Read Vaiphei LUKA 4 Bible Online

LUKA 4 - Vaiphei bible

LUKA 4

¹Jesu chu Thagau Thiangtho ah dim in Jordan lui ah kipat chun a hung kit a, Thagau chun gamthip in a puilût ngal tai.

²Diabol thep in ni sawmli sung a um a. Zia hun sung ah chun bangma a ne puai; zia hun tawp lam ah chun a gil a hung kial tai.

³Diabol chun a kiang in, “Pathian Chapa la hileh, zia suang hi vaithum suaksak ziang ta’n la,” a tia.

⁴Jesu’n a dawnhu a, “Mihing hi vaithum mai in hing pua’n tin, Pathian kam ah thu tin pawt chun hing zaw’n a, ti zik ahi,” ti’n a dawnhu a.

⁵Chun, diabol chun tângsâng tak ah a pui to ah, khawvel lenggam zosia a etsak a,

⁶diabol chun a kiang in, “Zia zosia chung ah thuneina leh a lopina hi hun pia’ng ka, ka kiang ah piak ahi tangal a, ka nop tapo kiang in ka pia thei hi.

⁷Tu’hin nang in chibai ei bûk inla, a leng in chang ziang in,” a tia.

⁸Jesu’n a dawnhu, a kiang in, “Lalpa la Pathian chu chibai la bûk ah, ama na bep la sep ding ahi, ti zik ahi ngal a,” a tia.

⁹Ziaphatchun, Jerusalem lam in a pui ah, tempul chungvûm in a dinsak ah, a kiang in, “Pathian Chapa la hileh zia tak ah kipat hin chawmtha’n:

¹⁰‘La chung thu a hin Nangma hun vêng dingin a vansawlchâkte hun sawl intin;

¹¹a khut un hun dom intiu in, la keng in suang suikha lo ding la hi’ ti zik ahi ngal a,” a tia.

¹²Jesu’n a dawnhu a, “Lalpa la Pathian chu patep kin, ti ahi,” ti’n a dawnhu tai.

¹³Diabol chun a theptheina zosia mang in a thêm ah, a zaw lo phatin hun lemchâng dang â dingin a nusia tai.

¹⁴Jesu chu Thagau thilhitheina kithuam in, Galili gam ah a chia kit ah, a chanchin chu zia gam kîmvêl ah chun a kithang suak tai.

¹⁵A kikhopna In un thu a hil jel ah, mi zosia pachat in a um tai.

¹⁶A seiletna khua Nazareth chu a hung tun phatin, sabbath ni a hi’dan ngai gual in kikhopna In ah a lut a. Lekhabu sim dingin a hung ding a.

¹⁷Jawlnei Isai Lekhabu jial chu a kiang in a piau a; zia Lekhabu jial chu a tham ah, zia thu kizikna lai tak hi a hun sim a:

¹⁸“Liangvaite kiang ah chanchinpha gen ding ah ei guat ziakin, Lalpa Thagau chu ka chung in a um hi. Ama chun saltângte kiang ah pawtdawna thu leh, mitthûmte kiang ah mitvakna nei kitna dingte, tawden ah umte thâdok ding leh,

¹⁹Lalpa lungdam kum thu puangjak dingin ei sawl ahi,” ti hi.

²⁰Lekhabu chu a jial kit ah, a enkolte a pia kit ah, a kichu tai. Sunagog ah mi zosia mit chu a chung in a chu tai.

²¹Chuleh, a kiang un, “Zia Pathian Thu hi tu’ni hin la het un a guitung tai,” ti’n a hun gen pan tai.

²²A leng un ama a pakchau ah, a kamsuak hepina thute chu mak a sau a, “Zia pa hi Joseph chapa hilo a hem?” a tiu a.

²³Ama’n a kiang un, “Nang un zia tekhinthu, ‘Daktor, nangma kihi’dam in! Kapernaum khua la thilbawl ka la het zosiau kha, zia tak ah nangma khua lam ah hinle bawl in’ ei ti ngei ding la hiu.

²⁴Titakzet in ka hil la hiu, Jawlnei chu ama umna khua leh gam sung in a lop ngai sek puau hi.

²⁵Himaleh, thu dik tak chu zia hi ahi: Elijah hun lai ah khan, kum thum leh tha guk sung van a hung pin ah, a gam pumpi kial a tun lai khan, Israelte lak ah meithâi tam tak a la um tho ui;

²⁶himaleh, Elijah chu Sidon gam ah, Zarephath khua meithâinu kiang tilo ngal ah khan sawl in a um diak puai.

²⁷Chuleh, jawlnei Elisha hun lai ah khanle, Israelte gam ah phâk tam tak a la umnau in; himaleh, Suria gam ah Naaman ti’ longal kha sukdam in a um diak puau hi,” a tia.

²⁸Sunagog Insung ah um zosia’n a thugen chu a het phat un, a hung lungna tau a.

²⁹A hung kipan ua, khua kipat chun a nawdok tau ah, a khuau kingakna tângpang lam kawlkho ah sotthâk ding gua’n a kai tau a.

³⁰Himaleh, ama chu mipi lak ah hung kigeldok in, a chia mang tai.

³¹Galili gam ah khawpi, Kapernaum lam ah chun a hung ah, sabbath ni’n mite chu thu a hil sek a.

³²A thugente chun thilhitheina a nei ziakin, mak a sa ma mau a.

³³Zia sunagog ah chun thithabuak vop mi pakhat a um ah; ama chu aw ngai tak in a hung kiko a,

³⁴“Nazareth Jesu, bang ei law ding ah hung la hem? Ei sumangthai ding ah hung la hi maw? Nangma ka hun hia’i, Pathian Mithiangtho la hi,” ti’n a kiko a.

³⁵Himaleh, Jesu’n a vau ah, “Thip inla, a sung ah kipat in hung pawt in,” a tia. Tichun, thitha chun a ma-âng un a sep pai ah, suliam lo in a sung ah kipat in a hung pawt tai.

³⁶A leng un mak a sa ma mau ah, “Bang thu gen ahi tam? Thu nei tak leh thilhithei tak in thitha buakte chu thu a pia’n, a pawt daw mai uh hi!” ti’n a gen tau hi.

³⁷Tichun, zia tuamvêl ah chun a chanchin chu a kithang veng vung tai.

³⁸Sunagog ah kipat a hung pawt ah, Simon In ah a lut a. Zia tak ah chun, Simon talpinu chu damlo khawsik gim tak in a la um a; ama â ding ah chun a la dot piak un.

³⁹Ziaphatchun, a kiang in a vading ah, a khawsik chu a vau ah; tichun, khawsik chun a nusia tai. Zia zaw zaw ah chun a hung ding ah, a nau a sep piak tai.

⁴⁰Nisa tum ding kuan phatin, hivei chuam chuam neite leh damlo zosia chu a kiang in a hun puikhawm ua; a chung un a khut a ngat ah, a sudam chiat tai.

⁴¹Thitha buakte hawle kiko kawm kawm in a pawt un, “Nang hi Pathian Chapa chu la hi” a tiu a. Ama chu Messiah ahi ti a het ziak un, pau lo dingin a vau tai.

⁴²Khua a hung vak phatin a pawt ah, gamthip lam in a chia tai. Mipite chun a hun hawl ua, a kiang in a hung ua, chia mang lo dingin a hung tho tau hi.

⁴³Himaleh, ama chun a kiang un, “Khawpi dang ah le Pathian gam chanchinpha hi ka gen ding ahi; zia ding ah chu sawl ka hingal in,” a tia.

⁴⁴Tichun, Judea gam ah sunagogte ah chun thu a gen pek tai.