Read Vaiphei LUKA 22 Bible Online

LUKA 22 - Vaiphei bible

LUKA 22

¹Chiakân Kût kiti, thawipanglo vaithum Kût chu a hung nai ta’n.

²Thiampu lalte leh lekhazikte chun mipite chu ki’cha maleule, Jesu thalup ding dan a ngaitua tau a.

³Juda Iskariot kiti sekpa sung ah chun Setan a lut ah, ama chu sawm leh nite lak ah pakhat kha ahi’n;

⁴thiampu lalte leh sepai hotute kiang in a vachia ah, a mat piak ding dan a vavaisawmpi tai.

⁵Amau haw chu a kipak ma mau a, sum piak dingin a kitiampi tau a.

⁶Tichun, ama’nle lem a sa ta’n; mipi um lona mun ah a mat piakna ding lemchâng a ngaitua pan tai.

⁷Chiakân Kût, belamno latna ni â ding ah thawipanglo vaithum Kût ni chu a hung tung ta’n.

⁸Peter leh Johan chu a sawl ah, “Vachiau inla, Chiakân Kût an I nêkna ding uh a la guanggal masau in,” a tia.

⁹Amau chun, “Khoi tak ah ka va guanggal diam uh?” ti’n a dong ua.

¹⁰Ama chun, “Ngai un, khawpi’ valût leu chin, tuibêl pu mi pakhat tawh kituak in la tiu in; zia pa chu zui lut un la.

¹¹Zia tak chuleh a In neipa kiang in: Hotupa’n, ka nungzuite tawh Chiakân Kût janan ka nêkna ding uh malzin pindan chu khoitak a hem? a tii, vati leuchin;

¹²ama chun, Indan chungnung lam ah pindan siamtupsa a la kawkmu intin; zia tak ah chun va guanggal un,” a tia.

¹³Tichun, avachiau ah, a kiang ua a gen gual khan a vamuu ah; zia tak ah chun Chiakân Kût janan ding chu a bawl ngal tau hi.

¹⁴A hun a hung hi’phat in, a hung kichu, a nungzui sawm leh nite chu a kiang in a kichuu a.

¹⁵Chuleh, a kiang un, “Ka thok dingte hi ka thok masang in, zia Chiakân ankuang hi hun nêkpi leng nuam ma ma ka hi;

¹⁶ka hil la hiu, Pathian gam ah, a guitun masang sia, zia an hi ne kit talo ding ka hi,” a tia.

¹⁷Tichun, no chu a la, kipak thu a gen a, “Zia hi lau inla, kihawm un;

¹⁸ka hil la hiu, tu’kipat hin Pathian gam a hung tun masang sia, grep ga tui hi dawn kit talo ding ka hi,” a tia.

¹⁹Vaithum chule a la, kipak thu a gen zaw in, a hun phelsua ah, a kiang un a pia, “Zia hi ka taksa nang uh â ding ah kipia chu ahi. Lei hetzingna un hun bawl zing sek un,” a tia.

²⁰Zia gual ma chun an a nêk zaw phat un, no chule a la, “Zia no, ka thisan ah thuthunna thak, nang uh â ding ah pawt chu ahi;

²¹ahi’n, en un, ei matsak ding pa chu ka kiang in a um ah, a khut chu dawkân ah hin a um tai.

²²Mihing Chapa hi guat ah a um dungzui in um ngei ding chu a hi; ei matsak ding pa chu vang a chung a gik hi!” a tia.

²³Ziaphatchun, “I lak ua zia gual thilbawl ding chu kua ahi ta diam maw,” ti’n a kidongtua sau sau tau hi.

²⁴A lak ua lopi pen ding kua ahi diam, ti thu ah kinialna a hung um ta’n.

²⁵Ziaphatchun, a kiang un, Jentelte lak ah lengte chun lal tak in a chung un vai a hawm sek ui; a chung ua thuneina chawite chu mi lawting, a la ti sek ui.

