Read Vaiphei DAN LEKHABU 11 Bible Online

DAN LEKHABU 11 - Vaiphei bible

DAN LEKHABU 11

¹Ziaziakchun, LALPA la Pathian uh chu hepi in, a thu hilte, a dante, a vaihawmna thute leh a thupiakte la zop zing ding uh ahi.

²(LALPA la Pathian uh thununna thu a la henai lo leh a la mu nai lo la chateu hilo in,) nanghaw a lopi dan, a bân tha hât dan leh a bânjak ah a thil bawlthei dan muchiante hin, tu’ni ma ma hin he tau in;

³Aigupta gam ah mite leh Aigupta gam ah lengpa Pharaoh chung ah tepte’na leh a thil bawlte zosia,

⁴Aigupta sepaite leh a sakolte leh a kângtalai chung chuangte’n a del zui lai ua, Tuipi San in a chupmang ah, tuilian ah LALPA‘n a hi’mangthai dante leh;

⁵zia tak mun la hung tun tiang ua, gamthip ah la chung ua a thilbawl zosiate leh,

⁶Reuben chapa Eliab chapa Dathan leh Abiram te chung ah a hi’dante kha; lei khikêk in a kam a kân, Israelte zosia lak ah kipat in amau Inkuan leh a puanbûkteu leh a gancha nei zosiau puidok ah a valzaw dante;

⁷la mit ngei un LALPA thilbawl lopi takte la mu ta’ngâl un.

⁸La gâl kâi nung ua, la luana ding uh gam chu la lût ua, la lua theina ding ua hâtna la neitheina ding un, tu’ni la kiang ua ka thupiak zosia hi zawm dingin thu ka hun pia la hiu;

⁹la chutiuchun, gampha, bawngnawi leh khuaizu luanna gam, la pu leh pateu leh a suanteu kiang ah piak ding ah LALPA‘n a la kipautiamna gam ah chun, sawt tak la chêntheina ding un.

¹⁰La hun luana ding uh gam chu, la hung pawtdawnau Aigupta gam, thâi la chîn ua, huan ah thâichi gual ah gim tak ah tui la piaknau gam tawhbang chu ahi puai.

¹¹La gâlkâi ua la gam luana ding uh gam, tâng leh phâicham, van gawtui in a chapno na mun;

¹²LALPA la Pathian un a ngaisakna gam ahi. LALPA la Pathian un kum bul ah kipat kum tawp tiang in, a mit ah a etthâk zingna gam chu ahi.

¹³Tu’ni ka thu hun piakte zosia la zop ua, LALPA la Pathian la hepiu ah, la lungthim leh ngaituanau zosia ah ama na bep la sep uh chun:

¹⁴La buteu, la uainteu leh la Oliv thauteu chu pha tak ah la lak khawm theina ding un, la gam un a hun takin gawtui masa leh a nunung chu hun pia ding ahi;

¹⁵chuleh, la gam un la ganchateu â dingin hampa hipung in tin, nanghaw’n le vâ tak in nethei ta’n lau.

¹⁶Chingthei tau in; achutiloleh, pathian dangte ho ah, a nau sêm dingin thep pûk in um kha’n lau;

¹⁷zia phat chuleh, LALPA la chung un lungna’n tin, vante kikhâk in, gua zu talo in, lei inle ga sua talo in, LALPA‘n gam pha tak a hun piakna mun ah kipat hin mangthai pai ziang kha’n lau.

¹⁸Zia ka thugente hi la lungthim leh la ngaituanau zosia in khum unla; la khut ua tepte’na gual ah but in, la chalpâng un kop zing tau in.

¹⁹La chateu kiang inle hil unla, In ah la um lai leh gâl kâng ah la um lai unle; la lup leh la thaw daw lai unle hil zing un.

²⁰La In kotbiang leh la kêlkot unle zik un.

²¹Tichun, la pu leh pateu kiang ah piak ding ah LALPA‘n a la kipau tiamna gam ah chun, la dam sung zosiau leh la chateu dam sung chu, leipêk chung ah van a um laisia hisau ah a umtheina ding in.

²²LALPA la Pathian uh la hepiu ah, a lampi zosia la hawu ah, ama la tukdet zing ua, gunchu tak ah zia ka thupiak zosia hi la zop phot uh chun,

²³LALPA‘n la masang ua um nam dang zosia hi hun del daw piak intin, nanghaw sâng ah tam zaw leh hat zaw namte chu suandok ding a hiu.

²⁴La keng ua la chotnau gam tapo chu nang uh â hita’n ah; la gam uh chu gamthip ah kipat Lebanon tâng tiang leh Euphrates luipi ah kipat tumlam Tuisuagiat chan hita’n a.

²⁵Nang uh dâl thei ding kuama um pua’n tin; LALPA la Pathian un a tiamsa gual ah khan, la chotnau gam tapo ah chun nangmau launa leh kichâkna koi in a.

²⁶En un, tu’ni hin la mau ah maljawlna leh hânsia lawna ka koi hi:

²⁷Tu’ni ka gen gual ah, LALPA la Pathian uh thu la zop uh chun maljawlna hi’ntin;

²⁸LALPA la Pathian uh thupiakte zui lo ah la kiheisan ua, la het ngai lo uh pathian dangte la ho ua leh chu hânsia lawna mu’n lau.

²⁹La luana ding uh gam ah LALPA la Pathian un a hun pui lût phat leh, Gerizim tâng ah chun maljawlna koi unla, Ebal tâng ah chun hânsia lawna koi un.

³⁰Ziate hi Jordan gâl, tumlam kâi ah, Kanaante gam ah Moreh pang ah gangpi thing kiang ah um a hiu ti la henai.

³¹LALPA la Pathian un a hun piakna gam lua ding ah Jordan lui gâl kâi ah, la va luau ah, la chênden phat ua leh,

³²tu’ni la mau ah ka koi dante leh vaihawmna thu zosia hi gunchu tak in zui tau in.