Read Vaiphei LUKA 3 Bible Online

LUKA 3 - Vaiphei bible

LUKA 3

¹Lengpa Tiberias vaihawm, kum sawm leh nga tin kum in, Pontia Pilat chu Judea gam awp in a hung pang ah, Herod chu Galili gam ah vaihawm in a pang ah, a suapipa Philip chu Ituria leh Trakoniti gam ah vaihawm in a pang ah, Lusania chu Abilin gam ah vaihawm in a pang in;

²Anna leh Kaiapha chu thiampu lianpen ah a pan lai ua chun, Zekhariah chapa Johan gamthip ah um kiang ah, Pathian in thu a hun gen a.

³Ama chun, gitlona ngaidamna ding ah gitlo haisanna baptisma thu chu, Jordan lui kîmvêl ah chun a gen vêl vêl a.

⁴Jawlnei Isai lekhabu chun zia gual hin a la kizik a: “Gamthip ah mi kiko aw chun: Lalpa lampi a la siamtup unla, a lampite chu hi’zang un.

⁵A guam kuaknate chu vuk dim hi’ntin, a tângte leh a mualte chu sukniam hi’ntin; chuleh, a kawinate chu sukzan hi’ntin, a photnate chule suknâm hiding ahi.

⁶Ziaphat chuleh, mi zosia’n, Pathian hukdamna hun mu ta’n au”.

⁷Johan in baptisma chang ding ah hung mipite kiang ah chun, “Aw, nanghaw gûl suante haw! Lungnatna hung tung ding chu jamsan dingin kua’n a hun hil em?

⁸Gitlo haisanna tawh kigûn in ga hun sua phot tau in. La lunggil un, ‘Abraham chu ei suanpa ahi’ ti’n kisuang ziang kiu in; ka hil la hiu, Pathian in zia suangchangte hile Abraham chate a suaksak thei hi.

⁹Tu’kipat hin thingbul tin ah heicha kikoi zo ei tai; thingga pha’ galo taphot chu a phûk un, mei ah a pai lut sek ui,” a tia.

¹⁰Ziaphatchun, mipite chun a kiang in, “A leh, bang ka bawl ta diam uh?” a hun tiu a.

¹¹Ama chun a kiang un, “Kuale puanâk pani nei chun a neilote hawm unla, nêk ding nei chunle zia gual ma chun hiu in,” a tia.

¹²Chuleh, sedawlte baptisma chang ding ah hungte chunle, “Hotupa, kei un bang ka bawl diam uh?” a hung tiu a.

¹³Ama chun a kiang un, “La lâk ding ua kigen jat bep chu lau inla, a khêl a vâl la kiu in,” a tia.

¹⁴Sepaite’n le a hun dong un, “Aleh, kei unla, bang ka bawl diam uh?” a hung tiu a. Ama chun, “Dik lo tak ah mi suklau a hem, liausak a hem in mi paisa lâkpiak kiu in, la law jat un lungawi un,” a tia.

¹⁵Mipite chun Johan chu, Messiah kiti chu ho a hiziang ta dia aw! ti ah ngaituanau buai tak ah a um lai tak un,

¹⁶Johan in a kiang un, “Kei hin vang tui in ka baptis sek hi; ahi’n, keima sâng ah lopi zaw hung ding ahi, a kengtawdap khau tham tâk le ka hi puai; ama chun Thagau Thiangtho leh mei in hun baptis ding ahi.

¹⁷A khut in phajâp a chawi ah; a phual ah a si jap thiang intin, bupang ah sungkhawm in ah; a si’te chu vang mei mit theilo ah chun hâltum in a,” a tia.

¹⁸Chun, tîlkhona thu tam tak in mipite kiang in chanchinpha a gen a.

¹⁹Himaleh, gam awppa Herod khan, a suapipa Philip ji Herodias a la kichenpi thu ah khan, Johan in Herod chu awimaw in a la vau a;

²⁰a thil hi’khialna belap dingin Johan chu suangkul in a khum nalai sêt hi.

