Read Vaiphei DAN LEKHABU 14 Bible Online

DAN LEKHABU 14 - Vaiphei bible

DAN LEKHABU 14

¹Nanghaw hi LALPA la Pathian uh chate la hitau ah. Mithi sûn ziak in la kihiliam ding uh ahi pua’n, la chalsam uh le la met lo ding uh ahi.

²LALPA la Pathian â dingin mithiangtho la hi’ngâl ua; khawvel ah nam zosia lak ah kipat LALPA‘n a gochan leh ama â ding bîk ah a hun têlchuam la hiu.

³Thil ki’dak um him him ne kiu in.

⁴Zia sate hi nethei in lau: bawngchal, belam, kêlcha,

⁵sakhi, sa-ngâi, sapeng, sakêl, sazuk, jangsial, gam belamte haw hi.

⁶Bang sa hilehle a tin kikâ, annêlthâi taphot chu nethei in lau.

⁷Ahi’n la, a tin kikâ, annêl thâi maleh, bilpi, kawlsazute leh Sangawngsaute hin a khau thâi maleu, a tin uh a kikât lo ziakin, la nêk uh a thiang puai.

⁸Chun, vokcha hi a tin kikâk ma leh, a kha thâi lo ahi ziakin, nang uh â ding ah thianglo ahi. A sa la nêk lo ding uh, a luang le la sukkhak lo ding uh ahi.

⁹Tui lak ah chêng zosia lak ah ziate hi la nêkthei dingteu chu ahi: thâ leh phulip nei taphot nethei in lau.

¹⁰Thâ leh phulip neilo taphot chu ne kiu in; ziate chu nang uh a ding ah thianglo a hiu.

¹¹Vacha thiangtho zosia nethei in lau.

¹²Ziate hivang la nêk lo ding uh ahi: mupi, mulukol, musane;

¹³vaphual, muvânlâi leh amau chi zosia;

¹⁴va-ak chi zosia tawh;

¹⁵vasakol, vabak, tuivakang, mu chi him him;

¹⁶simbuchânglit, simbupi, tuiva,

¹⁷tuivatawt, mulukol leh tui mupi,

¹⁸tui vakengsâng, tui lak ah vacha him him leh vatuhai leh bâkte hi a hiu.

¹⁹Chuleh, ganhing tha nei zosia chu nang uh â ding ah thianglo a hiu; ziate chu la nêk lo ding uh ahi.

²⁰Chung ah leng vacha, a thiangtho taphot chu nethei in lau.

²¹Bang sa le a pûlthi taphot chu la nêk lo ding uh ahi; ziate chu la lak ua gam dang mite nêk dingin pia thei in la tiu in; ahiloleh, gam dang mite kiang ah zuak thei in lau. Nanghaw vang LALPA la Pathian uh â dingin mithiangtho la hi’ngâl un. Kêlno chu a pi nawitui in huan kiu in.

²²Kumsin in la loumau ah piang taphot chu dik tak in sawm ah khat la koichuam ding uh ahi.

²³LALPA la Pathian uh launa châng la hetzing theina ding un, sawm ah khat bu, uain, sathau, gan hon leh belam hon lak ah a piang masa pente chu, LALPA la Pathian un, a min tâklatna ding ah a guatna mun ah chun la ne ding uh ahi.

²⁴Ahi’n la, LALPA la Pathian un a hun maljawl hun ah, a min tâklatna ding ah a têlna mun chu a gamlat ziak ah LALPA la Pathian mai ah puak tung ding a haksat tâkluat ahi chun,

²⁵zia chu a sum ah sua thei in lau. A sum chu bit tak ah chawi in, LALPA la Pathian un a mun guatna chun la hun choi ding uh ahi.

²⁶Zia mun chun la duthusam pen pen: bawngchal hileh, belam hileh, uain leh dawn thei chi dang chawkna’n mang in. LALPA la Pathian kiang un ne leh dawn in, nang leh la Insung mite chu lim leh kipak tak in la um ding uh ahi.

²⁷La lak ua Levite chu limsak lo in koi kiu in; amau in la lak un nei leh lam bangma chantum a nei paw’ngâl un.

²⁸Kum thum a tin si’n leh la lou ua piang zosia sawm ah khat chu kim tak ah lakhawm in, la khawpiteu ah koikhawm unla;

²⁹LALPA la Pathian un la khut nasep zosiau ah a hun maljawl theina dingin, la lak ua chantum nei lo Levite leh la lak ua gam dang mi chêngdente, nauchagate leh meithâite chun a vâ chiat un a hung ne ding uh ahi.