Read Vaiphei DAN LEKHABU 15 Bible Online

DAN LEKHABU 15 - Vaiphei bible

DAN LEKHABU 15

¹Kum sagi a tin si’n leh leiba ngaidamna la bawl sek ding uh ahi.

²Kingaidam ding dan chu zia gual hin hi hen: kua’nle a Invêngte kiang ah bat ding ah a piak taphot chu, a Invêngte chu ama chipite ahi vang leh, LALPA‘n leibat zosia ngaidamna a puanlat tâk ziakin, la thil bateu zosia chu la ngaidam ngâl ding uh ahi.

³Gam dang mite leibat vang, ahi dungzui ma in la kit in la tiu in, la chipite’n la chung ah bang hilehle bat a nei zosiau chu la ngaidam ding uh ahi.

⁴LALPA la Pathian un thu a hun piak zosia, gunchu tak ah la zui ua, tu’ni ka thu hun piakte hi pha tak ah la zui nâk phot ua leh,

⁵LALPA la Pathian un a hun piakna ding gam ah chun, LALPA‘n nasa tak ah hun maljawl ding ahiziak in, kuama a tasam um lo ding la hiu.

⁶LALPA la Pathian a la kitiamna dungzui ah a hun maljawl phat leh, nam tamtakte lak ah bat hawm ta’n la tiu in, nang un vang kuama thil bapua’n lau; nang uh nam tamtakte chung ah vaihawm in pang in la tiu in, nanghaw chung ah vang kuama’n thu nei pua’n a.

⁷LALPA la Pathian un a hun piakna ding gam chu la hung tun phat ua leh, la chênnau khuate ah chun la suapiu kua a hem khat tasam a um chun, zia gual ah tasamte chung ah chun la lungthim uh hi’khau kiu inla, la khutpêk uh le hi’neu diak kiu in.

⁸Amau â dingin la khut uh huangphal tak in jak unla, a tâksapnau leh mamawnau ah somdawl thei ding khop in batsak mai un.

⁹“Kum sagi’na, kingaidamna kum a nai ta hen,” ti ziak ah la Invêng tasam kiang ah bangma penuam lo leh mudana lungthim sia leh diklo la nei lona ding un chingthei tau in; achutiloleh, LALPA kiang ah kiko intiu in, nang in a mawpaw khan lau.

¹⁰Huangphal tak leh mitthipna pang lo in pesek in; la chuti bawl leh LALPA la Pathian in la sep la bawlnau zosia ah hun maljawl ding ahi ngâl a.

¹¹Zia gam ah chun tasam um ta lo ding ahiziak in, “La gam sung ua genthei leh tasamte panpi’na dingin la ban uh jak un,” ti’n thu ka hun pia la hiu.

¹²Nanghaw lak ah kua’nle la chipiteu Hebrai pawsal a hem, Hebrai numei a hem khat la kiang ua a hun zawk uh a um ah, kum guk sung la nau a sep zaw phat ua leh, a kum sagi’na chun zia mihing chu la pawt dawsak ding uh ahi.

¹³Chuleh, la suak pawsal chu la pawt dawsak phat leh, khutngawn in la chiasak lo ding ahi.

¹⁴La belam hon lak ah te, la buphual ah kipatte, la uain hêkna khûk ah kipatte huangphal tak in LALPA la Pathian un a hun mawljawl dungzui in la pia ding uh ahi.

¹⁵Nang hawle Aigupta gam ah suak leh sal tânna kipat, LALPA la Pathian un a hun tatdaw la hiu ti kha kihe zing tau in;

¹⁶ahi’n la, ama la bawl phat ziak ua ama’nle nang leh la chanaute a ngainat den tâk ziakin, “Nangma ah kipat in pawtdok pua’ng ka,” a ti chun,

¹⁷kotkhak bul ah a bilhual muithal in vihawm piak inla, tichun, ama chu la suak in um den ta’n a. Zia gual ma chun la suak numeiteule la bawl ding uh ahi.

¹⁸Nangmau ah kipat pawt daw sak ding chu haksa sa kiu in; la kiang ua kum guk sung la nau a sep piak uh hi sum thalaw ah sêmte sep sâng ah tam zaw hun sepdaw piak ta ahi ngâl un; chuleh, LALPA la Pathian un la sep leh bawl tapo uh hun maljawl ding ahi ngâl a.

¹⁹La gan hon leh belam hon lak ua a chal piang masa pen chiat chu LALPA la Pathian uh â ding ah la lat thiantho ding uh ahi; la bawng hon lak ah a chal piang masa pen chule na la sepsak lo ding, belamchal piang masa pen chule a mul la met lo ding uh ahi.

²⁰LALPA‘n a têlna ding mun ah chun kum sîn in, LALPA ma âng ah, la Inkuan un an la nêk khawm sek ding uh ahi.

²¹Demna um, kengbai leh mitthum taphot chu LALPA la Pathian kiang un kithoina dingin mang kiu in;

²²sathiang leh thianglo, sa-ngâi hi’n sakhi hileh, la chênnau khua sung chiat un nethei in lau.

²³A thisan vang la nêk him him lo ding uh ahi; tui gual mai in lei tual ah la sungtha ding uh ahi.