²⁶Nanghaw vang zia gual ah chu la umlo diu ahi; la lak ua a lopi pen ding chu, a naupang pen gual ah a um ding ahi; a lalpen ding chu a nasem pen ah a pan ding ahi.

²⁷Aleh, a an nêk ding bawlpa leh a ne ding ah kichu sekte hi a kua zawk hi a lopi zawu em? A ankuang ah a la kichu sekte hi hilo a hiu em? Himaleh, keima hi nang uh lak ah nêk bawlpen in ka pang sek hi.

²⁸Thepna ka tuak sung ah ei umpite nanghaw la hiu in,

²⁹ka pa’n ei piak gual ah hin, ke’n le nang uh leng gam ka hun pia la hiu;

³⁰ka lenggam ah chun, ka dawkan ah an lei nekpi theina ding uh leh, Israel nam sawm leh nite vaihawmna lalchutpha ka kiang ah la hung chut theina ding un, a tia.

³¹Lalpa chun, “Simon, Simon, ngaitia, Setan in bungel ah a hun ngel theina ding a hawl hi,

³²himaleh, la ginna a basap lona dingin ka hun pauchap piak hi; la hung kihei kit tak leh la suapite la hun suk-hat ding ahi,” a tia.

³³Ama chun, a kiang in, “Lalpa, suangkul ah hi’hen la, thina ding hi ziang leh le, la chia chiana hung ding ah kisa zo ka hi,” a tia.

³⁴Ama chun, “Ka hil la hi, Peter, thumvei lei kilepsan masangsia tu’ni hin âk khuang pua’n a,” a tia.

³⁵Jesu’n a kiang un, “Dangka dip tawh, sakhau tawh kengtawdap le keng lo ah ka hun sawldaw lai khan, bang tâksap la nei awm?” a tia. Amau chun, “Bangma tasam lo,” a tiu a.

³⁶Ama chun, a kiang un, “Ahileh, tu’hin vang dangka dip la nei ua leh vala unla, sakhau la nei ua leh le. Chuleh, chemjam neilote’nle la puan uh zuak unla, pakhat vachawu in.

³⁷Ka hil la hiu, ka chungchâng thu ah kizik: Ama chu migilote lak ah simkhawm ahi, ti thu kha; zia gual ah ka chung thu ah kigente kha guitung kim ding ahi tai,” a tia.

³⁸Ziaphatchun, amau chun, “Lalpa, en tia, zia tak ah hin chemjam pani a um hi,” a tiu a. Ama chun, “A hun tawk hi,” a tia.

³⁹A hung pawtdok ah, a bawl dan ngai gual in, Oliv tâng lam in a chia ah; a nungzuite’nle a zui pek un.

⁴⁰A tun phat un a kiang un, “Thepna la lut lona ding un pauchap un,” a tia.

⁴¹Tichun, ama chu suang ah vak se’phâkna ding tiang ah hin a vachia chuam a, khiangkho in a pauchap ta’n:

⁴²“He Pa, lem la sak leh, zia no hi ei lâkchawn piak in; ahi’n la, keima thu hilo in nangma thu hizaw hen,” a tia.

⁴³Zia lai tak ah chun, van ah kipat in vansawlchâk pakhat a kiang in a hung kilâk ah, a hung hi’hat a.

⁴⁴A lunggim ma ma ziakin, titak zaw diak in a pauchap kit a; tichun, a khawsa-ul chu thisan tang lian tak vatha gual in leitual in a vatha tai .

⁴⁵Chutia, a pauchap zaw phat chun, a dingdok ah a nungzuite kiang in a hung ah, a lungngai ziak un ipmu’n a hung mu ta’n, a kiang un:

⁴⁶“Bangatia, ipmu la hiu em? Hung tho unla, thepna la lut lona ding un pauchap un,” a tia.

