Read Vaiphei DAN LEKHABU 1 Bible Online

DAN LEKHABU 1 - Vaiphei bible

DAN LEKHABU 1

¹Zia thute hi Jordan sualam, Paran gamthip ah um, Tophel, Laban, Hazeroth leh Dizahab kikâl ah, Suph mai jawn phâicham ah, Mosi’n Israelte zosia kiang ah a gen chu ahi.

²(Horeb tâng ah kipat Kadesh-barnea chu Seir tâng gam haw malam ah ni sawm leh khat chiana gamla ahi).

³Kum sawmli a tin, a tha sawm leh khatna, a ni khat ni chun LALPA‘n amau hil ding ah thu a piak zosia chu Israelte kiang in Mosi’n a gen sawn ta’n:

⁴Heshbon khua chêng Amorte Leng Sihon, chuleh Edrei leh Ashtaroth gamah vaihawm Bashan Leng Og a tha zawu in,

⁵Jordan gâl ah Moab gam ah chun Mosi’n zia gual hin dan thu a hilchian a:

⁶LALPA I Pathian un Horeb tâng ah khan I kiang un, “Zia tâng ah hin la um sawt talua tau hi.

⁷Kichawn unla, Amorte chênna tâng gam leh a kîmvêl ua gamte: Arabah tâng gam zosia leh Saphelah, Negeb tuisuagiat pang gam niamna, Kanaante leh Lebanonte chênna gam zosia ah kipat Luipi Lian, Euphrates luipi tiang in chia pek un.

⁸En un, la mau in gam chu ka hun koi piak ta la hiu; tichun, chiau inla, la pu leh pateu Abraham, Isak leh Jakob kiang leh amau nung ah a suan leh pâkteu in a lua ding ua piak ka la tiamna gam chu valua tau in,” a tia.

⁹Zia lai khan la kiang un: “Keima bep in hun paw zo lo ka hi.

¹⁰LALPA la Pathian un a hun hi’pungah, tu’hin van ah aksite jat hial ah simsên lo la hitau hi;

¹¹LALPA, la pu leh pateu Pathian chun a le sâng mun sâng ah tam zaw in hun hi’pung hen la, a hun tiamsa dungzui in mal hun jawl ta hen!

¹²Ahi’n, bangti’n hem la kinak buainau puakgik zosia keima ngen ah ka puak zaw ding?

¹³Nangmau phung tin ah kipat in a pil, hiatthiamna nei leh mi ja-um chiat, nangmau phung tin ah luchang hi dingin kitêldok chiat un,” ti’n ka la gen ta’n.

¹⁴Nang hawn, “La thil guanggal chu thilpha tak ahi,” ti’n lei dawnhuu a.

¹⁵Tichun, la phung lak ua kipat in mipil leh a ja-um deute sia ka ladok ah, nanghaw chung ah hotu ding bang, a sâng têl chung ah hotu ding leh, a za têl chung ah hotu dingte, sawmnga chung ah hotu dingte, a sawm têl chung ah hotu ding leh nanghaw phung chiat ah hotu dingte ka guat a.

¹⁶Zia hunah la vaihawmteu chun, “La mipiteu lakah thubuai chu dik tak in ngaituau inla, gam dang mi leh a gam sung mi him him lakin dik takin thu tan sek unla.

¹⁷Doichuam nei in vaihawm kiu in; milian leh neu kibang in ngaitua piak unla; kuama lau chuam nei kiu in, vaihawmna chu Pathian â ahi ngalah. Nang uh ngaitua ding ah haksa talua phot chu, ka kiang ah hun tut un, keima’n ngaitua na’ng ka,” ti’n thu ka la pia ta ngal a.

¹⁸Zia hun ah khan la bawl ding zosiau thu ka hun peta kha lam.

¹⁹Ziaphatchun, LALPA thupiak gual in Horeb tâng ah kipat in ka pawtdok ua, Amorte chênna tâng gam, lampi dung ah la mu sau, gamthip lian tak leh lau um tak chu hawtheng in, Kadesh-barnea chan in ka chia tau a.

²⁰La kiang un, “LALPA I Pathian un ei piak Amorte chênna gam chu la tung tau.

²¹En un, LALPA la Pathian un gam chu a hun pe zo ta’n; chia to unla, valua tau in; la pu leh pateu kiang ah a tiamsa ahi ngal ah; lau kiu inla, lungthuai diak kiu in,” ti ka gen la hiu.

²²Chuleh, ka kiang ah la leng ua hung in, “I chiana ding uh a gam va entha ding, a lampi leh a gam vaen ah, a khuate chanchin vahechian ah ei hung hil kit dingin mi sawl hitiu,” la hung tiu a.

