Read Vaiphei LUKA 5 Bible Online

LUKA 5 - Vaiphei bible

LUKA 5

¹Jesu chu Genesaret Dil pâm ah a din pêt in, mipite a Pathian thugen ngaitha dingin a hung tai khawm sau sau un,

²dil gei ah chun long pani a mu’n; sanga mante chu pawtdok ah, a lenteu a sawp lai tak uh ahi’n.

³Tichun, long pakhat, Simon â pen chun a lut ah, lui gei ah kipat neukhat tawl lut deu dingin a don a. Mipite chu long ah kipat chun thu a hil a.

⁴A thugen zaw phatin Simon kiang in, “Lithûk lam juan inla, sanga man dingin la lên sep in,” a tia.

⁵Simon in a kiang in, “Hotupa, gim tak ah jankhua’n ka pang tau in, bangma ka man puau hi. Himaleh, la thu’n lente sep kit ing ka,” ti’n a dawnhu a.

⁶A vak se leh sanga honpi tam tak a khu kha tau ah, a lenteu chu a ek diak diak tai.

⁷Ziaphatchun, long dang ah a lawiteu chu amau hû dingin khut in a vak jap un. A hung ua, long pani chu tum vang vang khop in a sungdim gêl tau hi.

⁸Himaleh, Simon Peter in zia chu a mu phât in, Jesu kengbul in a hung bokkhup ah, “Lalpa, ei nusia ta’n, migilo ka hi!” a tia.

⁹A sanga mat hawu chu ama leh a kiang ah umte chun mak a sa ma mau hi.

¹⁰Simon lawite ma, Zebedai chate Jakob leh Johan inle mak a sa ma mau a. Jesu’n Simon kiang in, “Lau kin, tu’khêl chu mihing man ta ding la hi,” a tia.

¹¹A longteu chu tiaupho ah a hun tawl kâi phat un, bangkim nusia in ama chu a zui tau hi.

¹²Jesu chu khua pakhat ah a um lai in, phâk in a pum ah a tuam mi pakhat a um a. Ama chun Jesu a mu phât in leitual si’n a bokkhup ah, “Lalpa la doi chun lei hithiangtho thei hi,” ti’n a la don a.

¹³Ama chun a vak bân ah, a khoi ah, “Ka doi hi. A la thiangtho ta’n,” a tia. Tichun, a phâk chu thakhat in a hung bei tai.

¹⁴Chuleh, ama chun kuama kiang ah gen lo dingin thu a pia. A kiang in, “Chia inla, thiampu vaki-etsak inla, amau hiatsakna leh, Mosi thupiak dungzui ah la thianna ding ah thillat ding chu valân in,” a tia.

¹⁵Himaleh, Jesu chanchin chu a hung kithang suak ta’n; mi tam tak a thu ngaitha ding leh, a natnau sukdam sak dingin a hung khawm tau hi.

¹⁶Himaleh, ama chu gamthip lam in a chia mang ah, a vapauchap tai.

¹⁷Ni khat chu thu a gen lai in, (Galili gam ah khawpi kipat, Judea gam leh Jerusalem vêl ah kipat, mipi hung khawmte lak ah chun) Pharisaite leh lekhazikte le a la kichu khawm un. Amau sukdamna ding ah chun, Lalpa thilhitheina a kiang in a um a.

¹⁸Zia lai tak ah chun zeng pakhat, a puanpha pum ah lâng in a hun jawn un; Jesu ma-âng ah koi dingin hun jawn lut a guau a.

¹⁹Himaleh, mipi a tam tâkluat ziakin, a puak lut theina ding a um pua’n, Inchung lam in a kaldok ua; a kijawnna pum in Jesu ma-âng jawn ah chun, mipi lak in a hun khaitha tau a.

²⁰Ama chun a ginnau chu a la mu phât in, a kiang ah chun, “Mihing! la gitlonate ngaidam ahi tai,” a tia.

²¹Ziaphatchun, lekhazikte leh Pharisaite chun, “Zia Pathian gensia hi kua a hem? Pathian tilo ngal kua a hem gitlona ngaidam thei ding?” a tiu a.

²²Himaleh, Jesu’n a lungthim ua a ngaituau chu a het phat in a kiang un, “Bang ding ah zia gual lungthim chu nei la hiu em?

²³‘La gitlonate ngaidam ahi tai’ ti tawh, ‘Tho inla, chia in’ ti khoi a bailam zaw em?

²⁴Bang hilehle, Mihing Chapa hin lei chung ah hin gitlonate ngaidam theina a nei hi, ti la hetna ding un, zeng kiang ah chun: ‘Ka hun sawl la hi, tho inla, la puanpha la’n la, la In lam in chia ta’n,’ ” a tia.

²⁵Tichun, thakhat in a thodok ah, a ma-âng un a puanpha chu a kilâk ah, Pathian pâk kawm in a In lam in a chia tai.

²⁶Tichun, a leng un lamdang sakna’n a dim tau a; Pathian a pâk chiat ua, lau tak kawm in: “Tu’ni hin thil lamdang tak I muu ahi” a tiu a.

²⁷Ziazaw chun a pawt ah, sedawlna mun ah kichû, sedawl mi pakhat a min Levi a mu’n; a kiang in, “Ei zui in,” a tia.

²⁸Tichun, bangkim nusia in a kipan ah, a zui ngal tai.

²⁹Levi chun a In ah Jesu â dingin luaithena lopi tak a bawl ah; sedawl mite tawh, midang tampi tawh ama chu a uppi tau a.

³⁰Himaleh, a lak ua Pharisaite leh a lekhazikteu chu a nungzuite chung in a hung phun tau a, “Bangatia sedawl mite leh migilote tawh an nekhawm ah dawn khawm la hiu em?” a tiu a.

³¹Jesu’n a kiang un, “Mi damtheite chun daktor a ngai puau in, mi damtheilote chun a ngai uh ahi;

³²midikte ko ding ah hung ka hipua’n, migilote’n a gitlonau a haisanna ding ua hung ka hizawi,” a tia.

³³Chuleh, amau chun a kiang in, “Ahi’n la, Johan nungzuite leh Pharisaite nungzui haw khan an a ngawl sek un. Aleh, la nungzuite hin la a neu in, a dawn un,” a hung tiu a.

³⁴Jesu’n a kiang un, “Mopuite kiang ah a pawsal ding chu a um sungsia’n mopuite chu an la ngolsak thei sek awm?

³⁵Himaleh, a pawsal chu a kiang ua kipat puimangna ding ni hung tung intin, zia tak chuleh vang hun ngawl ta’n au,” a tia.

³⁶Chuleh, a kiang un tekhinthu’n thu dang khat a gen kit a: “Kuama’n puan thak them puaitha’n puan lui phawna’n a mang ngai puau hi; phaw tabangleu puan lui leh puan thak them chu kituak pua’n tin, hun kai ek zaw bep ding ahi.

³⁷Chuleh, kuama’n uain thak chu a thawl lui in a thun ngai puau hi; thun tabangleu, uain thak chun a thawl lui chu hun phujak intin, kibuan tin, a thawl pum in mangthai khawm zo ta’n au.

³⁸Uain thak chu thawl thak ah thun ding ahi.

³⁹Chuleh, kuama’n uain lui a dawn zaw nung un a thak a dawn nuam sek puau ah, ‘A lui a phazawi’ a ti sek ui,” a tia.