Read Vaiphei LUKA 9 Bible Online

LUKA 9 - Vaiphei bible

LUKA 9

¹Zia nung ah chun a nungzui sawm leh nite chu a ko khawm ah, thitha buakte nawdaw theina leh damlote sukdam theina thuneina a pia.

²Tichun, Pathian gam thu gen ding leh damlote hi’dam dingin a sawldok ta’n;

³a kiang un, “La khualzinnau ah hin tiangkhut, sakhau, vaithum leh dangka bangma keng kiu inla, puanâk chung thua le keng diak kiu in;

⁴kua In hilehle la tunna tapo ua chun tung zing unla, zia kipat chun kipan kit sek un.

⁵Chuleh, kua’nle a hun lawp lo ua leh, zia khua chu la nutsia ding tak ua leh, amau hiatsakna dingin la keng ua leivui chu thingtha malam sek un,” a tia.

⁶Tichun, a kipandok ua, chanchinpha chu gen malam pek in khuate chu a fang un, mun tin in damlote a hi’dam malam pek tau hi.

⁷Lengpa Herod in a thil hi’dan zosia chu a la he zui pek a; Johan kha thina kipat hung thokit hi’n a, tia a gen ziak un a lungkham ta’n.

⁸Mi khenkhat chun, “Elijah hung kilâk kit hi’n a,” a tiu a; midang khenkhatte chun, “Nidanglai ah jawlneite lak ah khat hung thokit hi’n a” a tiu a.

⁹Herod chun vang, “Johan kha a gawl ka tansak tangal ah; zia hi kua hiding a hem, a chanchin zia gual ah ka het ziang hi?” a tia. Ama chu mu têi a nuam tai.

¹⁰Sawlchâkte kha a hung tun kit phat un, a thilbawl zosiau chu a kiang in a gen tau a. Ziaphatchun a mau chu, Bethsaida khua lam in a pui tai.

¹¹Mipite’n a hun het phat un, a hun del pek tau a; tichun, amau haw chu a la lop ah, Pathian gam thu a hil ah, damlote chu a la hi’dam jel hi.

¹²A hung vâigei ta’n, sawm leh nite chu a hung un a kiang in, “Zia tak hi gamthip ahi ngal a, I kiang nai tuam ua khuate ah sawn nêk leh châk ding a kingaituau ah, a giakna diule a ngaitua theina ding un, mipite hi sawldok mai ta’n la,” a hung tiu a.

¹³Himaleh, ama chun, “Nang un nêk ding bang a hem khat piau in,” a tia. Amau chun, “Mi zia jat jat â ding hi I vachawk ziang lo ua leh, vaithum panga leh sanga pani tilo bangma I nei pawngal un,” a tiu a.

¹⁴Amau chu piting ngawnle sang nga vel a hiu a. Ama chun a nungzuite kiang in, “Sawmnga nga’n, a pawl pawl in chutsak un,” a tia.

¹⁵A ti gual chun a kichutsak un, a leng un a chu chiat tau a.

¹⁶Vaithum panga leh sanga pani chu a la, van lam a en ah, a maljawl ah, a hun phelsua ah, mipi lak ah hawm dingin a nungzuite kiang in a pia tai.

¹⁷Tichun, a ne chiat un, a leng un a vâ chiat tau ah; a nêkbang uh chu bawm sawm leh ni a luak dim ui.

¹⁸Khatvei chu, ama ngawn ah a pauchap zaw in, a nungzuite kiang in, “Aleh, keima hi mite’n kua ahi ei tiu em?” ti’n a dong a.

¹⁹Amau chun a kiang in, “Khen khat in, ‘Baptispa Johan kha ahi’ a tiu in; khenkhat in, ‘Elijah ahi’ a tiu in; midang khenkhat chun, ‘Nidanglai ah jawlneite lak ah pakhat hung thokit ahi’ a tiu hi,” ti’n a dawnhuu a.