⁴⁷Zia thute chu a la gen zing lai in, Juda kiti, sawm leh nite lak ah pakhat khan mipi a hun pui a. Ama chun Jesu chu chawp ding gua’n a hun nai a.

⁴⁸Jesu’n a kiang in, “Juda, nang in Mihing Chapa hi chawp ah mat gua la hi maw?” a tia.

⁴⁹A kiang ah umte chun, thil umdan chu a hun het phat un, “Lalpa, chemjam in sat ding ka hiu em?” a hun tiu a.

⁵⁰A lak ua pakhat chun thiampu lianpen suakpa chu a sât leh, a bil changlam a satthâk piak tai.

⁵¹Himaleh, Jesu’n, “Zia khêl chu hita kiu in,” a hun tia. A bil chu a vak khoi ah, a dam kit ngal tai.

⁵²Ziazaw chun, thiampu lalte leh tempul hotute leh upate kiang ah chun, “Gucha man ding gual in chemjam tawh, thingtum tawh la hung kuan ziang uh maw?

⁵³Nisi’n ah tempul sung ah ka um sek lai khan la lei man puau a; himaleh, tu’hi nanghaw leh thim thilhitheina hun chu ahi,” a tia.

⁵⁴Tichun, ama chu a man ua a pui tau a, thiampu lianpen In ah chun a puilût tau a. Peter chun gamla tak in a zui a.

⁵⁵Zia vaihawmna In tual ah chun mei a sêm phat un, Peter le a lak un a vakichu.

⁵⁶Himaleh, suak numeite lak ah pakhat hin, mei vakna a la kichu chu a hun mu ta’n, a hun enchian a, “Zia pa hile a lawi lak ua mi ahi,” a hun ti tai.

⁵⁷Himaleh, ama chu a kilep a, “Numei, ama chu ka hekha puai,” a hun tia.

⁵⁸Ziazaw sawt lo ah chun midang pakhat in a hung mu kit ah, a kiang in, “Nang le a lak ua mi la hi,” a tia. Peter chun, “Ka hitalojen hi,” a hun ti kit a.

⁵⁹Chuleh, dakkal khat vêl zaw in midang khat in, “Zia pa hile a kiang ua um kha ahi ngei ngei hi; Galili mi ahi hilam,” a hun tichak kei ziang a.

⁶⁰Peter chun, “La thugen chu ka he puai,” a tia. Zia a gen lai tak chun âk a hung khuang ngal tai.

⁶¹Ziaphatchun, Lalpa a hung kihei a, Peter chu a hun en ah; Peter in, LALPA‘n a kiang ah a la gensa, “Nang in âk khuan ma’n thumvei ei kilepsan ding la hi,” a ti kha a hun hedok tai.

⁶²Peter chu a pawtdok a, ha’kâ in a vakap tai.

⁶³Jesu man pawlte khan ama chu tawtbawlna mang in a bêng ua.

⁶⁴A mai a tuam piak ua, “Kua a hem a hun vua chu, gen in,” ti’n a dong ua.

⁶⁵Tichun, ama enghona’n thu tam tak a gen tau hi.

⁶⁶Khua a hung vak phatin, mipi lak ah upate leh, thiampu lalte leh lekhazikte chu a hung kikhawm ua, vaihawmna mun lam in a pui tau a.

⁶⁷“Messiah chu la hi tak tak em? ei gen in,” a tiu a. Ama chun, “Gen lengle taksang pua’n lau;

⁶⁸thil hun dong lengle ei dawnhu nuam pua’n lau.

⁶⁹Himaleh, tunung tak leh Mihing Chapa hi Pathian thilhitheina khut changlam ah kichu ta’n a,” a tia.

⁷⁰A leng un, “Pathian Chapa la hi chu la maw?” a tiu a. Ama chun, “Ahi lei tiu hilo a hem?” a tia.

⁷¹Amau chun, “Bang hiatpitu dang I ngai nalai ua a hem? Ama kamsuak ngei ah kipat in I he tau hi lam,” a hun ti tau a.