Read Vaiphei DAN LEKHABU 10 Bible Online

DAN LEKHABU 10 - Vaiphei bible

DAN LEKHABU 10

¹Zia hun ah chun LALPA‘n ka kiang in, “A masate gual ah khan suangpêk pani sêk kit inla, tâng ah khin ka kiang ah hung to kit in; chuleh, thingkuang khatle siam in.

²Tu’ma lam ah la sesiatsa suangpêkte chung ah thute kha hun zik piak kit ing ka tin, ziate chu thingkuang ah chun koi in,” a hun tia.

³Tichun, thinggi thing in thuthung thingkuang khat ka siam ah, a masa gual gual khan suangpêk pani ka siam kit ah; zia suangpêk te ni chu ka khut ah chawi in, tâng ah chun ka kal to tai.

⁴Suangpêk ah chun, a masa ah kizik gual, mipi kikhop ni ah tâng chung ah mei kuang lak ah kipat LALPA‘n thu a la gente, Thupiak Sawm kha a hun sun kit ah, zia chu LALPA‘n keima ei pia tai.

⁵Tichun, tâng ah kipat in ka hung kum suk ah, zia suangpêkte ni chu thingkuang ah chun ka koi ah, LALPA thu ei piak dungzui in zia tak ah chun a um den tai.

⁶(Israelte chu Beeroth-bene-jaakan ah kipat in Moserah tiang in a chiau ah. Zia tak ah chun Aron a thi ta’n, a vui tau ah; a chapa Eleazar in a pa thiampu nasepna a lua tai.

⁷Zia tak ah kipat chun Gudgodah a zuan un, Gudgodah ah kipat in luicha tui luanna gam Jotbathah a zuan tau a.

⁸Zia hun lai ah kipat tuchan in, LALPA thuthung thingkuang jawn ah, LALPA ma-âng ah ding ah, a nasêm ding leh a min ah maljawlna gen dingin Levi phungte chu a guat chuam tai.

⁹Ziaziakchun, Levi phungte chun a chanaute lak ah chun gam bîk leh gochan bangma a nei puau ah, LALPA la Pathian un a la tiamsa gual in LALPA chu a gochan uh ahi tai.)

¹⁰A masa ka bawl gual khan, tâng ah chun ni sawmli leh jan sawmli ka vachâm ah; LALPA‘n ka thu ei ngaithâk piak nalai ah, LALPA‘n nanghaw chu a hun hi’mangthai nuam pua’n.

¹¹LALPA‘n ka kiang in, “Kipan inla, mipite chun a pu leh pateu kiang ah ka la tiamna gam a lut ua, a lua den theina ding un amau pui in,” ei tia.

¹²Aw Israel, tu’hin LALPA la Pathian un a hun phût chu bang ahi tam? Ama LALPA la Pathian uh la lau ua, a lampi zosia la zui ua, la hepiu ah, LALPA la Pathian uh chu la lungthim zosia leh la ngaituanau zosia ah ama na bep la sep ding uh,

¹³la phatna ding ua, LALPA thupiakte leh a dante la zop ua leh, tu’ni ka hun thu piakte pom ding hi zaw lo a hem?

¹⁴Vânte leh vân sâng pen tiang leh, leilung leh a sung ah um zosia hi LALPA la Pathian uh â hi sik sek maleh,

¹⁵la pu leh pateu bep hepi ah, tu’ni ah nanghaw amau suan leh pâkte hi ama â ding liau liau ah, khawvel ah nam zosia lak ah kipat hun têlchuam chu LALPA lung lam ahi bep hi.

¹⁶Ziaziakchun, la lungthim uh siam thak in, lu’lul tak in um ta kiu in.

¹⁷LALPA la Pathian uh hi pathiante zosia chung ah Pathian, lalte zosia chung ah Lal, Pathian Chungnung pen, hat leh lau um tak, kuama doichuam diak nei lo leh golgûkna la ngai lo leh,

¹⁸nauchaga leh meithâite dik tak ah vaihawm piak ah, gam chuam mite a khawtuana tâklang zing ah, a nêk ding, sil leh chên khomtua zing ahi ngâl a.

¹⁹Nang uh le Aigupta gam ah malzin ah la um tâk ziak un, la lak ua malzinte chu khawtua tau in.

²⁰LALPA la Pathian uh la lau ding uh ahi’n; ama bep chu la biak ding uh, ama min bep la vop det ua, ama min bep in la kihaksial sek ding uh ahi.

²¹Ama chu pakchau in; la mit muu ah thil kidang leh tizat um tak tak te a la bawlpa, la Pathian uh ahi ngâl a.

²²La pu leh pateu mi sawmsagi chu Aigupta gam in a la kipêm suk un; tu’hin vang LALPA la Pathian un van ah aksite jat ah tam in a hun sukpun la hitau hi.