Read Vaiphei DAN LEKHABU 18 Bible Online

DAN LEKHABU 18 - Vaiphei bible

DAN LEKHABU 18

¹Levite phung ah kipat Levi dan ah thiampu nasêm zosia chun, Israelte lak ah chun chanvo leh golua ding a neilo ding uh ahi. LALPA chanvo, kithoina thillatte chu a ne ding uh ahi;

²ahi’n la, a chipite lak ah kipat gochan bangma a neilo ding uh ahi; a kiang ua a la tiam dungzui in, LALPA chu a chanvo uh hi ta’n a.

³Mipite kithoina bawngchal a hem leh, belam sa a hem lak ah ziate hi thiampu chantum dingte chu ahi: a liang leh a khanuai teni tawh, a bupi chu thiampu a piak ding uh ahi.

⁴Chuleh, la lou ua ga masate, la uain teu, la sathauteu leh la belam hon lak ua a piang masa pen chiat chu thiampu chan ding ah la piak ding uh ahi.

⁵LALPA min ah kumkhua nasêm dingin, LALPA la Pathian un la nam pumpiu lak ah kipat in, Levi leh a suante zosia chu a la têldaw sa ahi tai.

⁶Levite lak ah kuale Israelte chênna mun zosia ah, LALPA‘n a guatna ding mun khat po ah a chen lut nop phot chun, (a nop hun hun leh hung lût kit thei tho intiu in);

⁷a hung tunna mun ah LALPA ma ah Levi nasêm ah a la umsate gual tho in, ama’nle LALPA a Pathian min in, na a sêm ngâl ding ahi.

⁸A Inkuan neithil a zokna man uh nei tho maleu, thiampu dangte tawh nêk ding kibang tak in a chang tho tho ding uh a hi.

⁹LALPA la Pathian un a hun piakna ding gam chu la hung tun phat ua leh, zia gam ah a la umsate thilbawl ki’dak um takte chu zui kiu in.

¹⁰La lak ua kuale a chapa a hem, a chanu a hem mei ah kithoina ding ah pia a hem, phunsânte, thugenlawk chîngte, ngaibel chîngte, dawi bawl chîngte,

¹¹âisân chîngte, thitha leh dawi ho-te leh mi thisate thu dong sekte him him chu la lak un a um lo ding uh ahi.

¹²Zia gual thilbawl hi LALPA ki’dak lam tak ahi; zia gual thil ki’dak um takte hi a la bawl ziak un, la ma-âng ua kipat LALPA la Pathian un a la nawdaw ahi ngâl a.

¹³LALPA la Pathian â ding bep ah ginum tak ah la umzing ding uh a hi.

¹⁴La suandaw ding uh namte chun Phunsân leh âisânte chu ngaisâng maleu, nanghaw vang LALPA la Pathian un zia gual chu bawl dingin a hun phal puai.

¹⁵LALPA la Pathian un la lak ua kipat in keima gual jawlnei khat hun tungdok ding ahi; zia gual ah jawlnei chu a thu la mat ding uh ahi.

¹⁶Horeb tâng ah mipi kikhop ni LALPA la Pathian kiang un, “LALPA ka Pathian uh aw ka het kit ua, zia a meikuang hi ka mu kit uh chun thi mai ding ka hiu,” ti’n la don tau a.

¹⁷Ziaphatchun, LALPA‘n ei hun dawnhu a, “A thugen uh chu a dik ngei hi.

¹⁸Amau lak ah kipat ma ma in nangma gual hi jawlnei khat hun tungdok ing ka tin; zia jawlneipa kam ah chun ka thute koi ing ka tin, a kiang ah thu ka piak taphot chu a kiang un hil mai ta’n.

¹⁹Kuale ka min ah thugen jawlnei kamsuak ngaitha lo taphot chu, a chungchâng keima’n ngaitua ing ka.

²⁰Himaleh, jawlnei kuale a gen ding ah ka piak hilo keima min ah thugen a hem, pathian dangte min ah thugen a hem a um chun, zia jawlnei chu thalup ding ahi,” a tia.

²¹Nang un la lungthim un, “Bangti’n em zia thu hi LALPA gen ahi puai ti ka hetkhen thei ding uh?” la tiu ahi chun,

²²jawlnei in LALPA min ah thu a gen hi’ngâl ah guitung lo leh, a diklona mu chian ahi chun, zia chu LALPA ah kipat hilo ahi, ti’na ahi, jawlnei in a ginkawmngai ah a gen mai mai ahi, zia gual chu lau kiu in.