Read Vaiphei DAN LEKHABU 19 Bible Online

DAN LEKHABU 19 - Vaiphei bible

DAN LEKHABU 19

¹LALPA la Pathian un a hun piakna ding gam ah a la chêngsa namte chu, LALPA la Pathian un hun suandaw sak zo ah, amau khua leh a Inteu la hun lua phat ua leh,

²LALPA la Pathian un la lua ding uh a hun piakna gam ah chun, khawpi pathum la koichuam ding uh ahi.

³LALPA la Pathian un la luana ding ua a hun piakna gam chu, a gamlat dan kibang chiat in gambung pathum in khen unla; tichun, tualthat taphot a tai lut ziang theina ding un.

⁴Kuale chanpal ah mi that kha phut a um ah, amau teni chun kihuatna a la nei kha lo ahi phot ua leh, zia tak ah hung tailut tualthatpa chu, thalup lo ding ahi.

⁵Mi khat a Invêngpa tawh thing sât dingin gamlak ah kuan uh hen la, a khut ah heicha a lap lai in a chang tong in, a lawipa sep lum ziang ta leh, tualthatpa chu zia bitna khua pakhat pen pen ah chu a tai lut phot leh, a hing ngâl ding ahi.

⁶Amau te ni chun kihuatna a la nei kha lo a hiziak un, thi tâk ding ah a chung ah thutanna um man nai lo maleh, bitna ding khuate chu a gamlat bêk ziakin, tualthatpa chu a tai tung masang in, thisan phuba lâk gua delpa chun delpha’n, a lungnat lai tak in that ziang kha’n a.

⁷Ziaziakchun, khawpi pathum koichuam dingin thu ka hun pia la hiu.

⁸La pu leh pateu kiang ah a la kitiamna dungzui ah LALPA la Pathian un la gamgiteu hun kêk lian piak ah, a tiamna gam zosia a hun piak suak phat leh,

⁹tu’ni ka thupiak gual ah LALPA la Pathian uh la hepiu ah, a lampite la zui zing ua, la bawl ding ua thu ka hun piak zosia la bawl uh chun, zia khua pathumte bân ah hin, khawpi dang pathum ma la hun bawl belap ding uh ahi.

¹⁰LALPA la Pathian un la lua ding ua a hun piakna gam sung ah chun, thiamlo chansak ah la um lona ding ua, mawna neilote thisan chu sua a hilona dingin.

¹¹Himaleh, kua’nle a Invêngte huatna nei ah changgu zing ah, a kidelpi ah, zia khuate lak ah khat pen pen ah chu a tai lut chun,

¹²a thatpa chênna khua upa te’n migilo chu vapui ding ah mi sawl in, thisan phuba la dingpa kiang ah pedok intiu in, ama chun mi thatpa chu a that ngâl ding ahi.

¹³La daidawp lo ding uh ahi; la chung ua thilpha a tun theina ding in, Israel gam ah kipat in mawna neilo thisan sua’na gitlona chu la hi bei ding uh ahi.

¹⁴LALPA la Pathian un la luana ding ua a hun piakna ding gam ah, la hung chan phat ua leh, khang masa lam ah mite’n gamgi a la thunsau, la Invêngteu gamgi chu la chawn lo ding uh ahi.

¹⁵Tualthat a hem, thil phalo bawl leh mi gitlona him him chu, thiamlo chansakna dingin hiatpitu pakhat mai thu chu a hun tawk puai. Hiatpitu pani a hem, pathum a hem hetna bep in thiamlo chansak tak tak hi bep ding ahi.

¹⁶Huatna ziak ah hiatpitu kisiam kawm a hung um chun,

¹⁷hêk ah umpa tawh a hiatpitu chu LALPA ma ah chun, zia hun ah thiampu leh vaihawmte ma-âng ah chun ding intiu in;

¹⁸vaihawmte chun gunchu tak in kan chian in au. Zuau thu ah hiatpitu ah kisiam ahi ah, diklo tak ah mi khat hêksiatna ding ah hung pang a hiti mat daw ahi chun,

¹⁹midang khat chung ah siatna tung ding ah a guanggal zosia chu, hiatpitu zuautheipa chung ah bawl hi’n a. Zia gual ah chun la lak ua thil phalo chu la zenthian sek ding uh ahi.

²⁰Mi dang zosia’n zia chu hun hia’n tin uh, lau in au; zia gual thil phalo chu kuama’n la lak un hun bawl ngam ta pua’n au.

²¹Daidawp him him kiu in; hinna thasâng ah hinna, mit thasâng ah mit, ha thasâng ah ha, khut thasâng ah khut, keng thasâng ah keng hi zaw’n a.