Read Vaiphei DAN LEKHABU 12 Bible Online

DAN LEKHABU 12 - Vaiphei bible

DAN LEKHABU 12

¹La pu leh pateu kiang ah: LALPA la Pathian un piak ding ah a la tiamna gam chu la hung tun phat ua leh, lei chung ah hin sawt tak hing leh dam ah la umtheina ding ua, gunchu tak ah la zui ding uh dan leh vaihawmna thute chu ziate hi ahi.

²La suan daw ding uh namte’n a pathian uh a ho’nau mun zosia, tângsâng ah te, mual chung ah te leh thing bawk lîm nuai zosia le la hisiat dim dem ding uh ahi.

³A mâichâmteu khênchim unla, a dawikhuamteu le khen bong unla, Asherim lim ah a bawlteu chule hâltum unla, a pathian lim zosiau chawm nâm suak un; tichun, a min natiang uh a umnau taphot ah kipat in thaimang suak tau in.

⁴Zia mite pathian ho dan gual ah chun LALPA la Pathian uh ho kiu in.

⁵LALPA la Pathian un la nam pumpiu lak ah kipat a chênna ding leh, a umna ding ah a têldawna pen mun chu hawldok un. Zia tak mun bep ah chun chia sek unla;

⁶la hâlmang thillatteu, la kithoinateu, la sawm ah khat leh la thawlawm thil piakteu, la kitiamna thilpiak leh la ngamtawk thilpiakteu, la gan-gual leh la belam hon lak ah piang masa pen chiat chu zia mun ah chun la hun choi sek ding uh ahi.

⁷Chuleh, LALPA la Pathian un la khut nasep gimnau zosia a hun maljawlna ziak ah lim leh kipak tak in, nang leh la Inkuan un LALPA la Pathian uh ma-âng ah, zia tak mun ngei ah chun la nêk sek ding uh ahi.

⁸Tu’ni mi tin in nop dan dan ah I bawl gual un kuama’n bawl ta kiu in;

⁹LALPA la Pathian un chawldam tak ah a hun luasakna ding gam chu, la hung tung nai paw’ngâl un.

¹⁰Jordan lui gâl kâi ah, LALPA la Pathian un la luana ding ua gam a hun piakna la hun lua phat ua leh, la kîmvêl ua la mêlmateu ah kipat thamuang tak ah um thei ding ah humbit la hi’phat ua leh,

¹¹LALPA la Pathian un, a min chênna ding ah a têlna mun ah chun, la kiang ua ka gen zosia: La hâlmang thillat kithoinateu, sawm ah khatte, la ngamtawk thilpiakteu leh la kitiamnau thil piakteu chule la hun choi ding uh ahi.

¹²Chun, LALPA la Pathian uh ma âng ah chun, nang uh tawh, la chapa leh chanuteu, la suakpa leh suaknuteu tawh, la In huang sung ua Levite tawh (amau chun nang uh lak ah chanvo chuam a nei paw’ngâl un) lim tak in la chêng khawm ding uh ahi.

¹³La umnau taphot un la hâlmang thillatteu lân mai mai ziang lo ding in chingthei un.

¹⁴La lak ua LALPA‘n a têldaw bîk phungte luana gam bep ah chun, la hâlmang thillatteu la lat ua, la bawl ding ua ka thupiak zosia chule, zia tak mun bep ah chun la bawl ding uh ahi.

¹⁵Ahi’nla, LALPA la Pathian un a hun maljawl dungzui in, la chênnau khua sung chiat un sa that in, nethei in lau; sa-ngâi hileh, sakhi hileh la tha taphot uh chu, mi thiang hileh, thianglo inle nethei gêl in lau.

¹⁶A thisan vang la nêk him him lo ding uh ahi; tui gual mai in lei tual ah la butthâk ziang diu ahi.

¹⁷La khua sung un la sawm ah khat uh: bu, uain, sathau, gan hon leh belam hon lak ah kipat piang masa taphot leh, la kitiamnau dungzui ah la thawlawm him him uh, la ngamtawk thilpiak leh la thawlawm thilpiak taphot uh chu la nêk lo ding uh ahi.

¹⁸Zia thilte hi LALPA la Pathian un a guatna mun ah chun, nang tawh, la chapa leh chanuteu, la suakpa leh suaknuteu tawh, la khua sung ua um Levite Inkuan zosia tawh, LALPA la Pathian un, la khut nasepnau zosia a hun maljawlna ziakin, lim leh kipak in la nêk khawm diu ahi.

¹⁹Lei ah la um sungsiau ah Levite chu khawtua lo ah la um lona ding un chingthei un.

²⁰LALPA la Pathian un a tiamsa dungzui ah, la gamgiu kêklet ah a um phat leh, “Sa ka ducha na e!” la ti phat uh leh la duchâk pen pen chu, la duchâk hun si’n un nethei in lau.

²¹LALPA la Pathian un a min koina ding ah a têlna mun chu a gamlat chun, LALPA maljawlna gan hon leh belam honte lak ah la duchâk pen pen uh chu, la duchâk hun si’n ua leh la khua sung chiat ua that a, nethei ngâl dingin thu ka hun pia la hiu.

²²Sa-ngai hileh, sakhi hileh la nêk gual tho un ne’n la tiu in; mi thiang leh thianglo inle nethei gêl in lau.

²³A thisan vang nelo ham ham dingin chingthei un; a thisan chu hinna ahi ziakin, thisan tawh a sa la nêk khawm lo ding uh ahi.

²⁴Thisan chu la nêk him him lo ding uh; tui gual mai in leitual ah la butthâk mai ding uh ahi.

²⁵LALPA mit mu ah thil dik bawl la hiu ah, nanghaw leh la nung ua la chateu â ding tiang ah thilpha a hi’theina dingin, thisan chu la nêk him him lo ding uh ahi.

²⁶Ahi’n, la thawlawm thilpiak thiangthoteu leh, la kitiamnau dungzui ah la thil piakteu chu, LALPA‘n a têlna mun lam ah chun hun keng tau in.

²⁷La hâlmang thillatteu chu a sa hileh, a thisan hileh LALPA la Pathian mâichâm in piau inla; kithoina dang â dingin gan thisan chu, LALPA la Pathian mâichâm bul un bunthau in, a sa chule nethei in lau.

²⁸LALPA la Pathian uh mit mu ah thilpha leh dik la hun bawl ding ziak un, nang leh la nung ua la chateu â ding ah kumkhua thilpha a hitheina dingin, tu’ni ka thu hun piak zosia hi zawm dingin chingthei tau in.

²⁹LALPA la Pathian un’la suandaw ding ua a hun piak namte la mau ah a zaw piak phat ah, a gam ua lût ah a chêngte suandok ah la chên phat ua leh;

³⁰la ma âng ua hi’mangthai ah a um gual ua, sukmangthaina thâng ah la awk lona ding un chingthei tau in: “Zia mite hin a pathian uh bangti ho sek a hiu em? Amau bawldan ka zui nuam ui,” ti’n kansui kiu in.

³¹Amau ho gual in LALPA la Pathian uh ho kiu in, a pathian honau ah chun, LALPA kidak zosia leh a huat ma mate chu a bawl sek ngâl un. A chapa leh chanuteu nasan a pathian uh ho na’n mei in a hâl sek ui.

³²Ka thupiak zosia, a kip a kawi ah zui dingin chingthei un; bangma belap kiu inla, lâk khen le nei kiu in.