²³Zia la thugen uh chu pha ka sak ziakin, la lak ua mi sawm leh ni, phung tin ah kipat mi khat chiat ka la teldok ta’n;

²⁴Ziate chu a kuandok ua, tâng gam te ah kuan to in, Eshkol phâijang tiang ah chia in, a gam pumpi a vachuan suak tau a.

²⁵A gam ah thâiga khenkhatte chule a hun puauah, “LALPA I Pathian un ei piakna gam chu a pha ma ma ziang hi,” ti’n ei hil ua.

²⁶Himaleh, la chia to nuam puau ah. LALPA la Pathian thupiak uh la nial un;

²⁷la puanbûk sung un la phunchiak un, “LALPA‘n ei muda ziak ah Amorte khutah hi’mangthai dingin, Aigupta gam ah kipat in ei la puidok ahi.

²⁸Khoilam zuan I hitau em? I unauteu in, A gam ah chêngte chu ei haw sâng ah hatzaw leh sangzaw ngen a hiu ah; a khawpiteu chule a lian in van supha khop hial ah kulbâng sâng nei ngen a hiu; zia tak ah chun Anak suante chule ka hun mu malam ngei ngei ui!, a ti nalai ua,” la tiu a.

²⁹La kiang un, “Amau chu huphul kiu inla, lau diak kiu in.

³⁰LALPA la Pathian nang uh hun puipa chun, Aigupta gam ah la mitmuu ah thil a hun bawl piak gual tho ah khan, la gâlteu chu hun do piak ding ahi;

³¹chuleh, gamthip ah khan LALPA la Pathian un a hun pui huai dante leh, la chiana taphot ua zia mun la hung tun tiang ua, min a chate a kaibât gual ua, a hun kaibât dante hi la mu ta ngal un.

³²Chutisapi’nle, LALPA la Pathian uh la taksang zo diak puau a;

³³ama’n la mau kai in, la giamun ding uh hawldok ding leh, la lampiteu kawkmu dingin, jan ah meikuang leh sûn ah sûmpi’n a hun pui pek ah,” ti ka hil tak kha.

³⁴LALPA‘n la thugen uh a la het phat in a lung a na ta’n; hiti hin a kitiam tai:

³⁵“La pu leh pateu kiang ah piak ding ah ka la kitiamna gampha chu, zia khang gilo takte lak ah pakhat chânle lua pua’n tiu in;

³⁶Jephuneh chapa Kaleb beplo ngal in lua pua’n ah. A vachawtna gam chu ama leh a suante kiang ah pia ding ka hi, det tak ah LALPA a zui ziakin,” ti in.

³⁷Nangmau ziakin keima chung natiang in LALPA a lungna ta’n, ka kiang in, “Nangle zia tak gam chu lut pua’n la;

³⁸nangma hun kithuapi Nun chapa Joshua hi vang lut in a; ama hi tilkho in, Israelte gam chan ding chu ama’n lua ding ahi ngal a.

³⁹La cha sênteu, sia leh pha he nailote, gâlhing mat ding bep a hiu, la titeu sia chu lut intiu in, gam chu amau kiang ah pia’ng ka tin, chang ta’n au.

⁴⁰Nanghaw vang, Tuipi San lamkâi ah, gamthip ah chun vâkvâi den tau in,” a tia.

⁴¹Chuleh, nang un, “LALPA chung in ka la bawlkhial tau hi. LALPA ka Pathian un thu ei piak gual ah vachia to ah, vado ngal dingin ka kisa zo tau,” la tiu ah. Tichun, la leng ua gâlvan ah kithuam in, tâng gam va lâk ziang ding chu thil bailam tak gual in la ngai ua.

⁴²LALPA‘n ka kiang in, “A kiang un hiti hin gen in: Chia to kiu hen la, vado kiu hen; ka hun umpi ta paw’ngal ah; la mêlmateu in hun that gam kha’n au, ti’n,” a gen a.

⁴³Ka hun hil sapi’nle la ngaisak puau ah. LALPA thupiak la dodâl ua, tâng gam ah chun la vakuan to tei tei tau a.

⁴⁴Zia tâng gam ah chêng, Amorte chu nang uh do dingin a hung kuandok ua, khuaingal in mi a del gual in a hun del mang tau ah. Seir tâng ah kipat Hormah tiang in a hun zo tau hi.

⁴⁵LALPA kiang ah hung kile’kit in kap hial in don maleu chinle, LALPA‘n la awu chu ngaisak pua’n tin, hun ngaisak diak ta pua’n a.

⁴⁶Tichun, Kadesh mun ah sawt tak la châm tau a.