisukbuai lai tak ua leh, la kigin lo lai tak ua a hung tun phut ziang lona ding in, kiging zing in um un.

³⁵Lei chung ah chêngte zosia chung ah hin, thâng ah awk gual in hung tung phut ding ahi ngal a.

³⁶Kiging zing unla, zia haw zosia chu la pumpel ua, Mihing Chapa âng ah la din theina ding un pauchap zing un, a tia.

³⁷Nisi’n in tempul ah chun thu a hil sek a; jan tak leh a pawtdok a, Oliv tâng kiti, chunglam ah chun a hang um sek hi.

³⁸Mipite chu a thugen ngaitha dingin jingkal ma tak in tempul ah chun a hung khawm sek ui.