Read Vaiphei DAN LEKHABU 13 Bible Online

DAN LEKHABU 13 - Vaiphei bible

DAN LEKHABU 13

¹La lak ua jawlnei a hem, mang nei mi a hem a um ah, thil kidang leh tepte’na a hem hun mu sak ding a tiam chun,

²zia a thil kidang leh tepte’na mu sak ding a guat chu a hung guitun tak tak ah, la kiang ah: “Pathian dang khat (la het ngailo uh chu) zui hitiu in, ama na chu sêm hitiu,” a hun ti phat ua leh;

³zia gual jawlnei a hem leh mangneitu a hem thugente chu la zui lo ding uh ahi; LALPA la Pathian uh chun la lungthim zosiau leh la ngaituanau zosia ah LALPA la Pathian uh hepi tak tak la hiu em ti, a hun patepna ahi ngâl a.

⁴LALPA la Pathian bep uh la zui ua, ama bep la lau ua, a thupiakte bep la zui ua, a aw bep la ngai ua, ama na bep la sep ua, ama bep la tûkchak ding uh ahi.

⁵Zia gual ah jawlnei leh mang nei taphot chu, Aigupta gam ah la suak channau In ah kipat hun puidokpa, LALPA la Pathian uh thupiakte la pêtsan theina ding ua hun pui mang gua a hiziak un, la thagam ding uh ahi. Zia gual ah chun la lak ua kipat thil phalo chu la sukthian zel ding uh ahi ngâl a.

⁶Kua a hem khat, la suapipa ma ma, la pa chapa a hem, la nu chapa a hem khat leh, la chapa a hem, la chanu a hem leh la ângkawi lai la ji hihen la, la gual ngai pen hiziang leh le, nang la hem, la pu la pate het ngai lo pathian dang ho dingin gûkthim ah hun jawl a um chun,

⁷la kîmvêl ua umte lak ah la kinaipi hitaleh, la kigamlatpi a hem, gamla tak ah kawlkil le’lam tiang ah um mite pathiante lak ah a khoipen chu hiziang leh le;

⁸zia gual mite thu chu nung lo in, a thugen uh le la ngaisak him him lo ding uh ahi. Zia gual mite chu hepi leh lainat lo ding, chuleh la melkhu lo ding uh ahi’n,

⁹la thalup têi ding uh ahi. Zia gual mite tha’na ding ah chun a khut tha masa pen in pang inla, midang in la nung leh a khut uh hun tha bep uh hen.

¹⁰Aigupta gam ah suak hi’na In ah kipat hun puidokpa, LALPA la Pathian ua kipat nanghaw hun pui mang gua taphot chu suang in seplum ziang un.

¹¹Ziaphat chuleh, Israelte zosia’n hun he’n tin uh, lau ta’n au; tichun, zia gual thil phalo chu kuama’n bawl kit ta pua’n au.

¹²LALPA la Pathian un la chênna ding ua a hun piakna ding, khua khat ah kipat thuthang phalo khat,

¹³khua sung ah mite pui mang gua, la het ngailo pathian ho ding ah mi jawl ah: “Hung tiam un, pathian dangte ho dingin chia hi tiu,” ti aw git la het phat ua leh,

¹⁴zia thu chu gunchu tak in kan chian unla, hawldok tei tei guau in. Zia gual ah thil kidak um tak chu la lak ua um tak tak ahi ti la hetchian phat ua leh,

¹⁵zia khua umte chu chemjam in that unla, khua sung ah um zosia mihing hileh, gancha hileh, a nei a lam zosiau pum in la tha chimit ding uh ahi.

¹⁶Gâllâk thil zosia chu khawlai ah siakhawm unla, khawpi chu a sung ah gâllâk kisia khawm zosia chu tawh, LALPA la Pathian kiang un hâlmang thillat gual in hâl tum mai un. Tundin kit tâk lo ding ah kumkhua’n hisiat in um ta’n a.

¹⁷Tu’ni ka thupiak dungzui ah, LALPA la Pathian mit muu ah thil dik la hiu ah, LALPA la Pathian thugen zosia la zui phot uh chun,

¹⁸la pu leh pateu kiang ah a la kitiam dungzui in, LALPA‘n a lungnatna kiheisan in, hun lainat ta’n tin; a hun lainat ziak ah a hun hi’pun theina dingin, hânsia lawsa thil kila khawmte chu la khut unle khoikha kiu in.