Read Vaiphei DAN LEKHABU 17 Bible Online

DAN LEKHABU 17 - Vaiphei bible

DAN LEKHABU 17

¹Bawngchal a hem, belam a hem demkâi leh melhêmna nei him him chu, LALPA la Pathian kiang un la lat lo ding uh ahi; zia chu LALPA la Pathian uh â dingin ki’dak um tak ahi ngâl a.

²LALPA la Pathian un a hun piakna khua taphot ah, pawsal hileh, numei hileh, LALPA la Pathian uh mit mu ah thil phalo bawl la mu phot ua leh,

³pathian dangte nasep piak ding leh ho ding ah chia a hem, nisa, thapi leh van lam ah thil umte ho leh biak ding ka khapsa a ho uh a hem;

⁴min a genna la het a hem, nangma ngei in la hetchian ahi ah, Israelte lak ah zia gual ah thil ki’dak um tak chu bawl ahi ti la mu chian phat leh,

⁵zia gual ah thil ki’dak um bawlpa a hem, bawlnu a hem chu la khawpiu kêlkot paw lam ah kaidok in, ziapa a hem, zia nu a hem chu suang in la se’lup ding uh ahi.

⁶Hiatpitu pani a hem, pathum a hem kamsuak ah kipat in thitâk ah umte chu tha sek ding a hiu; mi pakhat mai hiatpitu kamsuak ziak in kuama that kiu in.

⁷Hiatpite chun a khut uh tha masa pen uh hen la, ziazaw chun mipite chun a khut uh tha bep uh hen. Tichun, la lak ua mi phalo chu zia gual chun la zen thiang sek ding uh ahi.

⁸Thisan sua’na a hem, kigamngâkna ding a hem leh kinakna thubuai khawk tak a hem leh, zia gual ah thu khawk chu la khua sung ua a um ah, nang uh ngaitua ding ah haksa talua ahi chun, LALPA la Pathian un a têlna mun ah chun kin tak in chia unla;

⁹zia hun lai tak ah Levi dan ah thiampu a hem leh, vaihawm ding ah um pen pen kiang ah chun chia unla, thu vadong leu chin, amau chun a thutanna ding hun hil ziang thei in au.

¹⁰LALPA‘n a guatna mun ah kipat thutanna a siam uh a hun hil dungzui ua chun gunchu tak in bawl tau in.

¹¹Thupiak a hilsawn dungzui leh vaihawmna dan a hun hil dungzui un la um tei tei ding uh ahi; a thupukna hun kawk muu chu changlam a hem, veilam a hem in la pêtsan lo ding uh ahi.

¹²Chuleh, LALPA la Pathian un nasem ding ah a guat chuam thiampu leh vaihawmte thu mang nuam lo taphot chu, la tha ngei ngei ding uh ahi. Israelte lak ah kipat thil phalo chu zia gual chun la zen thiang sek ding uh ahi.

¹³Chutileh, mi tin in zia chu hia’n, lau intiu in, zia gual chun kuama’n bawl ngam talo ding a hiu.

¹⁴LALPA la Pathian un a hun piakna ding gam chu la tun ua, la luau ah, la chên phat ua leh, “I kiangvel ua nam dangte zosia gual ah hin lal nei hitiu,” la ti phat ua leh,

¹⁵LALPA la Pathian un a têlpiak bep chu lal ah la nei ding uh ahi. La mipiteu lak ah khat pen pen chu lal in koithei in la tiu in, la mipiteu lak ah pang hilo, gam dang mite vang guat him him kiu in.

¹⁶Ahi’n la, lal chun sakol tampi a neilo ding ahi; chuleh, sakol a hau theina ding ah a mite chu Aigupta gam ah a sawl kit dingle ahi puai; LALPA‘n ka kiang un, “Zia lam ah chun la chia kit tâk lo ding uh ahi,” a ti ta’ngâl a.

¹⁷Chun, a lungthim ah lampet lona dingin ji le tampi a nei lo ding ahi’n, dangka leh sana le a hau lo ding ahi.

¹⁸Chuleh, a lenggam lalchutpha ah a chut phat leh, zia dan lekhabu hi pakhat a kinei zing dingin, levi dan ah thiampute a teidawsak ding ahi.

¹⁹LALPA a Pathian a lau ah, a dan thu leh a vaihawmna dante a zui theina dingin, a dam sungsia zia dan lekhabu chu a sim zing ding ah a koltup ding ahi;

²⁰Israelte lenggam chung ah ama leh a suante’n kum sawt tak vai a hawm theina ding un, mipi chung ah a kiletsak lo ding uh ahi’n, thupiakte le changlam a hem, veilam a hem ah a pêtsan lo ding uh ahi.