²⁰Ama chun a kiang un, “Aleh, nanghaw’n kua ahi lei tiu em?” ti’n a dong ta’n. Peter in, “Pathian Messiah chu la hi,” ti’n a dawnhu a.

²¹Tichun, zia thu chu kuama kiang ah gendok lo dingin thu a pia ta:

²²“Mihing Chapa hin haksatna tam tak thuak intin, upate leh thiampu lalte leh lekhazikte doi lo in um intin, that intiu in; himaleh, a nithum ni leh thokit ding ahi,” a tia.

²³Ama chun a leng ua kiang in, “Kua’nle ei zui a nop chun, ama leh ama kihemil in, nisi’n ama kros kiput in ei zui hen.

²⁴Kuale a hinna hukhin nuam chun chân intin, kuale keima ziak ah a hinna chân chun, zia mi ngei chun a hinna chu humbit in a.

²⁵Min khawvel hi a pum in nei hen la, ama hinna chân ta leh, ama â dingin bang phachuam ding a hem?

²⁶Kuale, keima leh ka thu japi tapo chu, Mihing chapa’n, ama lopina tawh, a Pa lopina tawh, vansawlchâk thiangthote lopina tawh a hung phat leh zia mi chu hun japi in a.

²⁷Himaleh, thutak ka hun hil la hiu, zia tak ah dingte lak ah hin Pathian gam a mu masiau, thina tep lo ding mi khenkhat a um ui,” a tia.

²⁸Zia a gen zaw nung ni giat ni’ chun, Peter tawh, Jakob tawh Johan a pui ah, tâng ah pauchap dingin a chiapi a.

²⁹A pauchap lai un, a mêl a hung danglam ta’n; a puante chu a hung vâm tai.

³⁰Thakhat in mi pani, Mosi leh Elijah tawh holim in a mu tau a.

³¹Amau chu lopi tak in a hung kilâk un, Jerusalem ah a mualsua ding, a thina ding thute chun a holim un.

³²Himaleh, Peter leh a lawite chu a i-mut uh a suak ma ma ta’n; a hung haldaw phat un, a kiang ah ding mi panite leh a lopina chu a mu tau a.

³³Ama a nutsia guat phat un, Peter chun Jesu kiang in, “Hotupa, zia tak ah um hi ei uh â dingin a nuam hi; bawk pathum khaw ing ka tiu in, nang â dingin pakhat, Mosi â dingin pakhat, chuleh, Elijah â dingin pakhat,” a tia. Bang gen a hile a kihe puai.

³⁴Zia thu a gen lai tak chun, sûm a hung jing ah, amau chu a hun lia ta’n; amau chu sûmpi’n a hun chup phatin a lau ma mau a.

³⁵Chuleh, sûm lak ah kipat chun aw a hung pawt a, “Zia hi ka Chapa dawi tak chu ahi, ama thu ngai un!” a hun tia.

³⁶Aw chu a hung thip phatin Jesu chu ama ngawn um in a mu tau a. Zia thu chu a îm ua, zia hun lai ah chun a thil muu chu kuama a hil puau hi.

³⁷A jing ah tâng ah kipat a hung suk phat un, mipi tam tak in a la lamtuau a.

³⁸Mipi lak ah chun mi pakhat a hung kikodok a, “Hotupa, zia ka chapa hi. Ka chapa neisun ahi’n, ei et piak dingin ka don la hi.

³⁹A châng châng leh thitha buak chun a hun soisa sek in, a hung kikodok sek ah; a chilphuante nawk in, thidang hial ah a soi nung leh a nusia bep sek ahi.

⁴⁰La nungzuite ei nawdaw piak ding ah ka dot leh ahi’thei puau in,” a tia.

⁴¹Ziaphatchun Jesu’n, “Aw ginna tawmte leh khangthak chavaite haw, la lak ua bang chan um nalai ding ka hia, ka hun khawngai nâk lai ding a hem? La chapa chu zia lam ah hin hun pui in,” a tia.