²¹Mipi zosia’n baptisma a chan zaw phat un, Jesu le baptisma a hung chang ah, a pauchap leh van a hung kihong a,

²²Thagau Thiangtho chu vakhu gual in a chung in a hung chû. Van ah kipat aw hung pawt chun, “Nangma, ka Chapa dawi tak la hi, la chung ah ka kipak ma ma hi,” a hun tia.

²³Jesu’n na a hun sep pat lai ah chun, ama chu kum sawmthum vêl mi a hita’n; mi ngai in ama chu Joseph chapa ahi’n, ama chu Heli chapa ahi’n;

²⁴ama chu Matthat chapa ahi’n, ama chu Levi chapa ahi’n, ama chu Melkhi chapa ahi’n, ama chu Jannai chapa ahi’n, ama chu Joseph chapa ahi’n;

²⁵ama chu Mattathias chapa ahi’n, ama chu Amos chapa ahi’n, ama chu Nahum chapa ahi’n, ama chu Esli chapa ahi’n, ama chu Naggai chapa ahi’n;

²⁶ama chu Maath chapa ahi’n, ama chu Mattathias chapa ahi’n, ama chu Semein chapa ahi’n, ama chu Joseph chapa ahi’n, ama chu Joda chapa ahi’n;

²⁷ama chu Joanan chapa ahi’n, ama chu Rhesa chapa ahi’n, ama chu Zerubbabel chapa ahi’n, ama chu Shealtiel chapa ahi’n, ama chu Neri chapa ahi’n;

²⁸ama chu Melkhi chapa ahi’n, ama chu Addi chapa ahi’n; ama chu Kosam chapa ahi’n, ama chu Elmadam chapa ahi’n, ama chu Er chapa ahi’n,

²⁹ama chu Joshua chapa ahi’n, ama chu Eliezer chapa ahi’n, ama chu Jorim chapa ahi’n, ama chu Matthat chapa ahi’n, ama chu Levi chapa ahi’n,

³⁰ama chu Simeon chapa ahi’n, ama chu Judah chapa ahi’n, ama chu Joseph chapa ahi’n, ama chu Jonam chapa ahi’n, ama chu Eliakim chapa ahi’n,

³¹ama chu Melea chapa ahi’n, ama chu Menna chapa ahi’n, ama chu Mattatha chapa ahi’n, ama chu Nathan chapa ahi’n, ama chu David chapa ahi’n,

³²ama chu Jesse chapa ahi’n, ama chu Obed chapa ahi’n, ama chu Boaz chapa ahi’n, ama chu Sala chapa ahi’n, ama chu Nahshon chapa ahi’n,

³³ama chu Aminadab chapa ahi’n, ama chu Admin chapa ahi’n ama chu Arni chapa ahi’n, ama chu Hezron chapa ahi’n, ama chu Perez chapa ahi’n, ama chu Judah chapa ahi’n,

³⁴ama chu Jakob chapa ahi’n, ama chu Isak chapa ahi’n, ama chu Abraham chapa ahi’n, ama chu Terah chapa ahi’n, ama chu Nahor chapa ahi’n,

³⁵ama chu Serug chapa ahi’n, ama chu Reu chapa ahi’n, ama chu Peleg chapa ahi’n, ama chu Eber chapa ahi’n, ama chu Shelah chapa a hin,

³⁶ama chu Kaina’n chapa ahi’n, ama chu Arphaksad chapa ahi’n, ama chu Shem chapa ahi’n, ama chu Noah chapa ahi’n, ama chu Lamek chapa ahi’n,

³⁷ama chu Methuselah chapa ahi’n, ama chu Enok chapa ahi’n, ama chu Jared chapa ahi’n, ama chu Mahalalel chapa ahi’n, ama chu Kaina’n chapa ahi’n,

³⁸ama chu Enos chapa ahi’n, ama chu Seth chapa ahi’n, ama chu Adam chapa ahi’n, ama chu Pathian chapa ahi.