Read Vaiphei DAN LEKHABU 16 Bible Online

DAN LEKHABU 16 - Vaiphei bible

DAN LEKHABU 16

¹LALPA la Pathian un Aigupta gam ah kipat in, Abib tha ah jan ah a hun puidok uh la hiziak un, Abib tha sung ah hin LALPA la Pathian uh â dingin chiakân kût mang sek un.

²LALPA‘n a min chênna ding ah a têlna mun ngei ah chun, la gan hon leh bawng hon lak ua kipat in LALPA la Pathian uh kiang ah chiakân kût kithoina ding gancha la lân sek ding uh ahi.

³Zia sa chu thawi tawh la nêk khawm lo ding uh ahi. Aigupta gam ah kipat kin tak ah la pawt daw niu chu la dam sungsiau ah la het zing theina ding un, thawipanglo, kihigimna an chu ni sagi sung la nêk ding uh ahi.

⁴La chênnau gam sung pumpi’ ni sagi sung, thawi him him a um lo ding ahi; chuleh, ni masa pen nitâk ah la kithoinau sa chu, a jingkal kit tiang ah a themcha le la umsak lo ding uh ahi.

⁵LALPA la Pathian un a hun piakna gam sung ah la chênnau khua him him ah chiakân kût kithoina la bawl lo ding uh ahi.

⁶LALPA la Pathian un a min chênna ding ah a guatna mun bep ah chun, la chiakân kût kithoinau gancha chu, Aigupta gam ah kipat la hung pawtdawnau, ni masa pen nitâk, nitum jul ah la hung pawt daw hun chet uh khan la that ding uh ahi.

⁷Huan unla, LALPA la Pathian un a guatna mun ah chun la nêk ding uh ahi; a jing phat leh la puanbûk lam chiat un la kile’kit ding uh ahi.

⁸Ni guk sung thawipanglo anneu inla, a ni sagi ni’ chun LALPA la Pathian uh â ding ah khawmpi thiangtho bawl unla, zia ni hin la nasep vantang uh bangma la bawl lo ding uh ahi.

⁹Bu ât ding ah kawite la mat pat niu ah kipat in hapta sagi sim to unla.

¹⁰LALPA la Pathian un a hun maljawlna dungzui in, la sepnau ga ah kipat la kiphalnau dungzui in, LALPA la Pathian uh â dingin Hapta Kût la bawl sek ding uh ahi.

¹¹LALPA la Pathian un a min umna ding ah a guatna mun ah chun, nang tawh la chapate, la chanute, la suakpa leh la suaknute, la lak ua um Levite, gam dang mite, nauchagate leh meithâite chu tawh la leng un, LALPA la Pathian uh ma-âng ah lim tak in la ûm khawm ding uh ahi.

¹²Aigupta gam ah suak ah la um danteu kha hezing unla, zia dan thuguatte hi gunchu tak in la zui ding uh ahi.

¹³La buphual leh la uain sûknau khûk ah kipat la lâk khawm zaw phat ua leh, ni sagi sung Bawkcha Kût la mat sek ding uh ahi.

¹⁴Zia kût ah chun, nangmau leh la chapateu, la chanuteu, la suakteu pawsal leh numeite, la khaw sung ua chêng Levite leh gam dang mite, nauchagate leh meithâite tawh lim tak in la chêng khawm ding uh ahi.

¹⁵LALPA‘n a guatna ding mun ah chun, LALPA la Pathian uh â dingin ni sagi sung zia kût hi la mat ding uh ahi; LALPA la Pathian un la thil bawlnau zosia leh la sepgimnau zosia ah hun maljawl ding ahi ziakin, zia chu la lop ding uh ahi.

¹⁶LALPA‘n a guatna ding mun ah chun, pawsal zosia kum si’n ah thumvei a vakilâk sek ding uh ahi; thawipanglo kût bawl hun tawh, Hapta Kût bawl hun tawh Bawkcha Kût bawl hun ah te hin. LALPA ma âng ah khutngawn in a vakilak lo ding uh ahi;

¹⁷LALPA la Pathian un a hun maljawl dungzui in, mi tin in a thei dan chiat un piau hen.

¹⁸LALPA la Pathian un a hun piak ding khawpi tin ah vaihawm ding leh, hotu hidingin la phung tin ua kipat mi la têldaw chiat ding uh ahi; amau chun mipite chung ah dik tak in vai a hawm ding uh ahi.

¹⁹Dikna chu manlo sua kiu inla, doichuam bîk la nei lo ding ahi; gawlgûkna le la kiu in; gawlgûkna chun mipilte mit a hi’thûm ah, a dikna thugen uh a changma sek hi.

²⁰LALPA la Pathian un a hun piakna ding gam chu lua ah la dam theina ding un, thudik bep la zui ding uh ahi.

²¹LALPA la Pathian â ding ah mâichâm la siamnau kiang nai ah chun, dawikhuam ding ah thing Asher la phû lo ding uh ahi;

²²chuleh, LALPA la Pathian un a huat ma ma dawi suangle la phû him him lo ding uh ahi.