Read Vaiphei LUKA 6 Bible Online

LUKA 6 - Vaiphei bible

LUKA 6

¹Sabbath ni khat chu bu loulai a haw malam un, a nungzuite chun buvui jut in, a khut un a nuai ua, a neu a.

²Pharisaite lak ah mi khenkhat a hung un a kiang un, “Bangatia, sabbath ni hi’thiang lo chu bawl la hiu em?” a hung tiu a.

³Jesu’n a kiang un, “David leh a lawite a gilkial basap lai ua a thilbawlteu kha sim kha lo la hiu em?

⁴Ama kha Pathian Insung ah a valût ah, thiampute longal in a nêk uh thianglo vaithum kikoi kha a vala, a ne, a lawite le a hop ziang thu kha?” a tia.

⁵Chuleh, a kiang un, “Mihing Chapa hi sabbath ni chung ah lal ahi,” a tia.

⁶Sabbath ni dang khat kit ah chun, sunagog ah a lut ah, thu a hil lai in, pawsal pakhat a khut chang lam zeng a um a.

⁷Tichun, lekhazikte leh Pharisaite chun sabbath ni a sukdam leh sukdam lo a la entha zing in, ama hêkna ding a chânggu zing un.

⁸Himaleh, ama chun a lunggil ua a ngaituau chu a hia’n, khutzengpa kiang ah chun, “Hung inla, zia hin dingin,” a tia. Ama chule a hung ah, a hung ding tai.

⁹Ziaphatchun, Jesu’n a kiang un, “Thil pakhat hun dong ing ka, Sabbath ni’ thilpha bawl a thiang zaw diam thil phalo bawl? Hukhin zawk ding a diam, ahiloleh thalup ding?” a tia.

¹⁰Zia a gen zaw chun a kiang ah umte chu a en a, khut zengpa kiang ah chun, “La khut hun jak in,” a tia. Ama’nle a hun jakdok ah, a khut langkhat gual gual in a hung dam tai.

¹¹Himaleh, amau chu a lungna tau a, “Jesu chu bang law ding I hiu em?” ti’n a kihokhawm tau hi.

¹²Zia hun lai ah chun, tâng chung lam ah pauchap dingin a chia ah; jan khawvak in Pathian kiang in a pauchap a.

¹³Khua a hung vak phatin, a nungzuite chu a ko khawm ah, a lak un sawm leh ni a têldok ah, ziate chu sawlchâk a sak hi.

¹⁴Ziate chu: Simon (ama’n Peter a sak) tawh a suapi Andria tawh, Jakob, Johan, Philip, Bartholomai,

¹⁵Matthai, Thoma, Alphâi chapa Jakob, Zelot kiti Simon kha tawh;

¹⁶Jakob chapa Juda tawh a matsakpa Juda Iskariot kha a hiu hi.

¹⁷Ama chu tawh kiton in a chia suk tau a, mun cham a tun un a ding den a; zia tak ah chun a nungzuite tawh mipi tam tak, Judea gam zosia ah kipat, Jerusalem khua kipat leh Tura leh Sidon tuipi pâm ah kipat in,

¹⁸a thugen ngaitha ding leh a natnau sukdamna dingin a hung khawm tau a. Thithabuak in a sukbuaite le sukdam in a um tau hi.

¹⁹A thilhitheina a pawt ziakin a sukkhak taphot a dam un, mitin in ama chu khoikhâk chiat a gaw tau a.

²⁰A nungzuite lam ah hung kihei in a hun en ah, zia gual hin a gen a: “Nanghaw gentheite haw, mi hampha la hiu; Pathian gam chu nangmau â ahi ngal in.

²¹Tu ah gilkialte hi mi hampha la hiu, hung vâ ding la hingal un. Tu’hun ah kapte hi mi hampha la hiu, hung nui ding la hingal un,” a tia.

²²Mihing Chapa ziak ah a hun huat ua, a hun pâm pai ua, a hun hosiat ua, a hun sukminsiat phat ua leh mi hampha la hiu,

²³ziaphat chuleh lim unla, kipak in kichawm un, van ah la kipakman ding uh chu a nasa ngal a. Zia gual ma chun, la pi leh puteu inle jawlneite chung ah khan a la bawl tangal un.

²⁴Himaleh, nang uh mi hausate haw, la chung uh a gik hi! La thamuannau chu la mu zo tangal un!

²⁵Tu’hun ah vâ leh tai ah umte hi la chung uh a gik hi! Hung gilkial ding la hingal un. Tu’hun ah nuite hi la chung uh a gik hi! Lusûn ah hung kap ding la hingal un.

²⁶Min a hun gen phat tak ua leh la chung uh a gik hi! Zia gual ah chun la pi leh puteu inle jawlnei lêmte kha a la bawl uh ahi kha, a tia.