⁴²A hung lai un thitha buak chun, khawhelo khop in nasa tak in a hun soisa tai. Jesu’n thitha buak chu a hun vau ah, naupang chu a hi’dam ah, a pa kiang in a chiasak kit tai.

⁴³Mi zosia chun Pathian thilhitheina lopi tak chu lamdang a sa ma ma tau hi. Jesu thilbawl taphot chu maksa tak ah a um lai un, ama’n a nungzuite kiang ah chun:

⁴⁴“Zia ka thugen hi la nakhang un lut ta hen: Mihing Chapa hi mite khut ah matsak in um ding ahi,” a tia.

⁴⁵Himaleh, a thugen chu a ngaina a hepuau ah, a het theilona ding ua kisêl ahi’n; himaleh, zia thu chu ama dot ding chu a lau ngal un.

⁴⁶A lak un kua a lianpen diam, ti thu ah kinialna a hung um ta’n.

⁴⁷Himaleh, Jesu’n a lungthim ua a ngaituateu chu a la hia’n; naupang khat a kai ah, a kiang in a dinsak ah, a kiang un:

⁴⁸“Kuale zia naupang hi ka min ah lop tapo chu keima ei lop ahi; keima ei lop chu ei sawlpa lop ahi; la lak ua a neupen chu a lopipen hung hiding ahi,” a tia.

⁴⁹Johan in a kiang ah chun, “Hotupa, mi pakhat la min ah thitha a la nawdok ka hun muu ah, ei uh lak ah pang ah ei zui a hilo ziakin ka hun zada tau hi,” a tia.

⁵⁰Jesu chun a kiang in, “Kuale, ei dodâl lo chu ei uh lam ah pang ahiziak in zada kiu in,” a tia.

⁵¹Lâk to ah a umna ding hun a nai phatin, Jerusalem lam bep ngaitua in, zia lam chu a nga zing ta’n.

⁵²A malam in mi a sawl a. Amau chu a chiau a, Samaria gam ah khua pakhat ah thil a la ngaitua tûp masa dingin a lut un.

⁵³Ama chu Jerusalem lam zuan ah chia ahi ziakin a la lop puau a.

⁵⁴A nungzuite lak ah Jakob leh Johan in a mu phât un, “Lalpa, van ah kipat in mei ko thai tiu in, kâk tumsak ziangleu hin la ti paw em?” a hun tiu a.

⁵⁵Himaleh, ama chu a hung kihei ah a vau a.

⁵⁶Mite hinna susia dingin Mihing Chapa hi a hung puai, amau hukdam ding ah hung a hizawi, a tia. Tichun, khaw dang in a chia tau hi.

⁵⁷Chuleh, lam a zawt lai un mi pakhat in a kiang in, “Lalpa, la chiana taphot in hun zui ing ka,” a tia.

⁵⁸Himaleh, Jesu’n a dawnhu ah, “Si-alte’n kua a nei un, chunglêng vachate’n le bu a nei ui; himaleh, Mihing Chapa hin vang lu-ngakna dingle a nei puai,” a tia.

⁵⁹Midang pakhat kiang ah chun, “Ei zui in,” a tia. Himaleh, ama chun, “Lalpa, ka pa ei vuisak tadi in,” a tia.

⁶⁰Jesu’n a kiang in, “Mithite chun amau mithi chu a la kivui tau hen; nang vang chia’n la, Pathian gam thu hi vagen jak ta’n,” a tia.

⁶¹Chuleh, midang inle, “Lalpa, hun zui ing ka, himaleh, ka In ah mite mangpha vathâk phot ing ka,” a tia.

⁶²Himaleh, Jesu’n a kiang in, “Kuale lou kaina langkawn tu tangal ah, nung lam en kit chu, Pathian gam mi hitâk ahi puai,” a tia.