²⁷Himaleh, ka thu ngaithate haw, ka hun hil la hiu, la mêlmateu chu hepi in bawlphau in.

²⁸Nang uh hun hosiate chu maljawl unla, a hun simmawte chu pauchap piak un.

²⁹La biang langkhat bêngte kiang ah chun a langkhatle dawu in; la puanâk hun lâkpiak kiang ah chun la puanâk chung a lak dingle zada diak kin.

³⁰La thil nei hun don tapo chu pia’n la; la thil hun lâkpiakte kiang ah chunle don kit ta kin.

³¹Min la chung ah a hi’ding ua la dawi gual tak in, mi chung inle bawl un.

³²A hun hepite bep la hepiu leh pakchâkna bang a hem la law ding uh? Migilote’n le amau hepite chu a hepiu ahi.

³³Chuleh, la chung ua thilpha bawlte chung bep ah thilpha la bawl ua leh, pakchâkna bang a hem la law ding uh? Migilote’n le zia gual chun a hisek ui.

³⁴Mu’kit ding la kinepnateu kiang bep a thil la batsak ua leh, pakchkna bang a hem la law ding uh? Migilote’n le a ngaima mu dingin mi gilote kiang in a batsak sek ui.

³⁵Himaleh, la mêlmateu hepiu inla, a phatna ding uh bawl un, mu ding kinem lo hial in thunglâksak un; tichun la kipakman ding uh chu thupi intin, Chungnung penpa chate hiding la hiu; ama chu kipakna châng helote leh mi nunsiate chung inle a jangai thei ma ma ngal a.

³⁶La pau a jangai gual in nang uh le jangai un.

³⁷Mi gensia kiu in, tichun, gensiat in um pua’n lau; mi thiamlo chansak kiu in; tichun, thiamlo chang pua’n lau; ngaidam un, tichun ngaidam in um in lau.

³⁸Piau in, tichun nang uh le piak in um in lau; phatchuamngai tak ah te’piak in, a sawt ah sawnchak in, a law ah lawchak in, a dimlêt hial in la ângsung ua sun piak in um ding la hiu, mi la te’piaknau ngai ma a chun nangmaule te’piak ah um ding la hiu, a tia.

³⁹Chuleh, tekhinthu dang le a gen a, “Mitthûm in mitthûm ma a pui thei em? Kawkhûk ah ke’lut khawm talo ding a hiu em?

⁴⁰Nungzui chu a pu sângin a lopi zaw ngai puai; himaleh, a thiam kim phat leh a pu gual in hung um in a.

⁴¹Nangma mit ah thingbong um a hi’lam helo ah, la unau mit ah ki’dak them neucha um chu bangti muthei la hem?

⁴²Nangma mit ah thingbong um chu mu lo in la unau kiang ah, ‘Unau, la mit ah ki’dak them um chu hun lakdaw piak ing ka’ bangti’n tithei ding la hem? Nang, miphalêm, la mit ah kipat thingbong chu ladok masa’n la, tichun, la unau mit ah kipat ki’dak them um chu ladok dingin muchian thei ta’n la,” a tia.

⁴³Thingpha him him ga sia’n a ga ngai pua’n; thing siale ga pha’n a ga ngai diak puai.

⁴⁴Thing tin a ga ah a kihe mai sek hi. Kuama’n lingkung ah theichang a lo ngai puau in; theimi kung ah kuama’n grep ga a lo ngai diak puau hi.

⁴⁵Mipha chun a lungthim gobawm pha ah kipat chun thilpha a hun suadok sek hi; chuleh, migilo chunle a lungthim gobawm gilo tak ah kipat chun, thil gilo ma a hun suadok sek hi; lungthim ah dimlêt chu kam in a hun gendaw sek ahi ngal a.

⁴⁶Ka thugente jawm lo ah bangatia: Lalpa, Lalpa, ei ti la hiu em?

⁴⁷Kua a hem ka kiang ah hung ah, ka thugente he ah, jawmte chu bang gual mi a hiu em ti hun etsak ing ka:

⁴⁸Ama chu Insa mi, thûk tak cho ah, suangpi det tak chung ah suangphûm lem gual chu ahi. Tui a hung lêt tak leh zia In chu tui in hat tak in a hun khaw ah; himaleh, pha tak ah sak ahi ziakin a hi’lîng zo puai.

⁴⁹Himaleh, ka thu ngaitha ngal ah jawmlote chu, suangphûm umlo ah piaunêl chung mai mai ah Insa gual ahi; tui hat in a hun khaw ah, a pûk pai ngal tai; zia In siat dan chu a huaisia ma ma hi, a tia.